Փաստ ինֆո

«Փաստինֆո»-ն  արդեն տեղեկացրել է, որ փաստաբան  Էդուարդ Ասլանյանը հաղորդում է ներկայացրել դատավորի դեմ: Ըստ փաստաբանի` Շիրակի մարզի դատարանի դատավոր Հայկանուշ Միքայելյանը  2014թ. սեպտեմբերի 4-ին վարույթ է ընդունել դատարանի քննությանը ոչ ենթակա հայցադիմումն՝ օրենքի խախտումներով:
 
Ըստ փատաբանի,  քաղհայցի հիմքում  դրված է վաշխառության վերաբերյալ ակնհայտ տեղեկություններ պարունակող բովանդակությամբ պարտավորագիր: Դրանում, մասնավորապես, առկա է 10 տոկոս տոկոսադրույքով գումարի պահանջ՝ մինչդեռ ՀՀ Կենտրոնական բանկի սահմանած բանկային տոկոսի հաշվարկային դրույքի կրկնապատիկը՝    2 տոկոսը, գերազանցող չափով տոկոսներ ստանալը քրեորեն պատժելի  է:

Մանրամասնելով գործի նախապատմությունը` փաստաբանը «Փաստինֆո»-ին հայտնեց, որ դատավորը  որպես դատարանի քննությանն ոչ ենթակա հայց պետք է մերժեր հայցադիմումի ընդունումը, ավելին՝ քաղաքացիական հայցի հիմքում դրված հիշյալ փաստաթուղթը տեսնելով՝  պետք է հանցագործության մասին մասնավոր որոշում կայացներ, կցեր իր միջնորդագրին և ուղարկեր իրավապահ մարմիններին՝ տվյալ դեպքում դատախազին,  ինչը չի արել:  Հակառակը՝  այդ փաստաթուղթը  որպես ապացույց դրել է հայցադիմումի հիմքում և  քննում է: «Քրեական գործ է հարուցվել վաշխառության փաստով, քննություն է գնում Քննչական կոմիտեում,  իսկ ինքը շարունակում է այդ փաստաթուղթն օգտագործել որպես քաղաքացիական գործի իրավահարաբերության հիմք, ավելին՝ արգելանքի է վերցրել մարդու աշխատավարձը, տունը»:

Փաստաբանը  դժգոհություն հայտնեց նաև այն կապակցությամբ, որ ինքը քաղաքացիական գործի քննությունը կասեցնելու գրավոր միջնորդություն է ներկայացրել դատարանին, քանի որ  հարուցված քրեական գործ կա, սակայն դատարանը մերժում է՝  հայտարարելով, որ ապացույց չէր ներկայացվել: «Տվյալ դատավորի համար ոստիկանության կողմից տրված կտրոն-ծանուցագիրը  քրեական դատավարության կարգով ընթացող գործընթացների  ապացույց չէ»,- նշեց Է.Ասլանյանը՝ հավելելով, որ դատավորն ասում է՝ «իմ համար խոչընդոտ չի կարող հանդիսանալ նույնիսկ եթե քրեական գործ հարուցված լինի», և մերժում է:

Դատավորն, ըստ փաստաբանի, թույլ է տալիս նաև էթիկայի խախտումներ՝ խրատում է, ձայն է  բարձրացնում, հոգեբանական ճնշում գործադրում՝  «դու բան չես հասկանում,  Ասլանյան»: Դատավորը նախատում է՝«ինչո՞ւ ես փաստաթուղթը գրասենյակով մտցնում, բեր միանգամից ինձ: Մանկապարտեզի երեխա է իր համար գտել,  միանգամից բերեմ տամ իրեն, որ հետո շպրտի երեսիս,  ասի՝ չեմ ընդունում»,- նկատեց փաստաբանը: 

Է.Ասլանյանն ընդգծեց, որ ամբողջ նիստի ընթացքում՝սկզբից մինչև վերջ, ինքը դատարանին ինքնաբացարկի միջնորդություն ներկայացնելու մտադրության մասին է հայտնել, իսկ դատավորն ասում է՝  «համբերիր, հերթով, այդքան միջնորդություն ես ներկայացրել», այսինքն՝ «հերթի է դնում» ինքնաբացարկի միջնորդությունը:

Պատասխանողին ներկայացնող փաստաբանը նշեց, որ թեև հայցվորը հայցի մի մասից հրաժարվել է, այսինքն՝  հրաժարված մասով չկա վեճ, դատավորը գործ է լսում այդ մասով, այդքան մասով արգելանք է դրել: «Ես իրեն բացատրում եմ, չի ուզում ընդունել, այդ մասով արգելանքը չի հանում, դրա համար դիմել եմ իրավապահ մարմինների, օրենքի,  Սահմանադրության, օրենսգրքերի աջակցությանը, դիմելու եմ Փաստաբանների պալատի գիտավերլուծական կենտրոնին»,- ասաց Էդուարդ Ասլանյանը:

Փաստաբանը ներկայացրեց դատավորի  անցյալի «գլուխգործոցներից» մեկը՝ մահացած ճանաչված մարդը գալիս է, դիմում  գրում, որպեսզի վճիռը վերացնեն,  քսերոպատճեն է ներկայացնում: Դատավորն գործն ընդունում է վարույթ,   վճիռ է կայացնում՝  մերժել պահանջը, որովհետև փաստաթուղթ չի ներկայացրել,  այսինքն՝  մարդուն զրկում է «վերակենդանանալու»  հնարավորությունից՝  մարդը բաց է թողնում վերաքննության կարգով բողոքելու հնարավորությունը: Մինչդեռ դատավորը, փաստաբանի համոզմամբ,  պետք է ուղղություն ցույց տար քաղաքացուն՝  պետական տուրք վճարիր, դատարանի արխիվից բեր փաստաթղթի կրկնօրինակը, իսկ մինչև այն ներկայացնելը դատավորը  հայցը պետք է  վերադարձներ:  Դրա փոխարեն դատավորը վճիռ է կայացրել՝  մարդուն թողնելով  այդ ձևով մահացած: «Ես դիմելու եմ Արդարադատության խորհուրդ՝ մենակ այդ առանձին մասով»,- ասաց փաստաբանը:

Թեկուզև  Էդուարդ Ասլանյանը շատ  է  հարգում իր հաղորդումը քննող Հատուկ քննչական ծառայության քննիչների ինտելեկտը՝ սակայն  չի  վստահում նրանց՝  «շատ գրագետ, կիրթ,  հմուտ, բայց ենթակա մարդիկ են, դատավորի հարց է, փակելու են, ծածկադմփոց են անելու»:

Դրա  նախանշաններից է այն, որ երբ ինքը Շիրակի մարզի դատախազին հաղորդում է ներկայացրել, այնտեղից   պատասխան է ստացել՝  «Ձեր արծարծած հարցերը կրում են քաղաքացիաիրավական բնույթ,  գնացեք,  դիմեք դատարան»:

«Իրենց ուշքն ու միտքը գործ փակելն է»,  որպես   իրավապահ մարմինների նկատմամբ հսկողություն իրականացնող վերադաս՝    անգործություն են ցուցաբերում.  «Դրա համար էլ առավոտ կրակում են, իրիկուն կրակում են, ես էլ այսպես եմ ման գալիս»,- ասաց փաստաբանը  ցույց տալով իր կրած զենքը: «Ամիսներ առաջ դեպքերի ու զարգացումների հետևանքով իզուր չէ, որ ես օրինական զենք եմ կրում»,- ասաց Է.Ասլանյանը: «Այդ քաղաքացիական գործի հե՞տ է կապված զենք կրելը» մեր հարցին փաստաբանը  պատասխանեց՝ «ամեն ինչ մի բերեք,  կապեք այս գործին, ես մի  օր չեմ փաստաբան»: