Փաստ ինֆո

Այսօր Երևանի Ավան և Նոր-Նորք վարչական շրջանների ընդհանուր իրավասության դատարանում շարունակվեց գնդապետ Զարմիկ Մարկոսյանի գործի քննությունը, և հարցաքննվեց երկու վկա:

Վկա Հովհաննես Պետրոսյանն իր ցուցմունքում նշեց, որ գնդապետ Զարմիկ Մարկոսյանի որդի Գնել Թևոսյանը հաճախակի՝ շաբաթ-կիրակի օրերին, զորամասում չի եղել, մարտկոցում մաքրություն կատարելիս նա այնտեղ չի եղել, վկան նրան չի տեսել: Իսկ աշխատանքային օրերն Գնել Թևոսյանը զորամասի տարածքից դուրս եկել է, թե՝ ոչ, վկան հայտնեց, որ չի նկատել:

Ինչ վերաբերում է Գնել Թևոսյանի համազգեստի տարբերությանը, ապա վկան պնդեց, որ նրա համազգեստը տարբերվել է մյուսների համազգեստից՝ տաբատը ձևափոխված է եղել, նեղացված: Բացի այդ, նա սպիտակեղենը զորամասում չի լվացել, այլ տուն է տարել և տանը լվացել ու բերել:

Ամբաստանյալ Զարմիկ Մարկոսյանի պաշտպան Արա Զաքարյանի հարցին էլ, թե զորամասում այլ զինծառայողներ եղե՞լ են, որոնց հագուստները ևս ձևափոխված է եղել, վկան դրական պատասխան տվեց, սակայն դժվարացավ նշել, թե քանիս են եղել:

Ըստ վկայի՝ Գնելը շաբաթ օրը զորամասը լքել է և կիրակի անվանականչին վերադարձել, իսկ թե ի՞նչ նշում է կատարվել անվանականչի մատյանում, վկան հայտնեց, որ սովորաբար նշվում է Ա.Ա., ինչը նշանակում է ազատ արձակում, իսկ Գնելի պարագայում թե ի՞նչ է նշվել, ինքը տեղյակ չէ:

Վկա կուրսանտը պնդեց, որ մի քանի անգամ ինքն անձամբ է տեսել, թե ինչպես է Գնելը դուրս գալիս զորամասից, անգամ իր հայրիկի մեքենայով: Վկայի ցուցմունքներում առկա էական հակասություններով պայմանավորված՝ հրապարակվեց նրա նախաքննական ցուցմունքը, ըստ որի՝ Գնելը նաև աշխատանքային օրերին է դուրս եկել զորամասից:

Վկան նախաքննության ժամանակ հայտնել էր, որ Գնելը զորամասը լքել է իրենց սեփական «Նիսան» մակնիշի ավտոմեքենայով, տեսել է նաև, որ վերադարձել է զորամաս երկուշաբթի օրն առավոտյան՝ կրկին իրենց սեփական մեքենայով, կողքին էլ Գնելի եղբայրն է նստած եղել:

Ըստ նախաքննական ցուցմունքի՝ Գնելի բացակայության մասին տեղյակ է եղել և՛ դասակի հրամանատարը, և՛ զորամասի պատասխանատուն, սակայն ոչ ոք ոչինչ չէր կարող ասել, քանի որ հայրը՝ գնդապետ Զարմիկ Մարկոսյանը, տեղյակ է եղել:

Գնել Թևոսյանը գնդապետ «պապայի» շնորհիվ արտոնություններ է ունեցել եւ լքել զորամասի տարածքը

Նախաքննական ցուցմունքի հրապարակումից հետո վկան վերհիշեց նաև, որ Գնելը նաև աշխատանքային օրերն է զորամասը լքել:

Ինչ վերաբերում է նրան, որ Գնելն առանց ազատման թերթիկի է դուրս եկել զորամասից՝ վկան հայտնեց, որ այդ մասին ինքը մեկ անգամ հարցրել է Գնելին, վերջինս էլ ասել է, որ առանց ազատման թերթիկի է դուրս եկել:

Հաջորդիվ հարցաքննվեց վկա Կարեն Բաղրամյանը, ով մեկ այլ գործով մեղադրյալի կարգավիճակ ունի: Վկան հայտնեց, որ կուրսանտներին ազատ արձակման թերթիկ տրվում է անհրաժեշտության դեպքում, այն էլ՝ միայն շաբաթ և կիրակի օրերին, իսկ առաջին կուրսեցիներին այն տրվում է միայն կիրակի օրվա համար:

Սակայն Գնելը շաբաթ օրերին ճաշարան գնալուց հետո՝ ժամը 15.00-ից, զորամասը լքել է և վերադարձել միայն կիրակի օրը, իսկ ունեցե՞լ է արդյոք ազատման թերթիկ, դա իրեն չի հետաքրքրել. «Թե ում հովանավորչությամբ, ինչ… դա ինձ չի հետաքրքրել»,- ասաց վկան:

Վկան հայտնեց, որ աշխատանքային օրերին Գնելը զորամասից դուրս է եկել մի քանի ժամով, իսկ մնացած դեպքերում յուրաքանչյուր շաբաթ կիրակի դուրս է եկել և միայն վերակարգի օրերին դուրս չի եկել զորամասից:

Միևնույն ժամանա պնդեց, որ առանց ազատման թերթիկի չեն կարող դուրս գալ զորամասի ՀԱԿ-ից:

Ըստ վկայի՝ Գնելն «աչքի ընկնող» էր, իսկ թե ինչով է նա դա բացատրում, ասաց՝ գիտեին, թե ում որդին է:

Ըստ մեղադրանքի՝ Զարմիկ Մարկոսյանը, անձնական շահագրգռվածությունից ելնելով, որդու՝ Գնել Թևոսյանի՝ ինստիտուտում սովորելու համար արտոնյալ պայմաններ ստեղծելու նպատակով, պատասխանատու լինելով անձնակազմի զինվորական կարգապահության համար, զբաղվել է որդու հովանավորչությամբ:

Չարաշահելով պաշտոնեական դիրքը՝ 2014թ. օգոստոս ամսից մինչև 2015թ հունվարի 28-ը ներառյալ հանձնարարել է ենթակա սպաներին պարբերաբար, առանց համապատասխան փաստաթղթային ձևակերպման, Գ.Թևոսյանին մի քանի ժամ տևողությամբ ազատել ծառայողական պարտականությունները կատարելուց և թույլատրել բացակայել զորամասի տարածքից:

Գնդապետ հայրը ջանք ու եռանդ չի խնայել, որպեսզի որդին զինակից ընկերների նկատմամբ իրեն արտոնյալ համարի, այնինչ Զարմիկ Մարկոսյանի կողմից պաշտոնեական դիրքը չարաշահելու հետևանքով Թևոսյանը համածառայողների շրջանում ստացել է արհեստական առավելություն, ինչով մարտկոցի զինծառայողների շրջանում խաթարվել է բարոյահոգեբանական մթնոլորտը և ստեղծվել է անհավասարության զգացում:

Զարմիկ Մարկոսյանին մեղադրանք է առաջադրվել ՀՀ քրեական օրենսգրքի 375-րդ հոդվածի 1-ին մասով:

Աղբյուր` Փաստինֆո