Փաստ ինֆո

Ժիրայր Սեֆիլյանի և մյուսների գործով ամբաստանյալ Հովհաննես Պետրոսյանի պաշտպանը պատրաստվում է իր պաշտպանյալի խափանման միջոց կալանավորումը գրավով փոխարինելու վերաբերյալ միջնորդություն ներկայացնել, թեև վստահ է, որ այն մերժվելու է:

Հովհաննես Պետրոսյանի պաշտպան Արսեն Մկրտչյանը «Փաստինֆո»-ի թղթակցի հետ զրույցում ասաց, որ մասնագիտական առումով գովեստի խոսքերից բացի նախագահող դատավորի մասին այլ բան չի կարող ասել, սակայն վստահ է, որ նա խիզախություն չի ունենա օրենքով թույլատրելի խափանման միջոցի վերաբերյալ միջնորդությունը բավարարելու:

Պաշտպանի խոսքով՝ 1,5 տարի է, ինչ ընթանում է նախաքննությունը, դատաքննությունը: Գործով ամբաստանյալներն այս ողջ ընթացքում կալանքի տակ են, սակայն պաշտպանի գնահատմամբ՝ նրանցից մեծամասնության խափանման միջոցները կարելի էր փոփոխել:

«Սեֆիլյանի գործով կալանքի տակ գտնվող անձինք, պետությանը, հանրությանը վնաս չեն պատճառել, նրանց մի մասը հանցագործություն կատարելուց հրաժարվել է, դա գործի նյութերից ևս երևում է, այս պարագայում որքանո՞վ է նպատակահարմար 1, 5 տարի նրանց կալանքի տակ պահել եւ սա այն դեպքում, երբ նրանցից յուրաքանչյուրի վրա պետությունը մոտավորապես 200 000 ՀՀ դրամ գումար է ծախսում»,- նշեց պաշտպանը։ Նրա խոսքերով՝ պարզ հաշվարկի արդյունքում կտեսնենք, թե հարկատուների վճարած գումարից որքան գումար է ծախսվում և դեռ շարունակական ծախսվելու է՝ նրանց կալանքի տակ պահելու հետևանքով:

Պաշտպանը հարց է բարձրացնում՝ կալանքի վերցրած անձինք որքա՞ն գումարի վնաս են տվել պետությանը կամ հասարակությանը՝ ոչ մի լումայի, իսկ որքա՞ն են վնասվում նրանց ընտանիքի անդամներն այն պարագայում, երբ այս մարդիկ հանդիսանում են իրենց ընտանիքի միակ կերակրողները:

Անդրադառնալով քրեական գործին՝ պաշտպան Մկրտչյանը կարծիք հայտնեց, որ առնվազն սխալ էր Ժիրայր Սեֆիլյանի, Գևորգ Սաֆարյանի և մյուսների գործերը միացնել մեկ վարույթ, սրանք փոխկապակցված գործեր չէին: Գործով յուրաքանչյուրն իր պաշտպանական մարտավարություն է ընտրել, սակայն ըստ պաշտպանի՝ այստեղ պետք է փաստաբանները համախմբված աշխատեն և ընդհանուր շահ ունենան:

Պաշտպանի համոզմամբ՝ եթե ոչ Հայաստանում, ապա միջազգային դատարաններում մեղադրանքը փլվելու է, այս գործով բոլոր շանսերը կան։

Նշենք, որ գործով ամբաստանյալների մի մասի կողմից Հովհաննես Պետրոսյանը որպես դավաճան է ընկալվում, դատական նիստերի ժամանակ ևս նրա նկատմամբ ամբաստանյալներից ոմանց կողմից որոշակի հոգեբանական ճնշումներ են նկատվում։ Պաշտպանը կարծիք հայտնեց, որ այստեղ պետք չէ խոսել ռեժիմի մարդկանց, արհեստական դավաճանների մասին, բոլորին էլ կարելի է հայրենասեր քաղաքացիներ համարել, չգիտես ինչու, եթե Հովհաննես Պետրոսյանը ինքնախոստովանական ցուցմունքներ է տալիս, ապա դա դիտվում է, որ նա դավաճան է կամ ուղարկված մարդ է: Միգուցե նրա վրա հոգեբանական ճնշումներն են ավելի շա՞տ են եղել:

Հարցին, թե ում կողմից են ճնշումներ եղել, պաշտպանն ասաց՝ ճնշումներ եղել են և կան՝ իրավապահ մարմինների, վարույթն իրականացնող մարմնի կողմից, իսկ այսօր էլ՝ դատարանում: Պաշտպանը չշրջանցեց նաև ԶԼՄ-ներին և նրանց հրապարակումներին՝ կապված իր պաշտպանյալի հետ:

Միևնույն ժամանակ, խոսելով նախաքննության ընթացքում իր պաշտպանյալի նկատմամբ ենթադրյալ ճնշումների մասին՝ պաշտպանն ասաց, որ դա դեռ պետք է նաև ապացուցել, չէ՞ որ նրանք ցուցմունք ենք տվել տեսախցիկների առջև:

Ինչ վերաբերում է իր պաշտպանյալին առաջադրված մեղադրանքին, ապա պաշտպանը պնդում է, որ պետք է կասկածի տակ դնել այդ հանցագործությունը կատարելու հանգամանքը, այստեղ, ըստ նրա, հանցակազմ չկա, սակայն իր պաշտպանյալն այնքան է հուսահատվել, որ մտածում է միայն ավարտվի այս դժոխքը. «Եթե անգամ նոր մեղադրանք առաջադրեն, Քենեդիի սպանության համար ևս իրեն կմեղադրեն, ապա կընդունի, որովհետև այսպես էլ հնարավոր չէ», -ասել է նրա պաշտպանյալը:

«Եթե իրականում նպատակ ունենային այդ զենքերը ի վնաս ՀՀ քաղաքացիներին օգտագործելու, ապա հետ չէին վերադարձնի, այսօր մեղադրանքի կողմը հաստատված է համարում մի փաստ, որ Հրայրը զենքերը տվեց Հովհաննեսին, և նա էլ մեկ ուրիշի միջոցով վերադարձրել է զենքերը: Մյուս հայտարարությունները և պնդումները ոչնչով ապացուցված չեն»,- նշում է պաշտպանը և ավելացնում, որ այս ամենի համար նրանք կալանքի տակ են, սակայն այս տրամաբանությամբ առաջնորդվելու դեպքում բոլոր սահմանին եղած տղաներին, այդ թվում նաև իրեն, կարելի էր տարիներով կալանքի տակ պահել, քանի որ նրանք ևս տեսել են նման գործողություններ:

Արսեն Մկրտչյանը նաև ասաց, որ իր պաշտպանյալի մեկուսարանային պայմանները ավելի ծանր են, քան մյուս ամբաստանյալներինը, և դա ևս ապացուցում է, որ նա իշխանության մարդ չէ, նրա ընտանիքի վիճակն ավելի ծանր է, քան մյուսներինը:

Մարդը լրիվ հույսը կորցրել է:

«Ուզում ես դատարանի հանդեպ հարգալից եղիր, ոտքի կանգնիր…, բայց միևնույն է՝ Հովհաննես Պետրոսյանի նկատմամբ ուղիղ այն վերաբերմունքն է, ինչը, օրինակ, Գևորգ Սաֆարյանի նկատմամբ»,-ասաց փաստաբանը:

 Պաշտպանն անդրադարձավ նաև իր անձի վերաբերյալ հնչեցված մեղադրանքներին՝ նշելով, որ իր և իր ընտանիքի համար գործող և նախորդ իշխանությունները որևէ բան չեն արել և որպես քաղաքացի՝ որևէ առավելություն չունի, իշխանություններին քննադատել է ավելի շատ, քան իրենց ընդդիմադիր համարող քաղաքական գործիչները:

«Իմ նկատմամբ հնչեցվող մեղադրանքները, թե իշխանության կողմից ուղարկված փաստաբան է՝ առնվազն անհիմն է: Երբևիցե պետական կառավարման մարմինների կողմից արտոնություն չեմ ունեցել, հասարակ քաղաքացի եմ, և այդ մեղադրանքները տեղին չեն»,-ասաց փաստաբանը:

Աղբյուր` Փաստինֆո