Փաստ ինֆո

Նոր ներգրավված դատավորների աշխատավարձերը կկարողանանք բարձրացնել, դարձնել 2,5-3 մլն դրամ։ Այսօր Ազգային ժողովում 2018-ի բյուջեի կատարողականի քննարկումների ժամանակ նման հայտարարությամբ է հանդես եկել ՀՀ վարչապետ Նիկոլ Փաշինյանը։

Նրա խոսքերով՝ այսօր դատավորների, առավել ևս գործող կազմի աշխատավարձը բարձրացնելը բազմաթիվ պրոբլեմներ ունի, այդ թվում՝ հանրային ընկալման տեսանկյունից, առավել եւս, երբ բազմաթիվ սոցիալական  խնդիրներ լուծված չեն։ «Մեր ընկալումն այն է, որ մեր գործընկերները՝ միջազգային դոնորները, Հայաստանին կաջակցեն այս հարցում, մենք 2-3 տարի դատավորների, նոր ներգրավված դատավորների աշխատավարձերը կկարողանանք բարձրացնել, դարձնել 2,5-3 մլն դրամ»,- ասաց վարչապետը՝ նշելով, որ դա պետական բյուջեի վրա ուղիղ ազդեցություն չի ունենա։ «Այդ ընթացքում մենք, համոզված եմ, կկարողանանք լուծել բազմաթիվ սոցիալական խնդիրներ։ Բացի այդ, և իշխանությունը, և ընդդիմությունը, և քաղհասարակությունը կհամոզվի՝ անկախ դատական համակարգ ունենալու հարցում ու կհասկանա՝ սա մի ծախս է, որ արժե անել ու հանրությունը կհամաձայնի սեփական միջոցներից գումար տրամադրել՝ պայմանով, որ մեզ իսկապես պետք է անկախ դատական համակարգ», - հայտարարեց վարչապետ Նիկոլ Փաշինյանը։

Ծախսը, ըստ վարչապետի, կազմում է 10 մլրդ դրամ։

Անդրադառնալով իր ղեկավարած կառավարության հասցեին հնչող քննադատությանը, որ բարեփոխումները պատշաճ ակտիվությամբ չի արվում՝ ՀՀ վարչապետ Նիկոլ Փաշինյանը նշել է, թե մեկ տարվա կյանք ունեցող կառավարությունից պետք չէ ակնկալել 30 տարվա խնդիրների լուծումներ։

«Իմ տպավորությունը ու կարծիքն այն է, որ արագ ռեֆորմներ նշանակում են ձախողված ռեֆորմներ։ 90-ականների սկզբին, որպես լրագրող ես հետևել եմ, իմ աչքի առաջ ձախողվել են փայլուն ստրատեգիական ռեֆորմներ, քանի որ դրանց հեղինակները ցանկացել են արագ անել։ Մինչև այսօր Հայաստանը կրում է այդ ռեֆորմների չիրականացման ծանրագույն հետևանքները։ Շատ կարևոր է չշտապել ափալ թափալ գործողություններ չանել», - հայտարարեց վարչապետը։

Աղբյուր` Փաստինֆո