Փաստ ինֆո

Ամերիկահայ ներդրողից առանձնապես խոշոր չափերի հափշտակություն կատարելու մեջ մեղադրվող Վլադիսլավ Մանգասարյանի գործով թեև դատական ակտը կայացվել է դեռևս ընթացիկ տարվա հուլիս ամսին, սակայն մինչ այսօր այն չի տրամադրվել գործով տուժողներին, ինչպես նաև տեղադրված չէ Դատական տեղեկատվական համակարգում:

«Փաստինֆո»-ն ավելի վաղ տեղեկացրել է, որ հիշյալ գործը դատարան մուտքագրվելու պահից գտնվել է դատավոր Արմեն Բեկթաշյանի վարույթում, շուրջ 3 տարի գործը քննելուց հետո հուլիսի 29-ին նա դատավճիռ է հրապարակել՝ դատական նիստում հնչեցնելով միայն եզրափակիչ մասը՝ մի քանի միիարդ հափշտակության մեջ մեղադրվող, ՀՀ երրորդ նախագահի եղբոր՝ Լյովա Սարգսյանի հովանավորությունը վայելող Մանգասարյանի նկատմամբ կիրառելով համաներում։ Նշենք, որ քրեական գործով տուժողներին պատճառված վնասը չի փոխհատուցվել։

Դատավճռից օրեր անց՝ օգոստոսի 5-ին, Բեկթաշյանը Նախագահի հրամանագրով նշանակվեց Վերաքննիչ դատարանի դատավոր: Դատական ակտի կայացումից հետո անցել է 2,5 ամիս, սակայն դատական ակտը կողմերին դեռ չի ուղարկվել։ Այս ընթացքում մեղադրյալը մահացել է, իսկ տուժողների իրավունքները մնացել չվերականգնված։ Ըստ էության՝ դատավարության կողմերը զրկվել են իրենց իրավունքի իրացումից՝ դատավճիռն օրենքով սահմանված ժամկետներում բողոքարկելուց:

Բացի այդ, եթե դատական ակտը չի տրամադրվել կողմերին, ապա կարելի է ենթադրել, որ այն ուղղակիորեն գրված չէ և հետագայում այն դատավարության կողմերին տրամադրելու պարագայում ողջամիտ կասկած է հարուցելու՝ հետին ամսաթվով այն կնքելու մասին: Հարկ է նշել, որ առաջին ատյանի դատարանից, երբ դատավորը վերաքննիչ դատարան է տեղափոխվում պարտավոր է կնիքը հանձնել և վերաքննիչ դատարանում նորը ստանալ, իսկ եթե կնիքը հանձնել է, ապա ինչպես է կնքվելու դատավճիռը՝ հետին ամսաթվո՞վ, այսինքն՝ կատարվելու է կեղծի՞ք։ Իսկ եթե դատական ակտը պատրաստ է ու կնիքված, ապա առնվազն տարօրինակ է, որ այն չի տրամադրվում կողմերին:

Հիշեցնենք, որ ըստ մեղադրանքի՝ Վլադիսլավ Մանգասարյանը  ընդհանուր առմամբ խարդախության եղանակով բազմաթիվ քաղաքացիներից ու «Արին կապիտալ» ընկերությունից առանձնապես խոշոր չափերի՝ ավելի քան 2,5 մլրդ ՀՀ դրամի գույքի հափշտակություն է  կատարել` 2005-2011թթ.: Մասնավորապես` մի շարք անձանց առանձնապես խոշոր չափերով գույքը հափշտակելու դիտավորությամբ, գործընկերոջ` Էդմոնդ Խուդյանի, անվամբ սեփականության իրավունքով գրանցված Երևան քաղաքի Մաշտոցի 33Ա հասցեում (ներկայիս՝ Մաշտոցի 33/1) գտնվող հողամասի վրա կառուցվող շենքից գրասենյակային տարածքներ, բնակարաններ և ավտոկայանատեղեր վաճառելու կեղծ խոստումով, խաբեությամբ նրանցից ստացել ու հափշտակել է, իսկ կատարված հափշտակությունը քողարկելու նպատակով ինչպես իր, այնպես էլ՝ շենքի հետ փաստացի առնչություն չունեցող և հիշյալ շենքից տարածքներ օտարելու իրավասություն չունեցող «ՎԷՌՄ» ՍՊ ընկերության անունից նրանց հետ կնքել է առքուվաճառքի նախնական պայմանագրեր: Քրեական գործով անցնում է 26 տուժող, բացահայտվել է խարդախության 31 դրվագ։

Ամերիկահայ գործարար դեռեւս նախորդ իշխանության օրոք դիմում էր ներկայացրել նաեւ Նյու Յորքի միջազգային դատարան, 2018 թվականին Հայաստանում տեղի ունեցած իշխանափոխությունից հետո եւս նոր կառավարությունը քայլեր չձեռնարկեց գործարարի խախտված իրավունքները վերականգնելու եւ պատճառված վնաս փոխհատուցելու ուղղությամբ։ Միջազգային դատարանում գործը շարունակվում է, որտեղ «Փաստինֆո»-ի տեղեկություններով, արդեն մի քանի անգամ միջանկյալ որոշումներով մերժվել են կառավարության փաստարկները՝ ըստ էության հիմնավորված համարելով գործարարի ներկայացրած ապացույցները։ Ավելին՝ դրան զուգահեռ, փաստորեն, ներպետական ատյաններում խախտումները շարունակվում են։

Աղբյուր` Փաստինֆո