Փաստ ինֆո

«Մենք այնպիսի ժամանակներում ենք ապրում, որ նույնիսկ ամենահնչեղ ժողովրդավարության անվան տակ կարող է  տոտալիտարիզմ լինել, եւ ես կարող եմ վստահ ասել, որ Հայաստանում, այո, եղել է տոտալիտարիզմ՝ հիմնված ապազգայնության եւ միֆակրոնության զույգ գաղափարների վրա հիմնված, ինչը խորը ուսումնասիրության, վերագնահատումի եւ համապատասխան լուծումների կարիք ունի»,-այս մասին լրագրողների հետ զրույցում այսօր հայտնեց «Սասնա ծռեր» կուսակցության  անդամ Վարուժան Ավետիսյանը. «Եթե մենք այդպիսի խորը մոտեցում չցուցաբերենք, ուղղակի  չենք կարողանա բուժել բազմաթիվ ախտերով, արատներով լցված մեր հանրային, պետական մարմինը»,-ասաց նա։

Լրագրողի այն հացրին՝ արդյո՞ք ԲԴԽ նախագահի հրաժարականը պետության կողմից սահմանադրական խախտումով ճնշման արդյունք էր, Վարուժան Ավետիսյանը պատասխանեց. «Մենք Սահմանադրություն չունենք, դա սուվերենի կամքին հակառակ, նրա վզին փաթաթված, անօրինական ակտ է, որը պետք է օր առաջ փոխվի, հեղափոխությունը պետք է հեղափոխության նման լինի. երբ այն սկսվեց ներքեւից, պրն Փաշինյանը կասեցրեց, եւ հեղափոխականության փոխարեն որդեգրեց իրավահաջորդության սկզբունքը, եւ մենք խրվեցինք այս ճահիճի մեջ»։

Վարուժան Ավետիսյանի խոսքով՝ այսօր ժողովուրդը ունի գոնե հիմնական մասով վստահությունը վայելող ԱԺ եւ Կառավարություն, ինչի շնորհիվ կա հնարավորություն հեղափոխությունը շարունակել վերեւից՝ կիրառելով անցումային արդարադատության ամենալայն գործիքակազմը. «Այո, եղել է, եւ մինչ այսօր էլ կա արտակարգ վիճակ, եւ պետք է չթաքցնել, որ կա արտակարգ դատարանների կարիք՝ իրենց դատախազական եւ այլ բաղադրիչներով, մանրամասները թող մասնագետները որոշեն, բայց արտակարգ իրավիճակում կա արտակարգ լուծումների կենսական անհրաժեշտություն, պետք չէ խուսափել դրանից եւ քողարկվել այդ ապօրինի փաստաթղթերով, այդ թվում՝ Սահմանադրություն կոչվող ակտով, եւ ասել՝ ինչպե՞ս կարելի է, պետությունները ցնցումների մեջ կընկնի, եւ այլն, եւ այլն։ Եթե սուվերենը նշտարը վերցնում է իր ձեռքը, ուրեմն՝ հաստատ վիրահատությունը բարեհաջող կլինի»։

Խոսելով վեթթինգի մասին հայտարարության նկատմամբ դատավորների արձագանքից, Ավետիսյանը նշեց, որ նրանք կարծես ուզում էին ցույց տալ, թե իրենք անփոխարինելի են. «Անփոխարինելի մարդիկ չկան, բոլորս էլ փոխարինելի ենք, եւ հաջորդ սերունդները, որպես կանոն, շատ ավելի լավն են լինում, քան ներկաները»։

Ավետիսյանի խոսքով՝ ազգային հեղափոխությունը շարունակելու եւ իր տրամաբանական ավարտին հասցնելու հարցում իշխանության կողմից ինչ դրական քայլեր կատարվեն, իրենք դրանք ողջունելու են եւ ըստ ամենայնի, աջակցեն։

Պատասխանելով «Փաստինֆո»-ի այն հարցին, թե որքանով է ճիշտ համարում վեթթինգի անցկացումն այսօր, Վարուժան Ավետիսյանն ասաց. «Ես շատ ուշացած եմ համարում, պետք է անմիջապես արվեր, բայց կրկնում եմ. եթե ներքեւից սկսած հեղափոխության փուլում չարվեց, ապա հիմա հնարավորություն կա՝ պրոցեսը վերեւից շարունակելու, նոր իմպուլս տալու եւ մինչեւ վերջ հասցնելու, այնպես որ՝ ուշ է, բայց ուշացած չէ»։

Նրա խոսքով՝ ամբողջ իրավապահ համակարգը, ուժային բաղադրիչները, ԱԱԾ-ն,  Ոստիկանությունը պետք է կազմաքանդվեն եւ վերակազմավորվեն, ընդ որում՝ կադրային կազմի էական փոփոխությամբ. «Ես կարծում եմ, որ լյուստրացիա պետք է լինի, վեթթինգը բավարար չէ. կյանքն է ստիպում կոշտ վիրահատական մոտեցումներ անել, հակառակ դեպքում մենք պետություն չենք դառնա»։

Մեր այն հարցին, թե ինչ ժամկետներում է հնարավոր դա իրականացնել, Վարուժան Ավետիսյանը պատասխանեց. «Ժամկետները պետք է հնարավորինս սեղմ լինեն, որեւէ մեկը այսօր չի կարող կանխորոշել, որովհետեւ նախ պետք է անցյալի իրավաքաղաքական գնահատականը տանք, ապա՝ ախտորոշենք, թե ինչ փոփոխություն է տեղի ունեցել, ինչ վիճակում ենք, եւ նոր հասկանանք, թե ինչքան գործ կա անելու, դրա որ մասն է անհրաժեշտ անել, որովհետեւ ամբողջը, միեւնույն է, հնարավոր չէ»։

Վարուժան Ավետիսյանը հիշեցրեց կարմիր, դեղին եւ սպիտակ գծերի իրենց ներկայացրած տրամաբանությունը. «Պետք է լինի գործի կարմիր, դեղին եւ սպիտակ գծերի տրամաբանություն, եւ ի վերջո քրեական պատասխանատվության պետք է ենթարկվեն կարմիր գծից այն կողմ գտնվող շատ սահմանափակ թվով մարդիկ, եթե դեղին եւ կարմիր գծերի արանքում են, ապա պետք է պարզապես հեռացվեն կառավարումից, գույքային եւ այլ պատասխանատվության ենթարկվեն՝ հետագայում թույլ չտալով նրանց կառավարման մասնակցել, իսկ արդեն սպիտակ գծից ներքեւ գտնվողները սովորական մարդիկ են, որոնք այս կամ այն կերպ ընդամենը զոհ են, եւ պետք է նրանց կենսագրությունն ընդամենը մաքրվի»։

Ավետիսյանի կարծիքով՝ այս ամենը պետք է իրականացնեն հանրային վստահություն ունեցող մարդիկ,ովքեր ստանդարտներով ընդունված պարամետրերին կհամապատասխանեն. «Ինչ-որ մի կորիզային օղակ կլինի, որին բոլորը վստահում են, եւ որը պետք է սկսի գենդերացնել մնացած շրջանակները, պարզ է, որ տեր Աստծուն ուղիղ միջամտության կանչելու հնարավորության չկա»,- ասաց «Սասնա ծռեր» կուսակցության անդամ Վարուժան Ավետիսյանը։

Հեղինակ` Միլենա Խաչիկյան