Փաստ ինֆո

Հայաստանի ազգային հավաքականի ֆուտբոլիստները տրամադրվածության պակաս չեն ունենալու բուլղարացիների հետ աշխարհի առաջնության ընտրական խաղում, որը տեղի է ունենալու վաղը՝ Երևանի «Հանրապետական» մարզադաշտում: Այդ մասին այսօրվա ասուլիսում հայտարարեց գլխավոր մարզիչ Վարդան Մինասյանը:

Բանախոսը ներկայացրեց այն դրդապատճառները, որոնք մերոնց մղելու են հաջողություն փնտրել մրցակցի դարպասի մոտ: «Այս խաղում արդյունքն առավել քան կարևոր է լինելու մեզ: Նախ, պետք է օգտվել խմբում երկրորդ տեղը գրավելու չնչին հնարավորությունից: Չպետք է մոռանալ նաև, որ սա ընտրական, այսինքն՝ պաշտոնական խաղ է, որի պարագայում գերակշռողը հենց արդյունքն է: Երրորդ՝ ցանկանում ենք վերջապես բացել սեփական դաշտում հաղթանակների հաշիվը: Պակաս կարևոր չէ նաև վարկանիշի խնդիրը: Հերթական խոշոր մրցաշարի ընտրարշավի վիճակահանության շեմին Հայաստանը գտնվում է 4-րդ սկահակում, մինչդեռ առաջիկա երկու խաղերին հաջող մասնակցելու դեպքում կտեղափոխվենք 3-րդ զամբյուղ: Այնպես որ մեր տղաների մոտիվացիան շատ բարձր է»,- նշել է Վ. Մինասյանը:

Անդրադառնալով առանձին ֆուտբոլիստներին, բանախոսը, մասնավորապես, հայտնել է, որ թեպետ առաջին մարզումներից հետո դարպասապահ Ռոման Բերեզովսկու խաղադաշտ դուրս գալը հարցականով էր պարուրված, սակայն նախօրեի պարապմունքից զգացվեց, որ նա 100 տոկոսով պատրաստ է օգնելու հավաքականին: 

Հրավիրված 20 ֆուտբոլիստներից երևանյան խաղադաշտ թերևս դուրս չի գա նախորդ խաղում դեղին քարտ ստացած Արթուր Եդիգարյանը: Անորոշ է նաև Մասիս Ոսկանյանի մասնակցությունը: Իսկ ահա դանիացիների դեմ հանդիպումից հետո խաղային փորձի պակասի խնդրին բախված Կառլեն Մկրտչյանի ֆունկցիոնալ վիճակն, ըստ գլխավոր մարզչի, բավարար է: 

Ինչ վերաբերում է Էդգար Մանուչարյանի բացակայությանը, ապա Եկատերինբուրգի «Ուրալի» հարձակվողը, պարզվեց, տակավին չի բավարարում Վարդան Մինասյանի պահանջներին: «Հետևում եմ նրա ելույթներին, բայց նա դեռ լիարժեք չի դրսևորում սեփական ներուժը»,- նկատեց մարզիչը:  

Մրցակցին բնորոշելու հարցում էլ մեր մարզիչը ինքնատիպ չէր. «Միանգամից նշեմ, որ բուլղարացիները գրեթե խուսափել են կադրային կորուստներից: Նրանք անչափ ագրեսիվ խաղ են ցուցադրում, որը նպատակասլացության հետ մեկտեղ դարձել է ենթախմբում 2-րդ տեղը զբաղեցնելու գրավականը»:

Վարդան Մինասյանն ընդունեց, որ արտագնա խաղում մերոնք բուլղարացիներին պարտվել էին մասամբ կարգապահության, բայց նաև սադրանքներին տրվելու պատճառով: Միաժամանակ, նա ձեռնպահ մնաց Բուլղարիայի հավաքականի ֆուտբոլիստներին համարժեք ընդունելություն կազմակերպելու հայ երկրպագուների նախաձեռնության մասին կարծիք հայտնելուց՝ նշելով, որ մեր հավաքականի մարզչական կազմը և ֆուտբոլիստները կենտրոնացած են միայն պատասխանատու մրցավեճին պատրաստվելու խնդրին: «Լսել եմ, որ երկրպագուների շրջանում ռևանշիստական տրամադրվածություն է տիրում, բայց ավելորդ բաները կխանգարեն մեզ»,- հայտարարել է Վ. Մինասյանը, որի հետ այս հարցում դժվար է չհամաձայնել: