Փաստ ինֆո

 

Պաշտոնեական լիազորություններն անցնելու, մասնավորապես, խոշտանգումների և պաշտոնեական կեղծիք կատարելու վերաբերյալ Ոստիկանության Կենտրոնականի բաժնի 2 օպերլիազորների դեմ գործով այսօրվա դատական նիստում որոշում կայացվեց նշանակել   դատաբժշկական լրացուցիչ փորձաքննություն: 

 

Երևանի Կենտրոն և Նորք-Մարաշ վարչական շրջանների դատարանը՝ դատավոր Մնացական Մարտիրոսյանի նախագահությամբ, այսպիսով բավարարեց  ՀՀ ոստիկանության Երևանի վարչության Կենտրոնականի բաժնի քրեական հետախուզության բաժանմունքի օպերլիազորներ Խաչիկ Բախբուդարյանի և Արտակ Բարսեղյանի պաշտպան Լիպարիտ Սիմոնյանի միջնորդությունը: 

Ըստ պաշտպանի, դատաբժիշկ փորձագետի եզրակացությունը թերի է, դրա հետևություններն էլ պարզ չեն: Դատարանում հարցաքննված փորձագետ Ա.Դալլաքյանը նշել էր, որ քանի դեռ  առկա չէր քիթկոկորդականջի բժշկի մանրամասն բացատրությունը, ինքը չէր կարող որոշել տուժող Ռոբերտ Հովսեփյանի «ականջի թմբկաթաղանթի տրավմատիկ թափածակում»  վնասվածքի վաղեմության ժամկետը: 

 

Պաշտպանի կողմից Դատարանին ներկայացվել է  քիթկոկորդականջի բժիշկ Վազգեն Միրախորյանի բացատրությունն, ըստ որի 18.10. 2012թ. տուժող Ռոբերտ Հովսեփյանի զննության ժամանակ վնասվածքի վաղեմության ժամկետը հնարավոր չի եղել որոշել, զննման ժամանակ թմբկաթաղանթի վրա արյան հետքեր չեն եղել: 

Դատարանի որոշմամբ,  փորձագետին հարցեր պետք  է առաջադրվեն՝ պարզելու, թե վնասվածքի վաղեմության ժամկետը համապատասխանում է տուժողի կողմից նկարագրված դեպքի օրվան, թե ոչ: Հիշեցնենք, որ ըստ մեղադրական եզրակացության, «ծեծի ժամանակ Խաչիկ Բախբուդարյանը ձեռքերի ափերով հարվածել է  ոստիկանության բաժին բերման ենթարկված Ռոբերտ Հովսեփյանի ականջներին, ինչի հետևանքով տեղի է ունեցել ձախ ականջի թմբկաթաղանթի տրավմատիկ թափածակում։ Գործադրված բռնության հետևանքով Ռոբերտ Հովսեփյանի առողջությանը պատճառվել է միջին ծանրության վնաս՝ առողջության տևական քայքայումով»։

 

Փորձագետը նաև պետք է պատասխանի, թե արդյոք վնասվածքը կարող էր առաջանալ երկու ձեռքերի ափերով երկու ականջներին միաժամանակյա հարվածի հետևանքով: 

 

Այսօր Դատարանում հարցաքննվեց  վկա Հենրիկ Գրիգորյանը: Նա հայտնեց, որ ինքն ականատես է եղել ոստիկանների կողմից մի շարք անձանց բերման ենթարկելու գործողությանը, որը  տեղի է ունեցել ցերեկային ժամի: Ամբաստանյալները ևս պնդել էին, որ 2012թ. հոկտեմբերի 4-ին՝ ներկայանալով որպես ոստիկանության աշխատակիցներ, ոստիկանության բաժին են բերման ենթարկել գողությունների մեջ կասկածվող, նախկինում դատապարտված, սույն գործով տուժող Ռոբերտ Հովսեփյանին` ընկերների հետ միասին: Այսինքն՝ օպերլիազորները հերքել են նախաքննական մարմնի տվյալը, թե հիշյալ անձինք ոստիկանության բաժին բերման են ենթարկվել հոկտեմբերի 3-ին: Այդպիսով ամբաստանյալները միաժամանակ հերքել են  մեղադրանքն, ըստ որի իրենք «կատարել են պաշտոնեական կեղծիք, կազմել ակնհայտ կեղծ արձանագրություն՝ իբրև Ռոբերտ Հովսեփյանին ոստիկանության բաժին բերման են ենթարկել 2012 թվականի հոկտեմբերի 4-ին՝ ժամը 15-ին, և գրանցել բերման ենթարկված անձանց հաշվառման գրքում»։