Փաստ ինֆո

 

Վանաձորի  «Լուսատեխնիկ» ՓԲ ընկերությանը  պատկանող  հանրակացարանի բնակիչներ, նույն  ընկերության նախկին աշխատակիցներ Անուշավան Ստեփանյանը, Սարգիս Ոսկանյանը, Կամո Շահնազարյանը և Գուրգեն Մխիթարյանը 2010 թ.  դեկտեմբերի 8-ին  դիմում էին հղել  ՀՀ նախագահին, ՀՀ գլխավոր դատախազին,  Լոռու մարզի դատախազին: Նրանք հայտնել էին,  որ  1988 թ. երկրաշարժի հետևանքով բնակվում են հիշյալ բնակարաններում, որոնք 2000 թվականից սկսել են սեփականաշնորհել ու Վանաձորի քաղաքապետարանից ստացել են սեփականաշնորհելու թույլտվություններ, սակայն չեն կարողացել դրանք իրականացնել:   Բնակարաններն  ի սկզբանե եղել են անօգտագործելի, դրանք վերանորոգել են, դարձրել  բնակվելու համար պիտանի:

 

Հետագայում  տեղեկացել են, որ ՀՀ տնտեսական դատարանի 2002 թ. վճռով՝ «Լուսատեխնիկ» ՓԲ ընկերությունը սնանկ է ճանաչվել և իրենց սենյակների նկատմամբ գրանցվել է ընկերության սեփականության իրավունքը, նրանք զրկվել են դրանցից:   Դիմումատուները  հայտնել էին նաև, որ սնանկության անվան  տակ ջրի գնով վաճառվել են հսկայական  գին ունեցող գործարանը և դրա տարածքը՝  հարկայինի և այլնի նկատմամբ գործարանի պարտավորությունները կատարելու անվան տակ:

 

2010 թ.  դեկտեմբերի 13-ին Լոռու մարզի դատախազությունից  հիշյալ դիմումն ուղարկվել է  ՀՀ ոստիկանության Լոռու մարզի  քննչական բաժին՝ դիմումում շարադրված  հանգամանքներն ուսումնասիրելու, նյութեր նախապատրաստելու համար, որտեղ 1,5 տարի նյութեր են նախապատրաստվել։  Դատախազական հսկողությունը եւս առանձնապես չի փայլել, եւ միայն 2012 թ.  օգոստոսի 15-ին Լոռու մարզի դատախազի  պաշտոնակատարի կողմից  նախապատրաստված նյութերի հիման  վրա հարուցվել է քրեական գործ՝  ՀՀ քրեական օրենսգրքի 179-րդ հոդվածի  3-րդ մասի 1-ին կետով՝  առանձնապես խոշոր չափերով յուրացնելը կամ վատնելը: 

 

Նախաքննությունը տեւել է 11 ամիս, որի արդյունքում ՀՀ ոստիկանության Լոռու մարզի քննչական բաժնի քննիչ Տ.Հակոբյանը 2013 թ. հունիսի 8-ին որոշում է կայացրել.  Վանաձորի «Լուսատեխնիկ»  ՓԲ ընկերության սնանկության գործերով կառավարիչ Խաչիկ Լևոնյանի և  փորձագետ Էդուարդ Ապրեսյանի նկատմամբ քրեական հետապնդում չիրականացնել և քրեական գործով վարույթը կարճել:   Ըստ քննիչի՝ քրեական գործով բավարար ապացույցներ ձեռք չեն բերվել՝ Խաչիկ Լևոնյանի կողմից վատնման եղանակով առանձնապես խոշոր  չափերով գույք հափշտակելու և  Էդուարդ Ապրեսյանի կողմից ակնհայտ  կեղծ եզրակացություն տալու վերաբերյալ,  իսկ նոր ապացույցներ ձեռք բերելու բոլոր հնարավորությունները սպառվել են:  Ավելին, քննիչը եզրակացրել էր՝  սկզբանական դիմումներում մատնանշված հանգամանքներն իրականում    կրում են քաղաքացիաիրավական բնույթ: 

 

«Փաստինֆո»-ի ունեցած տեղեկություններով՝ օրերս դատախազությունը վերացրել է՝ քրեական գործով վարույթը կարճելու, Խաչիկ Լևոնյանի և Էդուարդ Ապրեսյանի նկատմամբ քրեական հետապնդում չիրականացնելու   մասին քննիչի  որոշումը:   Քրեական գործի նախաքննությունը հանձնարարվել է   ՀՀ ոստիկանության   քննչական գլխավոր վարչության Լոռու մարզի քննչական բաժնին, իսկ քրեական գործի նախաքննության նկատմամբ դատախազական հսկողությունն ու դատավարական ղեկավարումը՝  Լոռու մարզի դատախազին:

 

Վերահսկող մարմնի գնահատմամբ՝  քրեական գործի նախաքննությունը  կատարվել է թերի, չի ապահովվել գործի  հանգամանքների բազմակողմանի, լրիվ և օբյեկտիվ հետազոտումը, Խաչիկ Լևոնյանի, Էդուարդ Ապրեսյանի արարքներին ճշգրիտ քրեաիրավական գնահատականներ չեն տրվել: Ուստիև՝ անհիմն է   քրեական գործով վարույթը կարճելու և  քրեական հետապնդում չիրականացնելու մասին որոշումը, չեն հավաքվել բոլոր ապացույցները, իսկ ձեռք բերված ապացույցներին պատշաճ գնահատական չի տրվել։ 

 

Քրեական գործի նախաքննությամբ մասնավորապես պարզվել է, որ Լոռու մարզի հարկային տեսչության հայցադիմումի հիման վրա ՀՀ տնտեսական դատարանը 2002 թ. փետրվարի 25-ի վճռով «Լուսատեխնիկ» ՓԲ ընկերությունը ճանաչվել է սնանկ՝ ապահովելով պետական բյուջեի նկատմամբ 323.558.800 գումարի բռնագանձումը: Ընկերությունը Լոռու մարզի  ընդհանուր իրավասության դատարանում գտնվում է լուծարման գործընթացում, ու վերջնական դատական ակտ չի կայացվել:

 

 Պարզվել  է նաև, որ «Լուսատեխնիկ» ՓԲ  ընկերության՝ վերոհիշյալ շենք-շինությունները  վաճառվել են սնանկության գործերի  կառավարիչ Խաչիկ Լևոնյանի կողմից, որոնց արժեքները գնահատվել են «Է.Ապրեսյան» ՍՊԸ փորձագետ Էդուարդ Ապրեսյանի կողմից:

 

Ըստ դատախազության՝ նախաքննությամբ ձեռք բերված ապացույցներից անգամ երեւում է, որ շենք-շինությունները վաճառելու համար  հայտարարվել են աճուրդներ, որոնց  միջոցով չվաճառվելու պատճառով դրանց  արժեքները ցածրացվել են, արդյունքում  հիմնականում վաճառվել են դատարանի որոշումներով՝ ուղղակի վաճառքի եղանակով:

Պարզվել է նաև, որ մի շարք գնորդների հենց Խաչիկ  Լևոնյանն է ուղղորդել գնել շենք-շինությունները, այդ թվում՝ իր քրոջ ամուսին Յուրա  Պողոսյանին, որին ուղղակի վաճառքի  եղանակով  1.600.000 դրամով վաճառել է  ընկերությանը պատկանող Աղայան 95/10 հասցեում գտնվող 3 հարկանի արտադրական մասնաշենքի 1-ին հարկը և կից կառույցի 1-ին և 2-րդ հարկերը՝ ընդհանուր 2160 քմ. տարածքով, որի շուկայական արժեքը փորձաքննության եզրակացությամբ գնահատվել է 31.341.000 դրամ:

 

Ի դեպ, նշված տարածքում Յուրա Պողոսյանի կողմից իրականացվել է եվրոդռների ու պատուհանների արտադրություն և աշխատանքից ազատվելուց հետո այդ արտադրությունը շարունակել է կազմակերպել Խաչիկ Լևոնյանը, իսկ վերջինիս գործողություններին քննչական մարմինը որևէ գնահատական չի տվել:

 

«Լուսատեխնիկ» ՓԲ ընկերության սնանկութան գործերով կառավարիչներ Սեյրան Հակոբյանն ու Գարիկ  Մկրտչյանը ցուցմունքներ են տվել այն  մասին, որ կառավարիչ Խաչիկ Լևոնյանից  ընկերության գույք չեն ստացել, այլ ստացել են միայն հաշվապահական փաստաթղթեր, իսկ Գ.Մկրտչյանը հայտնել է նաև, որ ընկերության բոլոր փաստաթղթերը գտնվում են Լոռու մարզի ընդհանուր իրավասության դատարանում:

 

Ճիշտ է՝ քննիչը գրություններ է հասցեագրել Լոռու  մարզի ընդհանուր իրավասության դատարան  և խնդրել տրամադրել «Լուսատեխնիկ» ՓԲ ընկերության հաշվապահական փաստաթղթերը, ինչպես նաև՝ «Է.Ապրեսյան» ՍՊԸ փորձագետ Էդուրադ Ապրեսյանի կողմից շենք-շինությունները գնահատելու վերաբերյալ հաշվետվությունները, եզրակացությունները, դրանց կազմման համար հիմք հանդիսացող փաստաթղթերը կամ պատճենները։ Սակայն, Նախաքննությամբ  համապատասխան փորձաքննություն նշանակելու միջոցով չի պարզվել, թե «Է.Ապրեսյան»  ՍՊԸ փորձագետ Էդուարդ Ապրեսյանի կողմից վերոհիշյալ շենք-շինությունները ինչ մեթոդով և ինչ փաստաթղթերի հիման վրա են գնահատվել և արդյոք դրանց արժեքները ճիշտ են որոշվել:

 

Վերացնելով կարճելու մասին որոշումը՝ վերահսկող դատախազը նշել է, որ  անհրաժեշտ է նշանակել լրացուցիչ տնտեսագիտական, դատաապրանքագիտական, շինարարատեխնիկական փորձաքննություն և պարզել, թե որքան են կազմում «Լուսատեխնիկ» ՓԲ ընկերության հիշյալ շենք-շինությունների շուկայական արժեքները՝ դրանք վաճառելու ժամանակ, դրանց վաճառքից որքան գումարներ է ստացվել և որքան պարտավորություններ են մարվել և արդյոք այդ գումարներից չեն հափշտակվել:

 

Շինարարատեխնիկական  և ապրանքագիտական համալիր փորձաքննության միջոցով անհրաժեշտ է պարզել, թե շենք-շինությունների գնորդները դրանց վրա ցուցմունքներում նշված գումարները ծախսել և վերանորոգման աշխատանքներ կատարե՞լ են, թե՞ ոչ:

 

Շենք-շինությունների գնորդների հարցաքննություններով պարզել նաև, թե նրանք Խաչիկ Լևոնյանից դրանք ուղղակի կամ աճուրդով գնելուց վերջինիս, որպես կաշառք,  որևէ գումար տվե՞լ են, թե՞ ոչ :

Վերոհիշյալ և այլ անհրաժեշտ  գործողությունները կատարելուց հետո միայն հնարավոր կլինի վերջնական  ճշգրիտ քրեաիրավական գնահատական տալ  վերոհիշյալ անձանց արարքներին:

Փաստորեն, շուրջ 3 տարի ոստիկանության քննչական բաժինը չի կարողացել կատարել անգամ ամենատարրական քննչական գործողությունները, իսկ դատախազության ներգործության միջոցներն էլ դանդաղել են։