Փաստ ինֆո

14 անձի վերաբերյալ «Սասնա Ծռեր»-ի գործով այսօրվա դատական նիստը սկսվեց դատական սանկցիաների մասին դատարանի պարզաբանմամբ և ավարտվեց դատական սանկցիաների կիրառմամբ:

Մասնավորապես, դատական սանկցիաների ենթարկվեցին փաստաբաններ Տիգրան Եգորյանը և Մուշեղ Շուշանյանը: Դատարանը խորհրդակցական սենյակում նրանց վերաբերյալ որոշումներ կայացրեց պատասխանատվության ենթարկելու դիմումով Փաստաբանների պալատին դիմելու մասին:

Դատական նիստերի դահլիճից վեց ժամով հեռացված ամբաստանյալ Գագիկ Եղիազարյանի պաշտպան Տիգրան Եգորյանը դիմել էր դատարանին՝ տեղեկացնելով, որ անհնար ու անարդյունավետ է իր պաշտպանյալի բացակայության պայմաններում իրականացնել նրա պաշտպանությունը, ուստի չի կարող մասնակցել դատական նիստին: Պաշտպանը միաժամանակ նշել էր, որ իր պաշտպանյալի նկատմամբ կիրառված դատական սանկցիան չի համապատասխանում համաչափության սկզբունքին և չի բխում արդարադատության շահերից:

Դատարանն արձանագրեց, որ փաստաբանն իրավունք չունի առանց նախագահողի թույլտվության լքել դատարանի դահլիճը:

Մուշեղ Շուշանյանի պաշտպանյալ Վարուժան Ավետիսյանը նախ հեռացվեց դատական նիստերի դահլիճից, սակայն հեռացման որևէ ժամկետ չնշվեց, ապա նիստի վերսկսվելուց հետո դատարանը ամբաստանյալին վերադարձրեց դահլիճ և նրա նկատմամբ կիրառեց դատական սանկցիա՝ նախազգուշացում, պարզաբանելով, որ եթե նա ևս մեկ անգամ խոչընդոտի դատական նիստին, կհեռացվի դատական նիստերի դահլիճից: Իսկ նրա պաշտպանի նկատմամբ հիշյալ դատական սանկցիայի կիրառումը դատարանը պատճառաբանեց, որ պաշտպանն առանց որևէ պատճառաբանության լքել է դատարանի դահլիճը, այսինքն՝ անհարգալից վերաբերմունք է դրսևորել դատարանի հանդեպ:

Դատական սանկցիաների շղթան այսպիսով չավարտվեց՝ վեց ժամով դատական նիստերի դահլիճից հեռացվեց ամբաստանյալ Արայիկ Խանդոյանը, ինչպես նաև կարգադրիչների զեկուցագրերի հիման վրա երկու քաղաքացի նախազգուշացվեց, իսկ մեկի նկատմամբ որոշվեց նրան հեռացնել դատական նիստերի դահլիճից՝ մինչև դատական քննության ավարտը:

Փաստաբան Ինեսսա Պետրոսյանը հայտարարեց, որ դատարանի կողմից թույլ են տրվում դատավարական խախտումներ: Ըստ նրա, դատարանը չպետք է դատական սանկցիա կիրառեր փաստաբանների վերաբերյալ՝ առանց կողմերի կարծիքն իմանալու: Պաշտպանը նաև դժգոհություն հայտնեց այն կապակցությամբ, որ դատական նիստն ընթանում է ամբաստանյալ Սմբատ Բարսեղյանի միակ պաշտպան, փաստաբան Հայկ Ալումյանի բացակայությամբ, ինչի պարագայում դատարանի բոլոր գործողությունները չեն բխում քրեական դատավարության օրենսդրության պահանջներից:

Դատարանը, սակայն, գտավ, որ փաստաբանի նկատմամբ սանկցիա կիրառելու որոշում կայացնելու համար կողմերի կարծիքը լսելու անհրաժեշտություն չկա: Դատարանը խախտում չտեսավ նաև փաստաբան Հայկ Ալումյանի բացակայությամբ նիստն անցկացնելու մեջ՝ դատավարությունը գտնվում է նախապատրաստական փուլում, և նիստը շարունակելով՝ չեն կարող ոտնահարվել ամբաստանյալի իրավունքները: Նշենք, որ դատարանը մինչ այդ հարց էր ուղղել պաշտպանական կողմին՝ կա՞ն, արդյոք, դատարանին ինքնաբացարկի միջնորդություններ: Հայկ Ալումյանը բացակայելով դատական նիստից չէր կարող այդ հարցին պատասխանել կամ միջնորդություն ներկայացնել:

Ի դեպ, Հայկ Ալումյանը «Փաստինֆո»-ի հետ զրույցում հայտնեց, որ դատարանի՝ իրեն ուղարկված ծանուցման մեջ նշվում էր, որ գործը քննվում է Երևանի Ավան և Նոր Նորք վարչական շրջանների դատարանում, ուստի ինքը դիմումով հարցեր է ուղղել դատարանին՝ արդյոք գործի քննության ընդդատությունը փոխվե՞լ է, եթե այո՝ ինչո՞ւ է նիստի մասին իրեն ծանուցում Էրեբունի և Նուբարաշեն վարչական շրջանների դատարանը: Նշենք, որ վերջինիս կողմից քննվող գործով դատական նիստերն ընթանում են Երևանի Ավան և Նոր Նորք վարչական շրջանների դատարանի շենքում:

Այսօր էլ դահլիճից վանկարկումներ էին հնչում՝ «Մահ ռեժիմին», «Սասնա Ծռեր», երկրի ղեկավարի հասցեին հնչեց դատական ցենզուրայից դուրս արտահայտություն, իսկ երբ նախագահող դատավորը այդ կապակցությամբ դիտողություն արեց այն հնչեցրած ամբաստանյալ Պավել Մանուկյանին, նա արձագանքեց՝ խորհրդարանում ընդունված բառ է: «Մենք խորհրդարան չունենք, սա դատարան է»,- իր հերթին արձագանքեց դատարանը:

Հունիսի 28-ին դատական կրքերը կշարունակվեն:

Աղբյուր` Փաստինֆո