Փաստ ինֆո

Այսօր համախմբվել ենք միասնաբար աղոթք բարձրացնելու մեր երկրի ու մեր ժողովրդի խաղաղ ու ապահով կյանքի, հայրենյաց սահմանները պաշտպանող հայոց բանակի հրամանատարների և զինվորների անվտանգ ու հաղթական ծառայության համար: Այս մասին ապրիլի 4-ին նշել է Ն.Ս.Օ.Տ.Տ. Գարեգին Բ Ծայրագույն Պատրիարքը և Ամենայն Հայոց Կաթողիկոսը Երևանի Ս. Գրիգոր Լուսավորիչ մայր եկեղեցում հայրենյաց պաշտպան զինվորների համար կատարված  է միասնական աղոթքի արարողությանը:

Ամենայն Հայոց կաթողիկոսը նշել է, որ Ադրբեջանի կողմից այս օրերին սանձազերծված ռազմական գործողություններին մեր բանակի քաջարի զինվորները դիմակայեցին անձնուրաց կերպով՝ ծանր մարտերում ետ մղելով հակառակորդին և պատճառելով զգալի կորուստներ:

«Մեր ողջ ժողովուրդը հայրենասիրության ու ազգասիրության զորեղ զգացումով ինքնաբուխ զորաշարժ սկսեց: Կամավորական խմբերը ելան մեր բանակի արիասիրտ զինվորների հետ վճռականորեն և ամենայն հանձնառությամբ պաշտպանելու հայրենի երկիրն ու սրբությունները, ազատ կյանքի արդար իրավունքը Արցախի մեր ժողովրդի»,- ասել է Գարեգին Երկրորդը՝ հավելելով, որ թեպետ իրավիճակը Արցախի սահմաններում մնում է լարված, բայց հայրենյաց պաշտպան մեր զավակները շարունակում են արժանի հակահարված տալ հակառակորդին: «Այսօր քաջալեր են մեր հոգիները տեսնելով մեր բանակի մարտունակությունը, ազգիս զավակների ազնվասիրտ նվիրումն ու խիզախությունը»,- նշել է նա:

Ամենայն Հայոց կաթողիկոսն արձանագրել է, որ Ադրբեջանի կողմից հրադադարի անընդմեջ խախտումները, դիվերսիոն գործողությունները, սահմանամերձ բնակավայրերի պարբերական գնդակոծությունները, որոնց հավելվեց և այս օրերի ոճրագործությունը, վկայում և փաստում են, որ Ադրբեջանը ցանկանում է ղարաբաղյան խնդիրը լուծել ռազմական ճանապարհով:

«Թշնամու սանձազերծած պատերազմական գործողությունների հիմնական զսպիչ ուժը, արդարև, մեր բանակի հզոր պաշտպանությունն է, նաև միջազգային հանրության անդար և օբյեկտիվ գնահատականը Ադրբեջանի ռազմատենչ, անընդունելի և դատապարտելի վարքագծին, որը մեր ժողովրդի իրավացի սպասումն է»:

Գարեգին Երկրորդը նշել է, որ հայ ժողովուրդը  քրիստոնյա ժողովուրդ է, հետևորդ է աստվածապատվեր խաղաղության ու համերաշխության, նախանձախնդիր՝  աստվածաշնորհ ազատության և որ Հայրենիքի խաղաղությունը, ազգի ազատ կյանքի պաշտպանությունը սրբազան առաքելություն է հայ ժողովրդի համար:

«Մեր ժողովուրդը, որ իր պատմության ընթացքում օրհասական վտանգների դեմ համախումբ, իր հավատքի ուժով և ոգու արիությամբ բազում հաղթանակներ է կերտել, այսօր ևս նույն հանձնառությամբ հերոսաբար կանգնած է ընդդեմ վայրագությունների ու բռնությունների, ընդդեմ պարտադրված պատերազմի՝ վերահաստատելու համար խաղաղությունը: Առաքելական մեր Սուրբ Եկեղեցու հոգևորականները նույնպես մարտնչող մեր զինվորների կողքին են՝ հավատքով զորացնելով ու քաջալերելով մեր հայրենյաց պաշտպաններին և աղոթելով, որ միշտ հաղթական լինի բազուկը հայ զինվորի»:

Ամենայն Հայոց կաթողիկոսը նշել է, որ «մեր աղոթքը, օրհնությունը և զորակցությունն ենք բերում Լեռնային Ղարաբաղի Հանրապետության և ՀՀ իշխանություններին, մեր քաջարի հրամանատարներին ու զինվորներին, որ նախանձախնդիր ջանքեր են ներդնում հայրենի մեր երկրի ապահովությունն ու անվտանգությունը պահպանելու, Հայրենիքը պաշտպանելու, խաղաղությունը վերահաստատելու համար»:

Գարեգին Երկրորդը աղոթք է բարձրացրել  մարտերում և սահմանամերձ բնակավայրերում զոհված հայ ժողովրդի զավակների՝ զինվորների և խաղաղ բնակիչների հոգիների հանգստության և երկնային լուսեղեն օթևաններում բնակության համար՝ վշտակցությունը բերելով զոհվածների ընտանիքներին և հարազատներին:

«Աղոթում ենք վիրավորների շուտափույթ ապաքինման համար:

Աղոթք ենք վերառաքում առ Աստված աշխարհի և մեր հայրենիքի խաղաղության համար՝ հայցելով, որ մեր ժողովուրդը հավատքով և արի ոգով հաղթահարի նաև այս դժվարություններն ու մարտահրավերները` շարունակելով հզորացնել մեր հայրենիքը, շենացնել ազգային մեր կյանքը ի սփյուռս աշխարհի:

Թող Տիրոջ Ամենազոր Սուրբ Աջը ամենայն ժամ զորակից ու պահապան լինի մեր ժողովրդին, հայրենյաց պաշտպան մեր խիզախ զինվորներին: Հավետ կեցցեն մեր քաջ զինվորները, փառք ու պատիվ հայոց բանակին:

Ամենազոր Աստված և Թագավոր Հավիտենից անսասան և անպարտելի պահիր Քո ժողովրդին և հայոց աշխարհը:

Կյանքի աղբյուր, խաղաղության պարգևիչ և Քո ծառաների զորացուցիչ, խաղաղ կյանք պարգևիր հայրենի մեր երկրին և զորացրու թշնամիների դեմ պատերազմում ի փառս Քո Սուրբ անվան»,- եզրափակել է իր խոսքը Ամենայն Հայոց կաթողիկոսը:

Միասնական աղոթքի արարողությանը ներկա է եղել Հայաստանի Հանրապետության նախագահ Սերժ Սարգսյանը: Աղոթքին մասնակցել են նաև Հայաստանյայց Առաքելական Ս. Եկեղեցու թեմակալ առաջնորդներ, Մայր Աթոռ Ս. Էջմիածնի կառույցներում պաշտոնավարող եպիսկոպոսներ ու միաբաններ, հազարավոր հավատավոր հայորդիներ:

Եկեղեցականների թափորը, որի մեջ են ընդգրկված են եղել նաև զինվորականներ, տաճարի մուտքից, «Հրաշափառ» շարականի երգեցողության ներքո, Ամենայն Հայոց Հայրապետին առաջնորդել է դեպի խորան: Այդ ընթացքում ներկա ժողովուրդը ծափողջույններով դիմավորել է Հայրապետական թափորին մասնակից հայրենյաց պաշտպաններին:

Այնուհետև կատարվել է մաղթանք Հայաստանի Հանրապետության և Լեռնային Ղարաբաղի Հանրապետության անսասանություն և խաղաղության համար, որի ընթացքում Նորին Սրբությունը ծնրադիր աղոթել է:

Հոգևոր դասը նաև առ Աստված աղոթք է  բարձրացրել մարտերում և սահմանամերձ բնակավայրերում զոհվածների հոգիների հանգստության համար:

Վերջում Գարեգին Բ Ամենայն Հայոց Կաթողիկոսն իր խոսքն  է ուղղել արարողությանը մասնակից ժողովրդին: