Փաստ ինֆո

ԱԺ «Բարգավաճ Հայաստան» խմբակցության անդամ, «Սեւ հովազ» ջոկատի նախկին հրամանատար Ռուստամ Գասպարյանի որդին` Ռոմա Գասպարյանը երեկ կալանավորվել է այս տարի ամռանը` հունիսի 30-ին տեղի ունեցած միջադեպի կապակցությամբ:

«Փաստինֆո»-ին հայտնի է դարձել, որ այդ օրը երեկոյան, ժամը 18:00-ի սահմաններում Ռոմա Գասպարյանն ընկերոջ հետ գնացել են Երևանի Մալաթիա-Սեբաստիա համայնքում գտնվող «Ղ-Տելեկոմ» ընկերության գրասենյակի մոտ, որտեղ մեքենայի մեջ են նստեցրել ընկերության աշխատակիցներից մեկին և տարել Արմավիրի մարզի Ջանֆիդա գյուղ:

Ի դեպ, նրանք եղել են Ռոմա Գասպարյանի ընկերոջ «Միթսուբիշի պաջերո» ավտոմեքենայով, բայց ղեկին եղել է Ռոման:

Հասնելով Ջանֆիդա` երիտասարդին դուրս են բերել ավտոմեքնայից և երկուսով ծեծի ենթարկել նրան: Ապա նորից նստեցրել ավտոմեքենան ու հասցնելով Արմավիր` բաց թողել:

Ոստիկանությունում հարուցվել է քրեական գործ` ՀՀ Քրեական օրենսգրքի 131-րդ հոդվածի 2-րդ մասի 1-ին կետով, այն է` մի խումբ անձանց կողմից նախնական համաձայնությամբ մարդուն առևանգելը:Հուլիսի 7-ին որոշում է կայացվել Գասպարյանին որպես մեղադրյալ ներգրավելու մասին, իսկ հետագայում տեղափոխվել է Զինվորական գործերով քննության վարչություն:  

Անցած ավելի քան 2 ամսվա ընթացքում ոստիկանությանը չէր հաջողվել հայտնաբերել պատգամավորի որդուն, թեև հայրն news.am կայքին ասել էր, որ  որդին այդ ամբողջ ընթացքում գտնվել է իրենց տանը:  

Ինչ վերաբերում է միջադեպին ու առևանգմանը, նույն կայքի հետ զրույցում Ռուստամ Գասպարյանն ասել էր, թե ամեն ինչ այն կերպ չի եղել, ինչպես որ ներկայացվում է: Նրա խոսքով, անձը, որին, իբր, առևանգել է իր որդին, իրականում համասեռամոլ է: «Բողոքողն էլ գալուբոյ  է, գալուբոյ  տղա է, համասեռամոլ, մարդ չի փախցրել իմ տղան: Էդ գալուբոն 27 տարեկան էշը, ինտերնետներով կապնվում է,18 տարեկան երեխեքին տանում փչացնում է եւ մեկն էլ մի տարածքից  մի երեխու հետ, սա էլ դիմում ա, իմ տղեն գնում է դրա հետ հանդիպում, գալիս են, խոսում են, մեծ-մեծ է խոսում, խփում են  ու էդ ձեւ սարքեցին առեւանգում, սարքեցին էս ու էն»,- news.am-ի փոխանցմամբ ասել է ձերբակալվածի հայրը: