Փաստ ինֆո

Ազգային ժողովն 94 «կողմ», 18 «դեմ» և 4 «ձեռնպահ» ձայներով երկրորդ ընթերցմամբ ընդունեց Ընտրական օրենսգրքի նախագիծը և դրան կից մի շարք օրենքերում փոփոխությունների և լրացումների օրենսդրական փաթեթը: 

Դեմ քվեարկեցին «Օրինաց երկիր» խմբակցությունը, «ՀԱԿ»-ը, բացառությամբ Լյուդմիլա Սարգսյանի, «Ժառանգության» 4 անդամներից 2-ը՝ Զարուհի Փոստանջյանը և Թևան Պողոսյանը, ինչպես նաև անկախ պատգամավորներ Խաչատուր Քոքոբելյանը և Էդմոն Մարուքյանը: 5 պատգամավորներ «Բարգավաճ Հայաստան» խմբակցությունից 5-ը դեմ էին, 4-ը՝ ձեռնպահ, մնացածը՝ կողմ:

Ըստ հեղինակների, օրենսդրական փաթեթն առաջին ընթերցումից հետո բազմաթիվ փոփոխությունների է ենթարկվել` հաշվի առնելով Պետական-իրավական հարցերի հանձնաժողովում նախագծի քննարկումների ժամանակ ծագած հարցադրումներն ու առաջարկությունները, Վենետիկի հանձնաժողովի և ԵԱՀԿ ԺՀՄԻԳ-ի օրերս ստացված զեկույցի մեջ նշված դիտողությունները, տարբեր հասարակական կազմակերպությունների և անհատների, ՄԱԿ-ի կողմից վարձած տեխնիկական փորձագետների առաջարկությունները:

Այդուհանդերձ, խորհրդարանական ընդդիմությունը պնդում է, որ ընդդիմադիր 4 խմբակցությունների կողմից ներկայացված միացյալ և մի շարք ՀԿ-ների առաջարկություններն ԱԺ կանոնակարգ-օրենքով սահմանված կարգով չեն քննարկվել և նախագծի շուրջ կոնսենսուս չկա:

Հիմնական զեկուցող՝ ՀՀ կառավարության աշխատակազմի ղեկավար-նախարար Դավիթ Հարությունյանը, արձագանքելով իշխանության հասցեին ընդդիմության քննադատությանը, չբացառեց, որ ինչ-որ պահի կհաջողվի ընդդիմության հետ գալ ընդհանուրի: Ըստ նրա՝ Ընտրական օրենսգիրքը պետք է հունիսի 1-ին ուժի մեջ մտնի, ուստի կոնսենսուսի պարագայում հնարավոր է մինչև մայիսի վերջ արտահերթ նստաշրջան հրավիրել:

Ավելի վաղ լրագրողների հետ զրույցում նա ասել էր նաև, թե «կարող ենք անգամ հունիսի 1-ից հետո էլ գալ կոնսենսուսի և փոփոխություններ կատարել Ընտրական օրենսգրքում»:

Աղբյուր` Փաստինֆո