Փաստ ինֆո

Քննչական կոմիտեի լրատվական ծառայության հաղորդմամբ՝ Շենգավիթում 37-ամյա կնոջ մահվան դեպքի առթիվ ՀՀ քննչական կոմիտեի Շենգավիթ վարչական շրջանի քննչական բաժնում քննվող քրեական գործով պարզվել են դանակի գործադրմամբ նրան ծանր մարմնական վնասվածք պատճառելու հանգամանքները, շարժառիթը։

Ավելի վաղ ՔԿ-ն տեղեկացրել էր, որ նոյեմբերի 25-ին՝ ժամը 14.20-ին, հաղորդում է ստացվել առ այն, որ Շենգավիթ վարչական շրջանի տներից մեկում հայտնաբերվել է 1979թ. ծնված Ա.Մաղաքյանի դիակը՝ աջ ազդրի կտրած-ծակած վերքով:

Դեպքի առթիվ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 2-րդ մասի 14-րդ կետի հատկանիշներով և կատարվել մեծածավալ քննչական գործողություններ՝ առերևույթ հանցագործություն կատարած անձի ինքնությունը, շարժառիթը պարզելու ոււղությամբ:

Նախնական քննությամբ պարզվել է, որ տուժողն իր ժամանակավոր բնակության վայրում մասնավոր կյանքին վերաբերող հարցերի շուրջ վիճաբանել է նույն տանը ժամանակավորապես բնակվող տղամարդու հետ, որի ժամանակ վերջինս սուր ծակող-կտրող գործիքով հարվածել է կնոջ աջ ազդրի վերին երրորդի առաջային մակերեսին` Ա.Մաղաքյանի առողջությանը պատճառելով մարմնական վնասվածք՝ աջ ազդրի վերին երրորդի առաջային մակերեսի երկայնակի ծակած-կտրած վերքի ձևով: Ստացած վնասվածքի հետևանքով կինը մահացել է:

Կատարվել է դեպքի վայրի զննություն, նշանակվել են դիակի դատաբժշկական, դատակենսաբանական, դատամատնադրոշմային փորձաքննություններ:

Ձեռք բերված ապացույցների հիման վրա՝ տղամարդուն մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 14-րդ կետի հատկանիշներով, նրա նկատմամբ որպես խափանման միջոց է ընտրվել կալանավորումը:

Նախաքննությունը շարունակվում է:

Աղբյուր` Փաստինֆո