Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանությունից հետո Գնել Թևոսյանը, մտնելով ննջասենյակ, սպառնացել է մյուս կուրսանտներին՝ ասելով՝ «Ով դրա մասին ասի…(հայհոյանք) նրա լավը, որ իմացել եմ ծախվել եք, Ձեր հետևից կգան» ու հեռացել է:

Այդ մասին հայտնի դարձավ տուժող Տիգրան Դեմիրճյանի նախաքննական ցուցմունքներից:

Նշենք, որ տուժողի դատաքննական և նախաքննական ցուցումնքների միջև առկա էական հակասությունների պատճառով մեղադրանքի կողմը միջնորդել էր հրապարակել նրա նախաքննական ցուցմունքները:

Թերևս այս հակասությունը միակը չէր տուժողի ցուցմունքներում. դատաքննության ընթացքում նա նշել էր, որ Հայկազին ննջարանից դուրս են տարել, որոշ ժամանակ անց Գնելն ու Վաչեն հետ են վերադարձել, ինքը ինչ որ ձայներ է լսել, սակայն չգիտի, թե ինչ են արել: Միևնույն ժամանակ նա նշել էր, որ վերադառնալով՝ նրանք որևէ մեկին չեն դիմել, ոչ մեկի հետ չեն խոսել:

Նախաքննության ընթացքում տուժողը նաև նշել է, որ երբ Գնելը, Նորայրը, Վաչեն և Մովսեսը գտնվել են իրենց ննջասենյակում, հնչել է մի արտահայտություն՝ «վսյո էսի մեռավ»: Ըստ տուժողի նախաքննական ցուցմունքի՝ այդ արտահայտությունն արել է Վաչե Սահակյանն այն բանից հետո, երբ Հայկազը փսխել է, ապա ոչ մի ձայն չի հանել: Այս մասին ևս դատաքննության ընթացքում տուժողը չէր հայտնել:

Վաչե Սահակյանի պաշտպան Արմեն Նադիրյանի հարցին էլ, թե դեպքի հաջորդ օրը տուժողը ցուցմունք է տվել և Վաչե Սահակյանի և Մովսես Ազարյանի մասին ոչ մի բառ չի նշել, միայն նշել է Գնել Թևոսյանի և Նորիկ Սահակյանի մասին, ինչո՞վ է դա պայմանավորված, տուժողը պատասխանեց, որ լարված է եղել, չի հիշել, թե ովքեր են եղել, երբ հիշել է հաջորդիվ տված իր ցուցմունքներում լրացրել է:

Տուժողի խոսքով՝ բոլոր հակասությունները պայմանավորված են վախով և լարվածությամբ:

Ցուցմունքներից մեկում տուժողը հայտնել էր, որ դեպքից առաջ Գնելը և Նորայրը Հայկազին կանչել են խոսելու, և Հայկազը նրանց հետ դուրս է եկել ննջարանից և որոշ ժամանակ անց Գնելը և Նորիկը Հայկազին թևատակերից բռնած բերել են ննջարան ու պառկեցրել, սակայն հաջորդ ցուցմունքներում հայտնել էր, որ Գնելն ու Նորիկը Հայկազին բերել են մինչև ննջարանի դռան մոտ որտեղից վերջինս մենակ է եկել ու պառկել:

Պաշտպան Նադիրյանի այս հարցին էլ տուժողը պատասխանեց, որ աղոտ է հիշել սկզբում, իսկ վերհիշելուց հետո ուղղել է ու ասել, որ բերել են մինչև ննջարանի դռան մոտ, ապա Հայկազը, կաղալով, հայհոյելով, հազիվ հազ եկել ու պառկել է:

Գործով մյուս ամբաստանյալ Վարազդատ Սաֆարյանի վերաբերյալ էլ սկզբնական ցուցմունքում ոչինչ չի հայտնել, իսկ ավելի ուշ տված ցուցմունքներում նշել է, որ երբ գործով անցնող 4 ամբաստանյալներն իրենց ննջարանում են եղել, Վարազդատը դուռը թակել է ու ասել՝ «տղերք ջան ստեղ եք», ոչ ոք ձայն չի հանել, թե ինչո՞ւ այս մասին տուժողը չի հայտնել, վերջինս պատասխանեց, որ չի հիշել:

Սպանության մասին ևս նախնական ցուցմունքներում տուժողը ոչինչ չի հայտնել. այս մասին Գնել Թևոսյանի պաշտպան Արա Զաքարյանի հարցին նա պատասխանեց, որ վախեցած և լարված է եղել, իսկ արդյոք այդ իրավիճակում կարո՞ղ էր նա տեղի ունեցածը սխալ ընկալել, ասեր մի բան, որը իրականում չի եղել կամ չի տեսել, տուժողը բացառեց՝ «չի կարող»:

Այն, ինչ չի ասել նախաքննական ցուցմունքներում պայմանավորված է եղել իր վիճակով. «Ես ինձ մեղավոր եմ զգացել, որ չէի վերկացել և օգնել»,- ասաց նա:

Ըստ տուժողի նախաքննական ցուցմունքների՝ դեպքից հետո իր վիճակի մասին նշել է, որ այնքան վախեցած և լարված է եղել, որ քարացել է ու չի կարողացել ծպտուն հանել և ձևացրել է, որ քնած է, հուզմունքից նույնիսկ լացել է և չի հասկացել, թե ինչպես է քնել:

Քննիչի հարցին, թե նա երբևէ ինքնասպանության մտքեր արտահայտե՞լ է, տուժողը բացասական է պատասխանել:

Ի՞նչ դիրք են զբաղեցրել Գնելը, Վաչեն և Նորայրը համածառակիցների շրջանում քննիչի հարցին ի պատասխան՝ տուժողը նշել է, որ նրանք իշխող դիրք են ունեցել, բոլորը նրանցից քաշվել են, և ոչ ոք չի ցանկացել նրանց հետ կոնֆլիկտի մեջ մտնել, ինչպես նրանք, այնպես էլ Մովսես Ազարյանն իրենց մարտկոցի «հարց լուծողներն են» եղել:

Ի վերջո, տուժողը պնդեց իր նախաքննական ցուցմունքը՝ հավելելով, որ նախորդ նիստին լարված է եղել և իր միտքը չի կարողացել շարադրել:

Աղբյուր` Փաստինֆո