Փաստ ինֆո

«Ադրբեջանը միշտ էլ փորձել է ակտիվ լինել, միշտ էլ փորձել է լարվածություն ստեղծել առաջին գծում` ներքաղաքական և միջազգային խնդիրներ իրականացնելու համար` փորձելով ազդել այն կառույցների վրա, ովքեր որ զբաղվում են ղարաբաղյան խնդրով` չհասկանալով, որ ՀՀ-ն, ԼՂՀ-ն, մեր ժողովուրդը երբեք չեն ուզում երկրորդ անգամ պարտադրված վիճակում լինել»,- պատասխանելով Ադրբեջանի կողմից վերջին շրջանում ռազմական գործողությունների ակտիվացման մասին «Փաստինֆո»-ի հարցին` ասաց պաշտպանության նախարար Սեյրան Օհանյանը:

Նախարարն ընդգծեց, որ առաջին անգամ պարտադրված պատերազմից Արցախի ժողովուրդը պատվով է դուրս եկել, և Ադրբեջանն այսօր իր գործողություններով փորձում է լարվածությամբ ազդեցություն գործել բանակցային գործընթացի վրա:

«Երկխոսությունն ու վստահության մթնոլորտի ձևավորումն է այն միակ ճանապարհը, որով մենք կարող ենք ԼՂ խնդիրը խաղաղ ճանապարհով հասցնել մինչև վերջ»,- ասաց պաշտպանության նախարարը և հավելեց, որ «միջազգային կառույցները, որոնք զբաղվում են ղարաբաղյան հարցով, ԵԱՀԿ ՄԽ համանախագահները, Անջեյ Կասպրչիկը, համամիտ են այն առաջարկություններին, որ մենք անում ենք, իսկ վստահության մթնոլորտի մեջ մտնում է այնպիսի միջոցառումների իրականացումը, ինչպիսիք են դիպուկահարների հետ քաշելը, դիվերսիոն հետախուզական գործողություններից զերծ մնալը, խախտումների դեպքում միջազգային հետաքննության անցկացումը»:

Սեյրան Օհանյանը հայտարարեց, որ բոլոր այս հարցերը միջազգային միջնորդ կառույցների հետ բոլոր հանդիպումների ժամանակ հայկակական կողմը բարձրացնում է: Անդրադառնալով մոնիթորինգներին, որոնք անց է կացնում անձամբ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկը և որոնց նպատակն է հետևել, որպեսզի հրադադարի ռեժիմը պահպանվի, պաշտպանության նախարարը նշեց. «Ցավոք, մենք գործ ունենք մի այնպիսի հարևանի հետ, որը այլ կերպ է մտածում, և մեզ մնում է մեր սկզբունքները պահպանել, մտածել յուրովի և արժանի հակահարված տալ` այդ խախտումները կանխարգելելու համար»:

Լրագրողների հարցերին ի պատասխան` Սեյրան Օհանյանն անդրադարձավ նաև ՀՀ նախագահ Սերժ Սարգսյանի` Ուրուգվայում արած հայտարարությանը, որում նա ցավ էր հայտնել, որ Ռուսաստանը զենք է մատակարարում Ադրբեջանին:

Նախարարը հայտնեց, որ ինքը ևս կիսում է նախագահի այդ մտահոգությունը, բայց և կարծիք հայտնեց, որ «մեր ռազմատեխնիկական համագործակցությունը Ռուսաստանի հետ գտնվում է ավելի բարձր մակարդակի, քան նրանց հարաբերությունները Ադրբեջանի հետ»:

«Պարզապես ամեն ինչ չէ, որ կարելի է հանրությանը ներկայացնել»,- ասաց նախարարը: