Փաստ ինֆո

Հիմա դատավորը խորհրդակցական սենյակում ոչ միայն մեր միջնորդության հիմնավորված լինել-չլինելու մասին է խորհում, այլև մտածում է՝ լավ ինչ կլինի, եթե ես բավարարեմ այդ միջնորդությունը։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական թիմի անդամ Հայկ Ալումյանը։

«Խորհրդակցական սենյակում դատավորը միայն պետք է մտածի միջնորդությունը հիմնավոր է, թե ոչ։ Բացի օրենքները, ՄԻԵԴ-ի վճիռները, իսկ այս դեպքում ստիպված է մտածել այն մասին, թե իր հետ ինչ կլինի, եթե բավարարի մեր միջնորդությունը. քրեական գո՞րծ կհարուցեն, թե՞ կգան դատարանը կփակեն, կամ մինչ օրս չեղած մի բան կանեն»,-ասաց փաստաբանը։

Վերջինս նկատեց, որ մինչ օրս ցանկացած դատավոր, ով Ռոբերտ Քոչարյանի օգտին մեծ նշանակության կամ փոքր նշանակության դատական ակտ է կայացրել, ոչ միայն հետապնդումների է ենթարկվել, այլև քրեական գործեր են հարուցվել. «Ցանկացած դատավոր, որ մեր միջնորդությունները բավարարել է, տեսել եք՝ ինչ է կատարվել»,-հավելեց Ալումյանը։

Վերջինս ընդգծեց, որ դատական համակարգի հանդեպ աննախադեպ բնույթի, աննախադեպ դրսևորումներ են եղել, որոնք իր կարծիքով ոչ միայն Հայաստանում երբևէ չեն եղել, այլև ամբողջ աշխարհում։

Անդրադառնալով պաշտպանական խմբի ներկայացրած գրավի միջնորդությանը՝ նշեց, որ չեն վիճարկում դատարանի նախորդ որոշումը, որն արդեն բողոքարկել են Վերաքննիչ դատարան. «Խնդիրը նրա մեջ է, որ դատարանին ասացինք, որ այն օրենսդրական խոչընդոտը, որի պատճառով դատարանն անցած անգամ գրավ չկիրառեց, հիմա այլևս գոյություն չունի»,-հավելեց Հայկ Ալումյանը։

Նա նաև նշեց, որ Վերջին անգամ, երբ Ռոբերտ Քոչարյանի խափանման միջոցի հարցը բարձրացրել էին, միջնորդել էին գրավ կիրառել, դատարանը հերքել էր դատախազների պատճառաբանությունները՝ ասելով, որ թաքնվելու հավանականությունը բացակայում է։

«Դատարանը նշել էր, որ կա խոչընդոտելու հնարավորություն, բայց այդ հավանականությունը նվազել է։ Դրանից հետո դատարանն անդրադարձել էր գրավ կիրառելու խնդրին և ասել էր, որ մեր օրենսդրությունը և Վճռաբեկ դատարանի դիրքորոշումները թույլ չեն տալիս, որպեսզի այն դեպքում, երբ կա խոչընդոտելու հավանականություն, ապա այդ դեպքում կիրառվի գրավ»,-ասաց Հայկ Ալումյանը։

Հեղինակ՝ Հասմիկ Կոշկարյան

Աղբյուր` Փաստինֆո