Փաստ ինֆո

Երևանի Ավան և Նոր-Նորք վարչական շրջանների ընդհանուր իրավասության դատարանում այսօր կայացավ ՀՀ ՊՆ Վազգեն Սարգսյանի անվան ռազմական ինստիտուտի հրամանատարի նախկին տեղակալ Զարմիկ Մարկոսյանի կողմից որդու՝ Գնել Թևոսյանի համար արտոնյալ պայմաններ ստեղծելու գործով առաջին դատական նիստը:

Ինչպես ավելի վաղ տեղեկացրել էինք, Զարմիկ Մարկոսյանը ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվողներից մեկի՝ Գնել Թևոսյանի հայրն է:

Դատարանը տեղեկացրեց, որ թեև դատաքննությունը նշանակվել էր ավելի վաղ, սակայն դատական նիստեր տեղի չի ունեցել ամբաստանյալի չներկայանալու պատճառով, վերջինս իր այս բացակայությունները պատճառաբանեց նրանով, որ առողջական խնդիրներ է ունեցել, իսկ նախորդ դատական նիստին չի ներկայացել, քանի որ մասնակցել է ազգականի հուղարկավորությանը:

Մինչև դատաքննությունը սկսվելն ամբաստանյալի պաշտպան Արա Զաքարյանը հանդես եկավ իր պաշտպանյալի նկատմամբ քրեական հետապնդումը դադարեցնելու վերաբերյալ միջնորդությամբ:

Պաշտպանը միջնորդությունը հիմնավորեց նրանով, որ Հայկազ Բարսեղյանի մահվան դեպքի կապակցությամբ ՀՀ Պնախարարության կողմից կատարվել է ծառայողական քննություն, որի ընթացքում հայտնաբերվել է մի շարք զինծառայողների կողմից այդ թվում նաև Զարմիկ Մարկոսյանի կողմից խախտումներ, չարաշահումներ և պաշտպանության նախարարի՝ 2015թ. փետրվարի 5-ի հրամանով Զարմիկ Մարկոսյանը արձակվել է պահեստազոր՝ զինվորական ծառայության պայմանները չկատարելու կամ զինծառայողի անունը արատավորելու հիմքով: Ըստ պաշտպանի՝ այլ կերպ ասած՝ իր պաշտպանյալը ենթարկվել է ամենախիստ պատժի:

Նշված հրամանի հիմքով՝ Զարմիկ Մարկոսյանը զրկվել է նաև զինծառայողներին և նրա ընտանիքի անդամների համար նախատեսված դրամական օգնություն ստանալու հնարավորությունից, որի չափը կազմում է 1 280 000 ՀՀ դրամ:

Այսպիսով, Արա Զաքարյանը գտնում է, որ իր պաշտպանյալի նկատմամբ իրականացված քրեական հետապնդումը ենթակա է դադարեցման, քանի որ, ըստ էության, Զ.Մարկոսյանի նկատմամբ առկա է միջազգային պայմանագրերի չափորոշիչների համաձայն վերջնական պատիժ, որի պայմաններում նա չի կարող իր գործողությունների համար կրկին ենթարկվել քրեական հետապնդման:

Մեղադրող դատախազ Հայկ Հարոյանը, պաշտպանի միջնորդության վերաբերյալ կարծիք հայտնելով, նշեց, որ այն ժամանակավրեպ է, և մինչև չհետազոտվեն քրեական գործով ապացույցները, պաշտպանության նախարարի  հրամանը, չենք կարող ասել, որ Զարմիկ Մարկոսյանը նույն արարքի համար է ենթարկվել կարգապահական պատասխանատվության՝ աշխատանքից ազատվելու տեսքով:

Բացի այդ, Վազգեն Սարգսյանի անվան ռազմական ինստիտուտի պետի կողմից ստացված գրությունից պարզ է դառնում, որ Մարկոսյանը խախտել է ՊՆ-ի հետ ունեցած պայմանագիրը և այս հանգամանքը ևս հետազոտության առարկա դարձնելու համար, ըստ մեղադրողի, նախ պետք է կատարվի գործի բազմակողմանի և օբյեկտիվ քննություն, որից հետո միայն հնարվոր կլինի միջնորդության վերաբերյալ դիրքորոշում հայտնել:

Դատարանը միջնորդությունը թողեց առանց քննության՝ այս փուլում միջնորդությունը ներկայացնողի՝ պաշտպան Արա Զաքարյանի կողմից դրանից հրաժարվելու հիմքով:

Գործով դատաքննությունն սկսվելուց հետո մեղադրող դատախազը հրապարակեց մեղադրական եզրակացության եզրափակիչ մասը, ըստ որի՝ ՀՀ ՊՆ N զորամասի հրամանատարի նյութատեխնիկական ապահովման գծով տեղակալ, կոչումով գնդապետ Զարմիկ Մարկոսյանը, անձնական շահագրգռվածությունից ելնելով, որդու՝ Գնել Թևոսյանի՝ ինստիտուտում սովորելու համար արտոնյալ պայմաններ ստեղծելու նպատակով, պատասխանատու լինելով անձնակազմի զինվորական կարգապահության համար, զբաղվել է որդու հովանավորչությամբ:

Չարաշահելով պաշտոնեական դիրքը՝ 2014թ. օգոստոս ամսից մինչև 2015թ հունվարի 28-ը ներառյալ հանձնարարել է ենթակա սպաներին պարբերաբար, առանց համապատասխան փաստաթղթային ձևակերպման, Գ.Թևոսյանին մի քանի ժամ տևողությամբ ազատել ծառայողական պարտականությունները կատարելուց և թույլատրել բացակայել զորամասի տարածքից:
Գնդապետ հայրը ջանք ու եռանդ չի խնայել, որպեսզի որդին զինակից ընկերների նկատմամբ իրեն արտոնյալ համարի, այնինչ Զարմիկ Մարկոսյանի կողմից պաշտոնեական դիրքը չարաշահելու հետևանքով Թևոսյանը համածառայողների շրջանում ստացել է արհեստական առավելություն, ինչով մարտկոցի զինծառայողների շրջանում խաթարվել է բարոյահոգեբանական մթնոլորտը և ստեղծվել է անհավասարության զգացում:

Զարմիկ Մարկոսյանին մեղադրանք է առաջադրվել ՀՀ քրեական օրենսգրքի 375-րդ հոդվածի 1-ին մասով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Ամբաստանյալն առաջադրված մեղադրանքի վերաբերյալ չշտապեց դիրքորոշում հայտնել, իսկ վերջինիս պաշտպանը նշեց, որ մեղադրանքի որոշ ձևակերպումներ իրենց համար ոչ հստակ են ու անհասկանալի այն առումով, որ դեպքերի նկարագրության հստակություն չի պարունակում, կոնկրետություն չկա՝ քանի անգամ է Գնել Թևոսյանը բացակայել զորամասից և երբ, եթե սպաների միջոցով է դա կազմակերպվել, ապա ովքեր են նրանք: Այս կապակցությամբ մեղադրողը նշեց, որ պաշտպանական կողմի մոտ առկա է անհամաձայնություններ մեղադրանքի որոշ ձևակերպումների հետ, իսկ այդ հարցերի պատասխանները նրանք կարող են ստանալ դատաքննության ընթացքում:

Դատարանը՝ Դավիթ Հարությունյանի նախագահությամբ, սահմանեց ապացույցների հետազոտման հաջորդականության կարգ, ըստ որի՝ նախ կհետազոտվեն գործի նյութերը, ապա կհարցաքննվեն վկաները, իսկ վերջում կհարցաքննվի ամբաստանյալը:

Այսօրվա դատական նիստում հետազոտվեցին գործի նյութերը, որի ավարտին դատարանը կողմերին տեղեկացրեց, որ դատակոչված վկաներից մի մասն այս պահին մարտական ծառայության մեջ են գտնվում:

Հաջորդ դատական նիստում կհարցաքննվեն վկաները:

Աղբյուր` Փաստինֆո