Փաստ ինֆո

Մարաշի զինված խմբի գործով այսօր հետազոտված երեք հատոր նյութերի թվում էր օդանավակայանի մերձակայքում կատարված քննչական փորձարարության արձանագրությունը: Ըստ փորձարարության, Արևաշատ գյուղում ամբաստանյալ Հարություն Սարիբեկյանի տնից մինչև թռիչքուղին կազմում է 500-600 մ, գյուղից տեսանելի է թռիչքուղին և օդում թռչող ինքնաթիռը:

Փորձարարությունը կատարվել նախաքննության մի վարկածի հետ կապված, ըստ որի խմբի կողմից քննարկվել է թռիչքի պահին «Զվարթնոց» օդանավակայանի անմիջական հարևանությամբ գտնվող Արևաշատ գյուղի տարածքից ՀՀ նախագահի ինքնաթիռը
գնդացրով խոցելու հնարավորությունը, սակայն այդ ուղղությամբ կոնկրետ նախապատրաստական գործողություններ չեն կատարվել:

Գործով ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի պաշտպան Հայկ Ալումյանը հայտարարեց, որ քննչական փորձարարությունը կատարվում է ինչ-որ հանգամանքներ ու պարագաներ վերականգնելու նպատակով, մինչդեռ հիշատակվածն ավելի նման է տեղազննության: Ըստ պաշտպանի, փորձարարության «արդյունքների» մասին տարակուսանք հայտնող ամբաստանյալներն ավելի ճիշտ են, քան իրավաբանը:

Փաստաբան Հայկ Ալումյանը մի շարք նյութերի կապակցությամբ հանդես եկավ հայտարարություններով: Մասնավորապես, գործով նախագահող դատավոր Արմեն Բեկթաշյանը սույն գործի շրջանակում կալանավորման որոշում կայացնելիս և հանդես գալով իր անունից՝ հաստատված է համարել, որ ստեղծվել է հանցավոր համագործակցություն, որին անդամակցել են այս ու այն անձինք: Այդ դեպքում, ըստ փաստաբանի, ինչպե՞ս կարող է դատավորը օբյեկտիվ քննություն իրականացնել: Պաշտպանը նշեց, որ դրանից բխող միջնորդությունն ինքը կներկայացնի հետագայում:

Այլ նյութերի հետազոտումից հետո Հայկ Ալումյանը փաստեց. նյութերից երևում է, որ փաստաբան Լևոն Բաղդասարյանն իրականացրել է մեղադրյալներ Արթուր Վարդանյանի և Անտոն Դիկրան Թոթոնջյանի շահերի պաշտպանությունը՝ նրանց միջև առկա էական հակասությունների պայմաններում: Մեղադրյալները իրար դեմ ցուցմունքներ են տվել և եթե նրանց միջև առերեսում անցկացվեր, այդ դեպքում պաշտպանը ինչպե՞ս պետք է մասնակցեր առերեսմանը և ո՞ւմ կողմից, նշեց Հայկ Ալումյանը: Նա ընդգծեց, որ այդ պահից սկսած կատարված դատավարական գործողություններն ապօրինի են, իսկ ձեռք բերված ապացույցներն էլ՝ անթույլատրելի ճանաչվելու ենթակա:

Օրենքի խախտմամբ է եղել նաև մի շարք մեղադրյալների պաշտպան ունենալուց հրաժարումը՝ դա պետք է տեղի ունենար պաշտպանի ներկայությամբ: Ուստի դրանից հետո կատարված բոլոր գործողություններն ապօրինի են, ասաց նա:

Այսօրվա դատական նիստում բանավեճ առաջացավ ամբաստանյալ Արթուր Վարդանյանի (ով, ըստ մեղադրանքի, ստեղծել ու ղեկավարել է հանցավոր համագործակցությունը) և մեղադրող դատախազի միջև: Գործի նյութերում առկա լուսանկարը կատարվել էր ամբաստանյալի հոր գերեզմանի մոտ, սակայն դատախազը լուսանկարը նկարագրելով՝ հայտարարեց, որ լուսանկարը ինչ- որ անձնավորության՝ Շռամ Վալերիկի, գերեզմանի մոտ է արվել: Դրանից Ա.Վարդանյանը վրդովվեց ու հայտարարեց՝ ոչ թե ինչ-որ, այլ իմ հոր գերեզմանի մոտ, ամբողջը բացահայտե՞լ եք, դա չե՞ք բացահայտել, հայտարարեց ամբաստանյալը:

Դատարանը ամբաստանյալի վարքագծի պատճառով նրա նկատմամբ դատական նիստերի դահլիճից մեկ ժամով հեռացնելու դատական սանկցիա կիրառեց: Արթուր Վարդանյանը դահլիճից հեռանալիս ինչ-որ բան ասաց դատախազին, նա էլ հակադարձեց՝ ականջներդ կկտրեմ:

Այսօր տեղի տվեցին նաև ամբաստանյալ Էդվարդ Ներսիսյանի՝ Ապարի, նյարդերը: Նա մինչև դատական նիստի սկսվելը հայհոյանքներ, գոռգոռոց ուղղեց Արթուր Վարդանյանի ուղղությամբ: Անցենզուր արտահայտությունից զատ լսելի էր «կապիկլամիշ մի եղիր» արտահայտությունը: Ամբաստանյալի պաշտպան Կարմեն Պողոսյանը մեզ հետ զրույցում նշեց, որ 2015թ. օգոստոսին ստացած կաթվածից հետո իր պաշտպանյալի նյարդային համակարգը դեռևս գտնվում է վերականգնման փուլում: Բռնկումն էլ կապված է նրա հետ, որ օրերս տեղափոխվել է «Գրիգոր Լուսավորիչ» ԲԿ՝ հետազոտության համար, առողջական խնդրից ելնելով՝ նյարդերը չեն հերիքում:

Աղբյուր` Փաստինֆո