Փաստ ինֆո

«Էյ ընդ Ար Տուր» կազմակերպությունից արդեն երկրորդ օրն է, ինչ լուր չկա:

Երեկ տեղեկացրել էինք, որ վաղ առավոտից տուրիստական կազմակերպության դռները փակ են եղել։ Մեր այցելության պահին գրասենյակի մոտ սպասում էին ընկերությունից փաթեթներ ձեռք բերած մի շարք քաղաքացիներ՝ հասկանալու համար ինչ ճակատագիր է սպասում իրենց փաթեթներին:

Սա այն տուր օպերատորն է, որի պատճառով հուլիսի 25-ին չեղարկվել էր Հուրգադա-Երևան չվերթը, որի հետևանքով էլ 119 ՀՀ քաղաքացի մնացել էր Հուրգադայում: Նշենք, որ A&R հայկական տուր օպերատորի կողմից չէր կատարվել հունական «Orange to Fly» ավիաընկերության նկատմամբ ունեցած ֆինանսական պարտականությունները, որի պատճառով տեղի չի ունենալու նաեւ հուլիսի 29-ի չվերթը: Կառավարությունը որոշել է ինքը կազմակերպել զբոսաշրջիկների տեղափոխությունը։

Այսօր եւս «Փաստինֆո»-ի թղթակիցն այցելել էր գրասենյակ, որի դռները կրկին փակ էին։ Մեր հետ հեռախոսազրույցում քաղաքացիներից մեկը տեղեկացրեց, որ հուլիսի 26-ին մինչեւ երեկո մնացել են կազմակերպության գրասենյակի մոտ, սակայն աշխատակիցներն այդպես էլ չեն եկել:

Նրա խոսքով, այսօր նույնպես պատրաստվում են գնալ «Էյ ընդ Ար Տուր»-ի գրասենյակ:

Նշենք, որ «Էյ ընդ Ար Տուր»-ից, ինչպես երեկ, այսօր նույնպես չպատասխանեցին «Փաստինֆո»-ի զանգերին, փորձեցինք կազմակերպության կայքի միջոցով կոնտակտային այլ տվյալ գտնել, սակայն կայքը նույնպես չէր գործում:

Yell.am տեղեկատու կայքի տվյալներով՝ «Էյ ընդ Ար Տուր» կազմակերպությունը գրանցված է «ԷԴՅՈՒՔԵՅՇՆԼ ՓԼԱՆԵՏ» ՍՊԸ-ի անվամբ:

Այս անունով որոնման արդյունքում էլեկտրոնային ռեգիստրից տեղեկացանք, որ տվյալ ՍՊԸ-ն գրանցվել է 2009թ.-ի հուլիսի 10-ին, որի հիմնադիրն է Սաթենիկ Կարապետյանը:

Նշենք նաև, որ ՀՀ ոստիկանության կազմակերպված հանցավորության դեմ պայքարի վարչությունում նյութեր են նախապատրաստվում «Էյ ընդ Ար Տուր» տուրօպերատորի գործունեության վերաբերյալ:

ՀՀ գլխավոր դատախազությունից «Փաստինֆո»-ին տեղեկացրին, որ քրեական գործ դեռ չի հարուցվել։

Հեղինակ` Սոնա Գեւորգյան