Փաստ ինֆո

«Չենք հասցնում արձագանքել ոստիկանության հետ կապված բռնությունների դեպքերին, դրանք շատ են»,- Մեդիա կենտրոնում այսօր տեղի ունեցած քննարկմանն ասաց «Իրավունքների պաշտպանություն առանց սահմանների» ՀԿ նախագահ Արաքս Մելքոնյանը՝ աննախադեպ որակելով Սամվել Վարդանյանի նկատմամբ կիրառված բռնարարքը։

«Այն աննախադեպ է, տեղի ունեցածը պլանավորված հանցագործություն է։ Ես իրապես մտահոգված եմ այն հանգամանքով, որ ոստիկանության մասնակցությամբ ու ոստիկանության միջոցով բռնության նոր մեթոդների ենք ականատես լինում»,- ասել է ՀԿ նախագահն ու ավելացրել, որ այս դեպքում ոստիկանությունը ոչ միայն ընդգրկված է եղել, այլև իրականացրել են նրա մասնակցությամբ։

«Եթե դիմակավորված են, ես խորը կասկածներ ունեմ, որ կարող են լինել հենց ոստիկանության աշխատակիցներ։ Նավոյանի բռնության դեպքը, որ նկարահանել էին ու մենք ականատես էինք եղել, նույնանման մեխանիզմ էր՝ ուղղակի ոչ դիմակավորված»,-հիշեցրեց Արաքս Մելքոնյանը։

Իրավապաշտպանը մտահոգություն հայտնեց գործողության ձևի համար, որ ՀՀ-ում առհասարակ նմանօրինակ բռնության ձևերի տարածում կա։ «Մտահոգիչ է նաև, որ քաղաքական իշխանության հրապարակային խոսքի համատեքստում կազմակերպված չասեմ, բայց միջամտություն միանշանակ եղել է, ս իր որոշակի արարարքի համար պատժիչ գործողություն էր։ Միանշանակ է, դա այնքան ակնհայտ է, որ երկրորդ կարծիք լինել չի կարող լինել»,- նշեց տիկին Մելքոնյանը՝ ավելացնելով, որ այդ մասին են վկայում նաեւ քրեական վարույթն ուշացումով հարուցելը, իշխանական անձանց՝ իրար հաջորդող հրապարակումները։

«Մինչև քաղաքացիական հասարակությունը չի արձագանքում, վարույթ չի՞ հարուցվում։ Այս դեպքում վարույթը հարուցվել է մեր կազմակերպության հաղորդման հիման վրա», - նշեց Արաքս Մելքումյանը։Նա կասկած ու մտահոգություն հայտնեց, որ ո՛չ քննչական կոմիտեն, ո՛չ դատախազությունը այս գործն ունակ չեն անկախ քննելու՝ հենց մատնաշված հանգամանքների պատճառով։ «Ձերբակալվածների պահման վայրի արձանագրության հիման վրա արդեն պետք է քրեական վարույթ հարուցվեր, չսպասեին քաղհասարակության արձագանքին։ Երկու օր առնվազն ուշացրել են։ Քաղաքական կամք, տրավական համակարգի ջանասիրություն այդ հարցում չենք տեսել», - նշեց «Իրավունքների պաշտպանություն առանց սահմանների» ՀԿ նախագահ Արաքս Մելքոնյանը։

Հիշեցնենք, որ ՔՊ պատգամավորին հակահայ անվանելու համար ձերբակալված քաղաքացաին աննախադեպ խոշտանգման է ենթարկվել։ ՁՊՎ տեղափոխելիս՝ ուղեկցող ոստիկանները ճանապարհին կանգնել են ու գնացել, իբր, բնական կարիքները հոգալու, իսկ ձերբակալվածին թողել միայնակ, որի ընթացքում մոտեցել են դիմակավորված անձինք, նրան հանել մեքենայից, խոշտանգել՝ պատճառելով ֆիզիկական ցավ ու հոգեկան տառապանք ու նորից տեղափոխել մեքենայի մեջ։ Այնուհետեւ ոստիկանները վերադարձել են ու իրենց ճանապարհը շարունակվել ՁՊՎ։ Այստեղ անմիջապես արձանագրել են նրա վրա առկա վնասվածքներն ու այդ մասին ծանուցում ուղարկել վարույթն իրականացնող մարմնին, բայց քննիչը հապաղել է վարույթի նախաձեռնումը։

Նկատենք, որ անգամ «Ֆրիդոմ Հաուս» միջազգային, հեղինակավոր իրավապաշտպան կազմակերպությունը արձանագրել էր, որ դատախազությունը Հայաստանում համերաշխ է իշխող քաղաքական ուժի հետ։

Աղբյուր` Փաստինֆո