Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր տուժողի իրավահաջորդի շահերը ներկայացնելու համար ներգրավվեց երկրորդ փաստաբան:

Մինչ ներկայացուցիչ Անի Թորոսյանը կներգրավվեր և կանցներ իր աշխատանքին՝ նախաքննության փուլից տուժողի շահերը ներկայացնող փաստաբան Գարիկ Գալիկյանը  հրաժարվեց այսուհետ տուժողի իրավահաջորդի շահերը ներկայացնել և խնդրեց իրեն հնարավորություն տալ այս նիստին չմասնակցել:

Գալիկյանը պատճառները չմանրամասնեց, սակայն նշեց, որ տուժողի իրավահաջորդի և մյուս ներկայացուցչի հետ որևէ խնդիր չունի:

Իսկ սպանված կուրսանտի հայրն էլ հայտարարեց, որ ինքը ցանկանում է, որպեսզի Գալիկյանը այսուհետ ևս շարունակի իր շահերը ներկայացնել, ուստի դատարանը որոշեց փաստաբանին մի քանի օր ժամանակ տրամադրել վերջնական որոշում կայացնելու համար:

Նշենք, որ այսօր դատարանը Ռազմական ինստիտուտի պետի կողմից գրություն էր ստացել այն մասին, որ քրեական գործով կատարված քննչական գործողությունների արդյունքում կնքվել է գործով անցնող կուրսանտների ննջարանը, ինչի պատճառով նրանց համազգեստները և անձնական իրերը չեն կարողանում վերցնել, ուստի և գրությամբ դատարանին խնդրվում էր  որոշում կայացնել թույլ տալ վերցնել այդ իրերը և համազգեստները:

Մեղադրանքի կողմը չառարկեց, սակայն Վաչե Սահակյանի պաշտպան Արմեն Նադիրյանը գտավ, որ այդ հարցի լուծումը վաղաժամ է, քանի որ չի բացառվում, որ  հետագայում անհրաժեշտություն առաջանա քննչական փորձարարություն կատարելու նշված վայրում:

Ըստ պաշտպանի՝ ննջասենյակի կնիքը հանելը դեռևս վաղաժամ է:

Դատարանը՝ նախագահությամբ Դավիթ Հարությունյանի, գտավ, որ  որևէ արգելք չկա կնիքը հանելու և կուրսանտներին իրենց հագուստներն ու անձնական իրերը տրամադրելու համար:

Աղբյուր` Փաստինֆո