Փաստ ինֆո

Հոկտեմբերի 18-ին Երևան-Սևան ավտոճանապարհին տեղի ունեցած ավտովթարի դեպքով, որի ժամանակ մահացել էր 18-ամյա ուսանողուհի,  «Մերսեդես-Սպրինտեր» մակնիշի մեքենայի վարորդ Գագիկ Ստեփանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 2-րդ մասով: «Փաստինֆո»-ի հարցման ի պատասխան այդ մասին հայտնեցին Քննչական կոմիտեից:

Հաշվի առնելով վարորդի առողջական վիճակը՝ նրա նկատմամբ որպես խափանման միջոց է ընտրվել չհեռանալու մասին ստորագրությունը:

Ավելի վաղ տեղեկացրել էինք, որ վթարի հետևանքով 18-ամյա ուսանողուհի Հռիփսիմե Գասպարյանը մահացել է, ևս 9 անձ՝ տարբեր աստիճանի մարմնական վնասվածքներ են ստացել:
Վթարի հետևանքով բազմաթիվ վնասվածքներ է ստացել նաև մեքենայի վարորդը՝ Գագիկ Ստեփանյանը՝ նա կոտրվածներ է ստացել կողերի հատվածում, ողնաշարի ճաքեր ունի, ինչպես նաև վնասվածքներ ունի գլխի շրջանում:

Մեր տեղեկություններով՝ վարորդը սոցիալական խնդիրներից ելնելով բուժումը շարունակում է տանը և գամված է անկողնուն:

Հիշեցնենք, որ վթարի օրը վարորդը ժամը 07.30–ի սահմաններում Վարսեր գյուղից վերցնելով 8 ուսանող շարժվել է դեպի Երևան։ Մինչև Հրազդան քաղաքի հարող հատվածները եղել են լավ, ճանապարհները մաքրված, իսկ Հրազդանի մոտից արդեն՝ ոչ. ձյուն է տեղացել, ճանապարհներն էլ մաքրված չեն եղել։

«Փաստինֆո»-ի տեղեկություններով վարորդը մեքենան վարել է բավական դանդաղ, առավել ևս երբ անվադողերը եղել են հնամաշ։ Տարիների փորձառություն ունեցող վարորդը չի կարողացել կառավարել մեքենան, այն ընկել է սահքի մեջ ու տեղի է ունեցել երիտասարդ աղջկա մահվան պատճառ դարձած վթարը։

Աղբյուր` Փաստինֆո