Փաստ ինֆո

Գագիկ Խաչատրյանին կալանքից ազատելու այնպիսի ուղիղ պահանջներ կային, որոնք դատարանն անտեսեց և սիրով կցանկանանք տեսնել՝ ինչպես են պատճառաբանել։ Լրագրողների հետ զրույցում այս մասին ասաց փաստաբան Երեմ Սարգսյանը՝ ավելացնելով, որ առավել առարկայական կանրդադառնա այս հարցին դատարանի որոշման բովանդակությանը ծանոթանալուց հետո։

Երեմ Սարգսյանը հավելեց, որ որոշումը միանշանակ բողոքարկելու են. «Նախորդ որոշման վերաբերյալ արդեն Վճռաբեկ դատարան բողոք ենք ներկայացրել։ Ավելին ասեմ հիմա Վճռաբեկ դատարանի առջև ևս մեկ այլ հարց կա, որովհետև Վերաքննիչ դատարանը երբ գրավի կիրառումը մերժել էր, հիմքում դրել էր այն, որ գործի քննությանը խոչընդոտելու վտանգ կա։ Կար պրակտիկա, որ եթե եթե կալանքի հիմքերից մեկը խոչընդոտման հավանականությունն է, ապա մեխանիկորեն գրավի կիրառումն անթույլատրելի էին համարում, սական ՍԴ-ն վերջերս կայացրած որոշմամբ հստակ արձանագրեց, որ այդ պրակտիկան հակասում է և՛ Սահմանադրությանը, և՛ օրենսդրությանը»,-ասաց փաստաբանը՝ ընդգծելով, որ եթե պետությունը Վճռաբեկ դատարանի մակարդակում իր պարտավորությունները չկատարի, ապա կդիմեն ՄԻԵԴ. «Վստահ եմ, որ այնտեղ այս առումով լուրջ հարցեր կառաջադրվեն պետությանը»,-հավելեց Երեմ Սարգսյանը։

Անդրադառնալով Գագիկ Խաչատրյանի առողջական վիճակին՝ փաստաբանն ասաց, որ նա բավականին վատ է. «Չեմ կարող առավել խորությամբ դրան անդրադառնալ, բայց այն որ կան համապատասխան բժշկական փաստաթղթեր, որոնց համաձայն՝ արդեն իսկ առողջ տրամաբանությունը վկայում է, որ անհապաղ պետք է ազատ արձակվի, դա փաստ է»,-ասաց ՊԵԿ նախկին նախագահի պաշտպանը։

Հիշեցնենք, որ դատարանն այսօր բավարարե է ԱԱԾ քննիչի միջնորդությունը՝ Գագիկ Խաչատրյանի նկատմամբ որպես խափանման միջոց կալանավորումը երկարացնելու մասին եւ մերժել նրա նկատմամբ 230 մլն դրամի գրավ կիրառելու մասին փաստաբանի միջնորդությունը։

Հեղինակ` Հասմիկ Կոշկարյան