Փաստ ինֆո

Տուժող կողմը կասկածներ ունի, որ ենթադրյալ մեղավորը կամ մեղավորները կարող են ունենալ ազդեցիկ հովանավոր կամ հովանավորներ, այդ թվում՝ զինված ուժերում բարձրաստիճան սպաների տեսքով, ովքեր անում են հնարավորը կամ ցուցաբերում շահագրգռվածություն Մխիթարյանի մահվան իրական հանգամանքները չբացահայտելու համար:

ՀՀ ՊՆ զորամասերից մեկի մարտական հենակետում ծնոտի շրջանում մահացու հրազենային վնասվածքով հայտնաբերված պարտադիր ժամկետային զինծառայող 19-ամյա Արսեն Արթուրի Մխիթարյանի մահվան գործով տուժող կողմը անվստահություն է հայտնում վարույթն իրականացնող մարմնին:

Տուժողի իրավահաջորդի՝ մահացած զինծառայողի հոր՝ Արթուրի Մխիթարյանի ներկայացուցիչ Նորայր Նորիկյանը գտնում է, որ Արսեն Մխիթարյանի մահվան գործում կան մեղավորներ, որոնք մինչ օրս պատասխանատվության չեն ենթարկվում:

Այսպես, հուլիսի 3-ին՝ Տավուշի մարզում տեղակայված ՀՀ ՊՆ զորամասերից մեկի մարտական հենակետում, Արսեն Մխիթարյանը հայտնաբերվում է ծնոտի շրջանում մահացու հրազենային վնասվածքով, հարուցվում է քրեական գործ՝ ՀՀ քրեական օրենսգրքի 110-րդ հոդվածով՝ ինքնասպանության հասնելը:

Հաշվի առնելով գործի բարդությունը՝ որոշում է կայացվում քննչական խումբ ձևավորել՝ որում ընդգրկվում են 5 քննիչներ:

Փաստաբան Նորայր Նորիկյանը գործին ներգրավվելուց հետո այցելում է դեպքի վայր, ողբերգական դեպքի օրը այնտեղ գտնվող զինծառայողների հետ զրուցելու արդյունքում պարզում՝ մահվանը նախորդող ժամանակահատվածում Արսեն Մխիթարյանն ունեցել է լուրջ հոգեբանական խնդիրներ, ինչպես նաև՝ վեճ, ու որոշակի խնդիրներ են եղել զինակից ընկերների հետ:

Ինչպես փաստաբանը նշեց, այս մասին տուժող կողմը իրազեկել է վարույթ իրականացնող մարմնին՝ միջնորդելով ձեռնարկել համապատասխան քայլեր, սակայն ամիսներ են անցել և ոչ մի արձագանք:

Նկատի ունենալով, որ որևէ արդյունք չկա, տուժող կողմը դեռևս ամիսներ առաջ ՀՀ գլխավոր դատախազի պաշտոնակատարին, ինչպես նաև ՀՀ զինվորական դատախազին միջնորդություն է ներկայացրել՝ գործով քննչական խմբին բացարկ հայտնելու վերաբերյալ՝ միևնույն ժամանակ միջնորդելով գործի հետագա քննությունը տեղափոխել ՀՀ Քննչական կոմիտեի զինվորական քննչական գլխավոր վարչության հատկապես կարևորագույն գործերի քննության վարչություն:

Բացարկի վերաբերյալ միջնորդությունը մերժվել է, իսկ գործը ՀՀ ՔԿ ԶՔԳՎ հատկապես կարևորագույն գործերի քննության վարչություն տեղափոխելու վերաբերյալ մինչ օրս տուժող կողմը պատասխան չի ստացել:

Այսպիսով, տուժող կողմը հանգել է հետևության, որ Արսեն Մխիթարյանի մահվան գործում կան մեղավորներ, այդ մեղավորները մինչ օրս հայտնաբերված չեն, ավելին՝ տուժող կողմը կասկածներ ունի, որ ենթադրյալ մեղավորը կամ մեղավորները կարող են ունենալ ազդեցիկ հովանավոր կամ հովանավորներ, այդ թվում՝ զինված ուժերում բարձրաստիճան սպաների տեսքով, ովքեր անում են հնարավորը կամ ցուցաբերում շահագրգռվածություն՝ Մխիթարյանի մահվան իրական հանգամանքները չբացահայտելու համար:

Թե ի՞նչ փորձաքննությունն է նշանակվել վարույթն իրականացնող մարմնի կողմից «Փաստինֆո»-ի հարցին ի պատասխան՝ Նորայր Նորիկյանը նշեց. «Բազմաթիվ փորձաքննություններ են նշանակվել, այդ թվում՝ դիակի դատաբժշկական, դատահետքաբանական և դատամատնադրոշմային, դատաձգաբանական, սակայն դեռևս դատահոգեբանական փորձաքննություն չի նշանակվել»:

Փաստաբանը ենթադրվում է, որ այդ միջնորդությամբ իրենք առաջիկայում հանդես կգան կամ վարույթն իրականացնող մարմինը սեփական նախաձեռնությամբ կնշանակի:

Ինչ վերաբերում է դատաբժշկական փորձաքննությանը, ապա փաստաբանը նշեց, որ այդ փորձաքննության եզրակացությունն ստացվել է, սակայն դրանց արդյունքների մասին խոսելուց ձեռնպահ մնալով՝ Նորիկյանը միայն հավելեց, որ մի քանի առանցքային դետալներ, որոնք մտորելու տեղիք են տալիս, խոսելու են այն մասին, որ Մխիթարյանի գործում խութերն ու հանելուկները շատ են:

Իսկ թե ի՞նչն է եղել զինծառայողների միջև վիճաբանության պատճառը, այն, ինչ հաջողվել է տուժող կողմին պարզել, այդ մասին ևս իրազեկվել է վարույթն իրականացնող մարմինը:

Տուժողի իրավահաջորդի ներկայացուցիչը նշեց նաև, որ Արսեն Մխիթարյանը մյուս զինծառայողներից տարբերվել է իր ինտելեկտով և զսպվածությամբ, իսկ ծառայության մեկ տարվա ընթացքում որևէ անձի հետ խնդիր չի ունեցել:

Միևնույն ժամանակ փաստաբանը հայտնեց, որ դեպքի նախորդող օրերին Արսենն ընտանիքի անդամների հետ հեռախոսազրույց է ունեցել, որի ձայնագրությունը ևս առկա է, և դրա բովանդակության վերաբերյալ ևս վարույթն իրականացնող մարմինը իրազեկվել է:

Իսկ թե արդյոք Արսեն Մխիթարյանին ամրակցված զենքի՞ց է կրակոցը արձակվել, թե՞ կիրառվել է այլ զենք հարցերի պատասխանները տուժող կողմը դեռ չունի:

Տուժողի իրավահաջորդի ներկայացուցիչը նշեց նաև, որ այսօր գրավոր դիմելու է ՀՀ գխավոր դատախազ Արթուր Դավթյանին հորդորով՝ հաշվի առնելով գործի բնությունը և վարույթն իրականացնող մարմնի նկատմամաբ տուժող կողմի ծագած անվստահությունը՝ համապատասխան ցուցում տալ քրեական գործի հետագա քննությունը հանձնարարել ՀՀ ԶՔԳՎ հատկապես կարևորագույն գործերի վարչությանը, իսկ եթե, այդուհանդերձ, գործի քննությունը կշարունակի մնալ նշված մարմնի վարույթում, տուժող կողմը հորդորում է նորանշանակ Գլխավոր դատախազին՝ իր իրավասությունների շրջանակներում կարգի հրավիրել նշված քրեական գործով նախաքննությունը վարող քննչական խմբի նկատմամբ՝ սկսած օբյեկտիվ բազմակողմանի քննություն վարելուց վերջացրած տուժող կողմի նկատմամբ նորմալ մարդկային բարոյական վարքագծ դրսևորելով:

Տուժող կողմի հաջորդ գրությունն ուղղված է լինելու ՀՀ Քննչական կոմիտեի նախագահին՝ իրականացնել իրենց իրավասություններից բխող բոլոր գործառույթները՝ ապահովվելու համար սույն քրեական գործով օբյեկտիվ, բազմակողմանի և լրիվ քննություն, կատարված հանցագործության ամբողջական շղթան բացահայտելու և հնարավոր մեղավոր բոլոր անձանց քրեական հետապնդման ենթարկելու համար:

Տուժող կողմի երրորդ գրությունն ուղարկվել է նորանշանակ Պաշտպանության նախարարին՝ իր ենթակայությամբ գտնվող բոլոր ստորաբաժանումներին, իրենց իրավասությունների շրջանակներում պարզելու, թե, առհասարակ, նշված ժամանակահատվածում ինչպիսի՞ բարոյահոգեբանական վիճակ է տիրել նշված զորամասում, ովքե՞ր են պատասխանատու եղել այդ բարոյահոգեբանական վիճակի և տիրող մթնոլորտի համար, ովքե՞ր են ենթարկվել կարգապահական պատասխանատվության, իսկ եթե չեն ենթարկվել, ի՞նչ պատճառաբանությամբ:

Միաժամանակ տուժող կողմը հորդորում է ՊՆախարարին, հետագա ողբերություններից խուսափելու համար, հետամուտ լինել՝ այս գործի բոլոր հանգամանքները բացահայտելու ուղղությամբ և պատասխանատվության ենթարկել բոլոր նրանց, ում արարքներում թեև բացակայում է քրեաիրավական հանցակազմը, սակայն նրանց անգործության արդյունքում գրանցվել է այս ողբերգությունը:

Փաստաբանը նաև նշեց, որ այսօր պատրաստվում է գրություն ուղարկել՝ ՀՀ գլխավոր դատախազին, Քննչական կոմիտեի նախագահին և ՊՆախարարին՝ նշելով կասկածի արդյունքում առաջացած և ծնված բոլոր մտահոգությունները, այդ թվում նաև՝ այն բարձրաստիճան զինվորականի անունը, որը որոշակի պայմաններում նշված քրեական գործի ընթացքի վերաբերյալ ցուցաբերում է որոշակի շահագրգռվածություն՝ հնարավոր մեղավոր անձի քրեական պատասխանատվությունից խուսափելու հարցում:

Նշենք, որ Արսենը ծնվել էր 1999թ., եղել է իրենց տան միակ արու զավակը, սովորել է բժշկական համալսարանի երկրորդ կուրսում:

Արսենի ծնողները և հարազատները բացառում են, որ նա կարող էր այդպիսի քայլի դիմել:

Աղբյուր` Փաստինֆո