Փաստ ինֆո

Այն, ինչի մասին խոսում է Փաշինյանը՝ պատերազմի վերաբերյալ ժողովրդի ունեցած ֆոբիների նկարագրությունն է, ինչպե՞ս դա կարելի է հռչակել գաղափարախոսություն։ Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցը՝ անդրադառնալով Նիկոլ Փաշինյանի հայտարարությանը, թե ժողովուրդն աջակցում է իր առաջ քաշած՝ «Իրական Հայաստան» օրակարգին։

«Դրանք կապիտուլյացիայի, անատամ պացիֆիզմի մասին մտքեր են, ինչպե՞ս կարելի է բարեկեցությունը, ապրելու գաղափարը հակադրել ազգային ինքնությանը։ Եթե այդ ճանապարհով գնանք՝ մի օր էլ ասելու է՝ հանուն ապրելու իրավունքի կամ գաղափարախոսության պետք է հրաժարվենք պետականություն ունենալու իրավունքից, կամ կարող է ասել, որ Հայաստանը Ռուսաստանի լծից ազատված ու ադրբեջանաթուրքական լծի տակ հայտնված տարածք է։ Զարմանալի է, ի՞նչ է առհասարակ նշանակում ժողովրդական գաղափարախոսություն»։

Դիտարկմանը, թե չնայած Փաշինյանի պնդմանը, այդուհանդերձ, հարցումները վկայում են, որ իրականում նա ունի հանրության միայն 10 տոկոսի աջակցությունը՝ քաղաքագետը նշեց, որ ակնհայտ է, որ իշխանությունն այս պահին ժողովրդի վստահության մանդատը չունի։

«Այո, ժողովուրդը վախենում է պատերազմից, դա բնորոշ է բոլոր ժողովուրդներին, որոնք պարտություն են կրել, այո, պատերազմի նկատմամբ ժողովուրդն օբյեկտիվորեն ֆոբիաներ ունի, բայց այդ ֆոբիաները վերցնել ու ասել, որ սա գաղափարախոսություն է, որ ժողովրդի ու իշխանության մեջ ներդաշնակություն կա՝ ողբերգություն է»։

Հարցին, թե ինչպես է ստացվում, որ չնայած միայն 10 տոկոս աջակցությանը՝ մենք նաև ընդվզում չենք տեսնում՝ քաղաքագետն ասաց, որ սա արդեն ընդդիմադիր հարթակի արդյունավետության խնդիրն է։

«Եթե ընդդիմադիր հարթակը հստակ քաղաքական ծրագրեր, խոսույթ, գնահատական տար Հայաստանի 3-րդ Հանրապետության բոլոր շրջաններին, փաստական գնահատական տար, ներկայացներ «նիկոլական» Հայաստանի իրական տեսլականը, այս պարագայում հասարակական ավելի մեծ կոնսոլիդացիա կլիներ։ Սա նշանակում է, որ բոլորս թերացել ենք, քանի որ Նիկոլից 1.5 մլն դժգոհ մարդ կա, բայց հրապարակ գալիս են լավագույն դեպքում 30-35 հազար մարդ»։

Աղբյուր` Փաստինֆո