Փաստ ինֆո

Հատուկ քննչական ծառայությունը որոշում է ընդունել կարճել ոստիկանների կողմից Երևանի Կենտրոն և Նորք-Մարաշ վարչական շրջանների դատարանի շենքի դիմաց բողոքի ակցիայի դիմած Հայկ Կյուրեղյանի նկատմամբ բռնությունների վերաբերյալ գործը: 

Ինչպես «Փաստինֆո»-ի թղթակցին հայտնեց գործի շրջանակում տուժող ճանաչված Հայկ Կյուրեղյանի ներկայացուցիչ, փաստաբան Երվանդ Վարոսյանը, որոշումն ընդունվել է հոկտեմբերի 13-ին, իսկ հոկտեմբերի 16-ին որոշումը փոխանցվել է քրեակատարողական հիմնարկում գտնվող Հայկ Կյուրեղյանին:

ՀՀ քրեական օրենսգրքի 309-րդ հոդվածի 2-րդ մասի հատկանիշներով` բռնություն գործադրմամբ պաշտոնեական լիազորություններն անցնելու դեպքի առթիվ հարուցված քրեական գործը կարճելու այս որոշումը, ըստ Երվանդ Վարոսյանի,  օրենքով սահմանված 7-օրյա  ժամկետում կբողոքարկվի:

Երվանդ Վարոսյանը քննչական մարմնի այս որոշումը գնահատում է որպես ակնհայտ անհիմն, սակայն ՀՔԾ-ի ոգով կայացված, միանգամայն սպասելի որոշում: Ամբողջությամբ ոստիկանների ցուցմունքների վրա հիմնվելով՝ ՀՔԾ-ն քրեական գործի կարճումը պատճառաբանել է, որ քննությամբ չեն կարողացել ապացուցել, որ Կյուրեղյանի նկատմամբ ոստիկանների կողմից բռնություններ են գործադրվել:

Նշենք, որ  Ե.Վարոսյանն ավելի վաղ մեզ հայտնել էր, որ ՀՀ քրեական օրենսգրքի 309-րդ հոդվածի 2-րդ մասի հատկանիշներով` բռնություն գործադրմամբ պաշտոնեական լիազորություններն անցնելու դեպքի առթիվ հարուցված քրեական գործի շրջանակներում տուժող Հայկ Կյուրեղյանը  հստակ ճանաչել է ոստիկաններից մեկին, իսկ մյուսների վերաբերյալ նշել է, որ եթե նրանք եղել են իրեն ոստիկանության բաժին տեղափոխող ավտոմեքենայի մեջ, ապա նրանք բոլորն էլ, բացի վարորդից, իրեն ծեծել են:

Հիշեցնենք, որ Հ.Կյուրեղյանն իր նկատմամբ կիրառված բռնությունների վերաբերյալ դիմում էր ներկայացրել Հատուկ քննչական ծառայություն, որից հետո ՀՔԾ քննիչը նրանից գրավոր հաղորդում ու բացատրություններ է վերցրել դեպքի առնչությամբ:

Ըստ Հայկ Կյուրեղյանի հաղորդման` 2014թ. հունիսի 12-ին` ժամը 11:00-ի սահմաններում, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի շենքի դիմաց օդամղիչ ատրճանակով կրակելուց հետո ոստիկանության աշխատակիցներն իրեն բերման ենթարկելիս, ապա բաժնի վարչական շենքում իր նկատմամբ բռնություն են գործադրել` պատճառելով մարմնական վնասվածքներ:

Հունիսի 12-ին՝ ժամը 12:10-ի սահմաններում՝ Շանթ Հարությունյանի և մյուսների գործով առաջին դատական նիստի օրը, Երևան քաղաքի բնակիչ, 1983 թ. ծնված Հայկ Կյուրեղյանը Կենտրոն և Նորք-Մարաշ վարչական շրջանների ընդհանուր իրավասության դատարանի վարչական շենքի դիմաց բարձրացել էր կայանված ավտոմեքենաներից մեկի վրա և հայտարարել, որ մեքենայում ռումբ կա:

Ըստ ոստիկանության հաղորդագրության՝ «կոպիտ կերպով խախտելով հասարակական կարգը և չենթարկվելով ոստիկանների օրինական պահանջներին` Հայկ Կյուրեղյանն իր մոտ եղած ատրճանակից կրակոցներ է արձակել տեղում ծառայություն կատարող ոստիկանների ուղղությամբ: Կան վիրավոր ոստիկաններ, որոնք տեղափոխվել են հիվանդանոց»: