Փաստ ինֆո

Դատարանը  դադարեցրել է ուսանողուհու նկատմամբ քրեական հետապնդումը և կարճել սուտ մատնության հատկանիշներով հարուցված քրեական գործի վարույթը՝  իրադրության փոփոխման հիմքով:

Իսկ իրադրության փոփոխությունն, ըստ գործի նյութերի, այն է, որ «հանցանքը կատարելուց հետո ամբաստանյալն ամուսնացել է տուժողի հետ, նրանք կազմել են ընտանիք և ապրում են համատեղ»:

Ամբաստանյալին մեղադրանք էր առաջադրվել՝ ՀՀ քրեական օրենսգրքի 333-րդ հոդվածի 2-րդ մասի 1-ին կետով՝ սուտ մատնություն, այն բանի համար, որ նա 2014թ հունվարի 30-ին ՀՀ ոստիկանության Կենտրոնական բաժնում իրականությանը չհամապատասխանող հաղորդում է տվել:

Ըստ հաղորդման՝ ներկայումս ամբաստանյալի ամուսինը 2014թ. հունվարի 29-ին՝ ժամը 14։00-ի սահմաններում, Երևան քաղաքի Աբովյան փողոցից խաբեությամբ տեղափոխել է իրեն Նոր Նորքի 2-րդ զանգված, որտեղ գտնվող բնակարաններից մեկում, իր կամքին հակառակ՝ ֆիզիկական և հոգեբանական ճնշում գործադրելով՝ սեռական հարաբերություն է ունեցել իր հետ:
   
Քրեական գործը քննվել է արագացված դատական քննության կարգով և մեղադրողը, հանդես գալով մեղադրական ճառով, միջնորդել է  ամբաստանյալին դատապարտել ազատազրկման։

Ամբաստանյալի պաշտպանն իր պաշտպանական ճառում նշել է, որ հանցանքը կատարելուց հետո ամբաստանյալն ամուսնացել է տուժողի հետ, նրանք կազմել են ընտանիք և ապրում են համատեղ, այսինքն՝ տեղի է ունեցել իրադրության փոփոխում: Ուստի՝ միջնորդել է նշված հիմքով կարճել ամբաստանյալի վերաբերյալ ՀՀ քրեական օրենսգրքի 333-րդ հոդվածի 2-րդ մասի 1-ին կետով քրեական գործի վարույթը՝ նրա նկատմամբ դադարեցնելով քրեական հետապնդումը։

Միաժամանակ, պաշտպանը պատճառաբանել է, որ նախաքննության սկզբում՝ դեռ տաս օր չանցած, ամբաստանյալը, գիտակցելով իր արարքի էությունը և զղջալով կատարվածի համար, 13.03.2014թ. ներկայացել է մեղայականով, քննիչին հասցեագրած դիմումով և ցուցմունքով խոստովանել է իրականությունը, այսինքն՝ նա, գործուն զղջալով, աջակցել է հանցագործությունը բացահայտելուն։  

Իրեն մեղսագրվող հանցանքը կատարելուց հետո ամբաստանյալի ու սուտ մատնության ենթարկված անձի ամուսնությունն ու ընտանիք կազմելը  դատարանը գնահատել է որպես իրադրության այնպիսի փոփոխում, որի արդյունքում ամբաստանյալի անձը դադարել է հանրության համար վտանգավոր լինելուց:

Միաժամանակ, դատարանը գտել է, որ նրա կյանքում տեղի ունեցած վերոհիշյալ փոփոխությունը զրկում է նրան հասարակական հարաբերություններին այնպիսի վնաս պատճառելու հնարավորությունից, ինչպիսին նա պատճառել է նախքան այդ փոփոխությունը, այսինքն՝ կատարված փոփոխությունը էականորեն նվազեցնում է նոր հանցանք կատարելու` ամբաստանյալի օբյեկտիվ հնարավորությունը։