Փաստ ինֆո

Վերաքննիչ քրեական դատարանը մերժեց «Սպայկայի» տնօրեն Դավիթ Ղազարյանի նկատմամբ կալանավորումը որպես խափանման միջոց  ընտրելու մասին Երեւանի ընդհանուր իրավասության դատարանի որոշումը վերացնելու մասին փաստաբանների բողոքը, ինչպես նաեւ գրավ կիրառելու մասին միջնորդությունը:

«Չանձնավորելով որևէ դատավորի կամ վարույթ իրականացնող մարմնի՝ անձնավորված որևէ վիրավորանք չենք ուզում ասել, այնուամենայնիվ, այս որոշումը մենք գնահատում ենք որպես գործարարից գումար կորզելու մեխանիզմ», - դատարանի որոշումից հետո լրագրողներին ասաց Ղազարյանի պաշտպանական թիմի անդամ, փաստաբան Սարդարյանը։ 

Նա նշեց, որ կա ենթադրյալ չվճարված հարկ և այդ հաշվարկը իրականացվել է վարույթ իրականացնող մարմնի կողմից՝ տեղեկանքի հիման վրա, որը ուղարկվել է փորձագետներին, նրանք էլ ուղղակի ասել են՝ այս տեղեկանքում ճիշտ է գումարած թե սխալ։

«Այս գործընթացին մեր պաշտպանական թիմը մասնակից չի եղել, մեր աուդիտոր հաշվապահները չեն եղել»-ասաց Սարդարյանը։ Նրա ներկայացմամբ՝ դատարանն ասում է, որ Ղազարյանը ազատության մեջ մնալով կխոչնդոտի գործի քննությանը։

«Այսինքն մեր պահանջը, որ փորձաքննությանը պետք է ներկա լինենք և ներկայացնենք մեր փաստարկները, ներկայացվում է որպես քննությանը խոչնդոտելու ռիսկ»,-նշեց փաստաբանը։

Շարունակելով խոսքը՝ Սարդարյանն ասաց, որ որևէ տվյալ, թե Ղազարյանը երբևէ քննությանը խոչնդոտել է, չի ներկայացվում և վարույթն իրականացնող մարմինն ու դատախազը ընդունում են այդ փաստը։ Ըստ նրա՝  միայն վերացական դատողություն է իրականացվում, որ ընկերության ղեկավարը հեղինակավոր անձ է, նրա հեղինակությունը կարող է ազդել։

«Դատաքննության ընթացքում մենք ներկայացրել ենք, որ ոչ միայն կալանքի հիմքերն են բացակայում, այլև կալանքի տակ պահելը լուրջ տնտեսական ճգնաժամ կարող է առաջացնել»,-նշում է փաստաբանը, ասելով, որ «Սպայկա» ընկերության գործունեությունը ՊԵԿ-ի կողմից վերահսկվում է նաև էլեկտրոնայաին համակարգով։

Վստահորդի հետ քննարկելուց հետո մոտակա օրերին փաստաբանները մամուլի ասուլիս կհրավիրեն և ավելի մանրամասն կխոսեն գործի մասին։

Աղբյուր` Փաստինֆո