Փաստ ինֆո

Իշխանափոխությունից առաջ ընդդիմությունը, այդ թվում` նաև Նիկոլ Փաշինյանը բազմիցս բարձրացրել են այն հարցը, թե ինչո՞ւ է գազի դիմաց բնակչությունը կրկնակի բարձր գին վճարում։ Իշխանափոխությունից հետո այդ խնդիրը մի տեսակ ստվերում է մնացել։ Իշխանության քաղաքական թիմը այլևս չի հիշում, որ բնակչությունը ներմուծման գնից կրկնակի բարձր է վճարում գազի դիմաց։

Ու չնայած ժամանակին հնչում էին խոստումներ` գազի, ինչպես նաև հանրային այլ ծառայությունների սակագները նվազեցնելու վերաբերյալ, այսօր դրա մասին մոռեցել են։ Ընդհակառակը` հասարակությունը կանգնած է մեկ այլ` սակագների բարձրացման խնդրի առջև։
Իշխանափոխությունից հետո կառավարությանը չհաջողվեց նվազեցնել ներքին սակագները` հանրային ծառայությունների և ոչ մի ոլորտում։ Ավելին, տարեսկզբից թանկացավ ռուսական գազի ներմուծումը։

Այսօր խնդիրը վերստին արդիական է և մեծ է հավանականությունը, որ ներմուծման հերթական թանկացումը կհանգեցնի նաև ներքին սակագների բարձրացման։ Իսկ թե ինչ եղան համակարգում առկա արատավոր բարքերի, չհիմնավորված բարձր սակագների, սպառողներին թալանելու և միլիոնավոր դոլարների հասնող յուրացումների վերաբերյալ ժամանակին արված հայտարարությունները, այդպես էլ անհայտ մնաց։ Իշխանափոխությունից անմիջապես հետո կառավարությունը հատուկ հանձնաժողով ստեղծեց, որը պիտի զբաղվեր այդ երևույթների բացահայտմամբ։ Բայց բացահայտումներ չեղան։

Սա նշանակո՞ւմ է արդյոք, որ նախկինում արված հայտարարություններն անհիմն էին։ Այս հարցի պատասխանը թողնում ենք ընթերցողին։
Ամեն դեպքում, տպավորություն է, որ այստեղ ինչ-որ մութ պրոցեսներ են տեղի ունենում։ Արդեն վեց ամիս կառավարության ու «Գազպրոմ Արմենիայի» ձևավորված աշխատանքային խումբը ուսումնասիրություններ է իրականացնում գազամատակարարման համակարգի օպտիմալացման և ծախսերի կրճատման ուղղությամբ։ Գործընթացը մի տեսակ շատ երկար է ձգվում, իսկ արդյունքների մասին ոչինչ հայտնի չէ։

Չնայած օրերս «Գազպրոմ Արմենիայից» հայտնեցին, որ իրենց տեղեկություններով գազի սակագնի հետ կապված աշխատանքները շուտով կավարտվեն և ընկերությունը կներկայացնի իր դիրքորոշումը, այնուհանդերձ դրա հավանականությունը շատ քիչ է։ Ըստ էության, բոլոր սպասում են ՌԴ նախագահի Հայաստան կատարելիք այցին, որը, ինչպես հայտնի է, լինելու է հոկտեմբերին։ Հավանաբար այդ ժամանակ էլ կարվեն գազի գնի վերջնական հստակեցումները։

Թե ինչպիսի՞ն կլինի լուծումը, կերևա մինչև տարեվերջ։ Մի բան այնուհանդերձ միանշանակ է` գազի սակագնի հարցը չափազանց զգայուն թեմա է սպառողների համար։ Ու չնայած դրան Նիկոլ Փաշինյանին առայժմ չի հաջողվում Հայաստանի համար նպաստավոր լուծումների հասնել։

Գազի թանկացումը բերելու է տնտեսության մրցունակության անկման, որն առանց այդ էլ մի փայլուն վիճակում չէ։ Տուժելու է նաև բնակչությունը։ Հատկապես որ, իշխանափոխությունից հետո թե՛ մեկ, և թե՛ մյուս դեպքում ոչինչ չի փոխվել` ո՛չ տնտեսության դիմադրողականությունն է բարձրացել, և ո՛չ էլ սպառողների վճարունակությունն է ավելացել։

Աղբյուր` Փաստինֆո