Փաստ ինֆո

Այսօր դատարանում հետաձգվեց ընդդեմ Գլխավոր դատախազի պաշտոնակատարի ու երկու դատախազների «Սասնա Ծռեր»-ի գործով մեղադրյալ Կարո Եղնուկյանի պաշտպան Տիգրան Հայրապետյանի բողոքի քննությունը: Դատական նիստին չէին  ներկայացել դատախազները:

Ըստ պաշտպանի, իր պաշտպանյալի վերաբերյալ որոշումներ կայացնելիս Գլխավոր դատախազի պաշտոնակատար Արմեն Հարությունյանը և դատախազներ Փանոսյանն ու Մինասյանն անգործություն են դրսևորել:

Դատարանը հաջորդ դատական նիստին կապահովի Գլխավոր դատախազի պաշտոնակատարի կողմից լիազորված դատախազի, ինչպես նաև հիշյալ երկու դատախազների ներկայությունը: Դատարանը հիմնավոր համարեց հաջորդ դատական նիստում  նաև Կ.Եղնուկյանի ներկայությունը ապահովելու մասին Տ.Հայրապետյանի միջնորդությունը՝ նշելով, որ մեղադրյալի ներկայությունը կապահովվի:

Լրագրողների հետ զրույցում Տիգրան Հայրապետյանը նշեց, որ Կարո Եղնուկյանի նկատմամբ մեղադրանքն անհիմն է, իսկ կալանավորումն՝ անօրինական: Ուստի իրենք բազմաթիվ միջնորդություններ են ներկայացրել խափանման միջոց կալանքը, մեղադրանքը, ինչպես նաև այլ իրավունքի խախտումներ վերացնելու մասին՝  «նախաքննական մարմնի տարբեր անօրինական գործողությունների դեմ»:

Միջնորդությունները Գլխավոր դատախազի պաշտոնակատարը մակագրել է տարբեր դատախազների, մասնավորապես, երկու դատախազները մերժել են Տ.Հայրապետյանի միջնորդությունները՝  առանց մեկ նախադասությամբ անգամ հիմնավորելու: «Երևի 45-րդ օրն է կամ ավելի, Կարո Եղնուկյանի որևէ միջնորդություն ո՛չ նախաքննական մարմինն, ո՛չ էլ գլխավոր դատախազի պաշտոնակատարը քննության առարկա չեն դարձրել, ուղղակի անհիմն ձևական նկատառումներով մերժվել է»,- ասաց փաստաբանը:

Ըստ Տիգրան Հայրապետյանի, նախաքննության նկատմամբ հսկողություն իրականացնելու և կալանքի հիմնավոր  կամ անհիմն լինելու վերաբերյալ միջնորդությունները քննելու դատախազության երկու գործառույթներն էլ չի կատարվել Գլխավոր դատախազի պաշտոնակատարի և որևէ դատախազի կողմից: «Ըստ էության այսօր դատախազությունը չի աշխատում»,- ասաց Տ.Հայրապետյանը:

Պաշտպանը նշեց, որ ինքը մի քանի հարց է առաջ քաշել, մասնավորապես, եթե զենքերը վայր են դրվել, արդյո՞ք «Սասնա Ծռերի» տղաներին կարող է առաջադրվել մեղադրանք ՀՀ քրեական օրենսգրքի 218-րդ հոդվածով՝ պատանդներ վերցնելը, կամ 219-րդ  հոդվածով՝ շենք-շինություններ զավթելը: Պաշտպանը հիշեցրեց, որ հենց գլխավոր դատախազն է առաջարկել զենքերը վայր դնելու դեպքում նրանց  քրեական պատասխանատվությունից ազատել:

Անդրադառնալով իր պաշտպանյալի խափանման միջոցի հարցին՝ Տ.Հայրապետյանը նշեց, որ դատարանի որոշման համաձայն, կալանքը պետք է ընտրվի, քանի որ «Սասնա Ծռեր»-ի տղաները գտնվում են ազատության մեջ, հնարավոր է, Կարո Եղնուկյանը փորձի իրենց օժանդակել: Սակայն այն պահից հետո, երբ զենքերը վայր են դրվել և շենք-շինությունները ազատվել են, Կարո Եղնուկյանի՝ կալանքի տակ մնալն առավել քան անհեթեթ է, բայց բողոքները շարունակվում են մերժվել, ասաց Տիգրան Հայրապետյանը:

Լուսանկարում՝ փաստաբան Տիգրան Հայրապետյանը

Աղբյուր` Փաստինֆո