Փաստ ինֆո

Ընտրական օրենսգրքի նախագծի համաձայն՝ քվեարկությանը մասնակցող անձինք գրանցվելու են էլեկտրոնային գրանցման համակարգի միջոցով, նրանցից վերցվելու են մատնահետքերը, սակայն երկրորդ ընթերցմամբ ներկայացվող նախագծում դրանց համեմատման մասին դրույթը հանված է:

«Մատնահետքերը վերցվելու են, որովհետև դրանք ապացույց են, որ կոնկրետ մարդը մասնակցել է քվեարկությանը: Անհրաժեշտության դեպքում, եթե դրանից հետո լինեն բողոքներ, հնարավոր է՝ կոնկրետ մարդկանց հետ կապված օբյեկտիվ չափանիշներով ուսումնասիրություն կատարել: Իսկ 1,5 միլիոն ընտրողների մատնահետքերի համեմամտությունը, ըստ տեխնիկական մասնագետների, լավագույն ծրագրային ապահովումը կարող է տալ այնքան մեծ ծավալի սխալներ, որ ինքնին կարող են վտանգել ընտրությունը, ընտրական պատշաճ կլիման:

Դրա համար մասնագետները, ովքեր նախկինում առաջարկել էին նմանատիպ ծրագրային ապահովում օգտագործելը, հենց իրենք առաջնահերթ ահազանգեցին, որ հետ են վերցնում իրենց առաջարկությունը՝ համարելով այն ծայրահեղ ռիսկային»,-ԱԺ-ում, պատասխանելով լրագրողների հարցերին, հայտնեց նոր Ընտրական օրենսգրքի նախագծի հիմնական զեկուցող՝ ՀՀ կառավարության աշխատակազմի ղեկավար-նախարար Դավիթ Հարությունյանը:

Նրա պարզաբանմամբ՝ եթե համեմատության արդյունքում ունենայինք 100 նմանատիպ սխալ, փորձագետների համար խնդիր չէր լինի դրանք համեմատելն ու իրական պատկերը պարզելը, սակայն, երբ խոսքը վերաբերում է, ըստ գնահատականների, մի քանի հազարի, ապա դա արդեն իրատեսական չէ:

«Ուզում եմ հիշեցնել, որ դա ընդամենը լրացուցիչ միջոց է: Մենք համարում ենք, որ ինքնին այն, որ մեր ցուցակներն էլեկտրոնային են, երբ որ մարդը քվեարկության համար իր փաստաթուղթը ներմուծի սարքավորման մեջ, այն պետք է ավտոմատ կարդա համարը, համադրի իր ցուցակում համարի հետ, պարզի՝ այդ մարդն մասնակցել է քվեարկությանը, թե ոչ, արդեն բավարար երաշխիք է, որպեսզի ընտրությունների որակը բարձր լինի»,-ընդգծեց Դ.Հարությունյանը:

 

Աղբյուր` Փաստինֆո