Փաստ ինֆո

Չորեքշաբթի ԱՄՆ նախագահ Դոնալդ Թրամփը դժգոհություն է հայտնել այն ձևից, որով Դանիայի վարչապետ Մեթե Ֆրեդրիկսենը հայտարարել է Գրենլանդիան վաճառելու հնարավոր գործարքից  հրաժարվելու մասին:

«Դա արվել է տգեղ ձևով», - մեջբերում է CBS հեռուստաալիքը նախագահի խոսքերը:

Նախագահի խոսքով՝ Ֆրեդրիկսենը վարվել է «տհաճ կերպով», երբ անվանել է Գրենլանդիան գնելու իր պլանները «անհեթեթ»: Թրամփը շեշտել է, որ վարչապետը կարող էր պարզապես բացասական արձագանքել իր առաջարկին:

Ավելի վաղ այս շաբաթվա մեջ Ֆրեդերիկսենը հայտարարել էր, որ ինքը «աբսուրդ թեմա» է համարում Միացյալ Նահանգների Դանիայից Գրենլանդիան գնելու գաղափարը և բացառել է կղզին վաճառելու հնարավորությունը:

Այնուհետև հայտնի դարձավ, որ Թրամփը որոշել է հետաձգել Ֆրեդերիկսենի հետ սեպտեմբերի սկզբին նախատեսված հանդիպումը անորոշ ժամանակով՝ վերջինիս Գրենլանդիայի վաճառքի հարցը քննարկել չցանկանալու պատճառով:

Ավելի վաղ The Wall Street թերթը՝ հղում անելով նախագահ Թրամփի երկու օգնականների խոսքերին, հայտնել էր, որ նա բազմիցս հարցրել է նրանց և այլ պաշտոնատար անձանց Գրենլանդիան գնելու հնարավորության մասին: Նշվում է, որ նա նույնիսկ Սպիտակ տան իրավախորհրդատուին խնդրել է անցկացնել նախագծի օրինական փորձաքննություն: Հրապարակման մեջ նշվում է, որ Կոպենհագենն, իբր, դժվարություններ է ունենում Գրենլանդին տարեկան 600 միլիոն դոլար սուբսիդիա վճարելու հարցում, իսկ Թրամփին հետաքրքրել է այդ ծախսերն իր վրա վերցնելու հնարավորությունը:

Գրենլանդիան աշխարհի ամենամեծ կղզին է: Գրենլանդիայի բնակչության մեծ մասը՝ 56 հազար մարդ, ապրում է ֆիորդերով կտրտված ափերին, որտեղ չկա սառույց: Արտաքին և անվտանգության քաղաքականությունը վարում է Կոպենհագենը:

1951 թ-ին Դանիան և ԱՄՆ-ը պայմանագիր են կնքել պաշտպանության ոլորտում, որը ԱՄՆ զինված ուժերին իրավունք է տվել օգտագործել «Տուլ» ավիաբազան Հյուսիսային Գրենլանդիայում:

Աղբյուր` Փաստինֆո