Փաստ ինֆո

Պատահական չէ Հռոմի Պապի անդրադարձը Հայոց ցեղասպանությանը այն ժամանակահատվածում, երբ Մերձավոր Արևելքում՝ քաղաքակրթության օջախների բնօրրանում, բնաջնջվում են հենց այն փոքրամասնությունները, որոնք այդ քաղաքակրթության կրող են, ընդ որում` անկախ կրոնից և ազգությունից:

Հանրային հեռուստաընկերության «Հարցազրույց» հաղորդմանը այս մասին նշել է ԱԳ նախարարի տեղակալ Շավարշ Քոչարյանը՝  ընդգծելով, որ դա վերաբերում է և՛ քրիստոնյաներին, և՛ մահմեդականներին, ասորիներին, եզդիներին և այլ փոքրամասնություններին:

«Այսինքն` այն շատ էական խորհուրդ է. Հայոց ցեղասպանության ճանաչումը ոչ միայն և ոչ այնքան պետք է միայն հայությանը, որովհետև մենք մեր հետևությունն արել ենք (մեր հետևությունն այն է, որ, առաջին հերթին, ապավինի՛ր քո սեփական ուժերին), այլ պետք է, առաջին հերթին, ամբողջ մարդկությանը: Որովհետև եթե մարդկության դեմ հանցագործությունը մնում է չճանաչված, ժխտված, անպատիժ, ապա դա պարարտ հող է բացում նույն նմանատիպ գործողությունների համար: Այն, ինչին մենք ականատես ենք այսօր Մերձավոր Արևելքում»,- նշել է Շ.Քոչարյանը՝ հավելելով, որ պատահական  չէ, որ Եվրոխորհրդարանը, Հռոմի Պապը հատուկ ուշադրություն դարձրին Հայոց ցեղասպանությանը:

«Պատահական չէ, որ հենց այս ժամանակահատվածում մենք ականատես եղանք Ավստրիայի խորհրդարանի, վերջինը՝ Լյուքսեմբուրգի խորհրդարանի՝ Հայոց ցեղասպանության ճանաչմանը, Եվրախորհրդարանի հայտարարությունը: Եվ այդ գործընթացը չի սահմանափակվում միայն Եվրոպայով»,- հավելել է փոխնախարարը:

Ըստ Շավարշ Քոչարյանի, այն գործընթացը, որն արդեն սկսվել է, այն մասնակցությունը, որն ունեցել է Արտաքին գործերի նախարարությունն իր դեսպանատներով, իր կառույցներով, պետք է շարունակվի, որովհետև երբեք խնդիրն այդպես չի դրվել, որ ապրիլի 24-ով ինչ-որ վերջակետ ենք դնում: Մասնավորապես, կա գործողությունների ծրագիր, որը ներկայացված է Հայոց ցեղասպանության հարյուրերորդ տարելիցի միջոցառումները կազմակերպող հանձնաժողովին, և այդ ծրագրով նախատեսված է այդ աշխատանքի շարունակականություն՝  Սփյուռքի, Մշակույթի նախարարությունների, Սփյուռքի բոլոր կառույցների հետ համատեղ:

Շավարշ Քոչարյանը  շատ կարևորել է, որ ֆրանսիական «Politique Internationale» ամսագրում հատուկ շարք, հատուկ համար նվիրվեց Հայոց ցեղասպանությանը՝   և՛ ֆրանսերեն, և՛ անգլերեն: «Աշխարհի քաղաքական գործիչներ, լուրջ ցեղասպանագետներ այդտեղ հոդվածներ տպագրեցին: Սա աննախադեպ է: Եվ այդ ամսագրի համապատասխան օրինակները բաժանվեցին Երևանում: Այստեղ, իհարկե, հիմնական ծանրությունը հենց ԱԳՆ- վրա էր: Կամ, օրինակ, Ժնևում Մարդու իրավունքների խորհուրդը հերթական բանաձևն ընդունեց Ցեղասպանությունների կանխարգելման վերաբերյալ: Այստեղ էլ հիմնական ծանրությունը մեզ վրա էր»,- ասաց Շավարշ Քոչարյանը: