Փաստ ինֆո

Քննիչը որոշում է կայացրել՝ ՔՊ-ական Հակոբ Ասլանյանի և Սամվել Վարդանյանի գործով վերջինիս նկատմամբ դատաբժշկական փորձաքննություն նշանակելու մասին։ Այս որոշումը կայացվել է Սամվել Վարդանյանի նկատմամբ՝ ՁՊՎ ուղևորվելու ճանապարհին կիրառված բռնության առնչությամբ։ Այս մասին լրագրողների հետ զրույցում ասաց պաշտպան Ռուբեն Մելիքյանը։

Փաստաբան Վարազդատ Հարությունյանը մանրամասնեց, որ երեկ Սամվելին տեսել են քննչական գործողությունների ժամանակ, որի ավարտից հետո՝ Երևան քաղաքի քննչական վարչության շենքից, բաժանվել են, Սամվելի վիճակը շատ նորմալ էր, որովհետև Հակոբ Ասլանյանի հասցրած հարվածները մեծ վնաս չէինհասցրել։

«Ես և պարոն Մելիքյանն այդ ընթացքում Սամվել Վարդանյանին տեսել ենք նույն վիճակում՝ հագուստի, որևէ վնասվածք չի եղել, իսկ երբ պարոն Մելիքյանը տեղեկացրեց, որ այդպիսի դեպք է եղել և ես գնացի Դատաբժշկական գիտագործական կենտրոն, Սամվելին բերեցին, տեսա՝ նրա տաբատի ծնկների հատվածում թարմ խոտերի հետքեր էին, դեմքի ճակատային հատվածն ու ձեռքը ուռած էր, ձախ քունքը վնասված էր՝ արյան զեղմամբ, ուսը, ձեռքը քերծված էին»,- ասաց Հարությունյանը։

Ապա նա փոխանցեց դեպքի վերաբերյալ Սամվելի պատմածը․ «Երբ ոստիկանության աշխատակիցների ուղեկցությամբ դուրս են եկել՝ ՁՊՎ մեկնելու համար, ընդամենը 1-1,5 րոպե հեռավարության վրա ոստիկանական մեքենան կանգնել է և ոստիկանության՝ քաղաքացիական հագուստով երկու աշխատակիցները հայտնել են, որ կարիք ունեն բնական կարիքներ հոգալու, մեքենայից դուրս են եկել, ինչից հետո ամբողջությամբ սև հագած դիմակավորված անձինք (Սամվելը երեք հոգու է ֆիքսել Վ․ Հ․), մեքենայից նրան դուրս են հանել՝ մի քանի մետր այն կողմ են տարել՝ խոտերի մեջ, նրան չոքեցրել, գլուխը հարվածել գետնին։ Ըստ երևույթի՝ ճակատի ուռած մասը հենց այդ մասից է եղել։ Սկսում են ձեռքերով հարվածել։ Այդ ամբողջ ընթացքում այդ գործընթացը ուղեկցվել է սեռական բնույթի հայհոյանքներով՝ վերջին խոսքերով։ Ընդ որում, ծեծողները պահանջելեն Սամվելից, որ կրկնի իր նկատմամբ սեռական բնույթի հայհոյանքները։ Բնականաբար նա հրաժարվել է։ Թքել են նրա վրա։ Այնուհետև՝ նրան՝ չոքած վիճակում, ձեռքերը՝ հետևի կողմից ձեռնաշղթայված, տաբատը իջեցրել են՝ փայտը կամ դուբինկան դեմոնստրատիվ պահել են ոտքերի արանքում, ուրիշ գործողություն չեն արելի, իհարկե, բայց պահել են ոտքերի արանքում՝ այդպիսով ցանկանալով ինչ-որ բան ցուցադրել, սպառնալ կամ վախեցնել»։ Ծեծը տևել է, ըստ Սամվելի, մոտ 3-4 րոպե, ծեծը ավարտելուց հետո քարշ են տվել, մեքենայի մեջ գցել, ինչից հետո քաղաքացիական հագուստով ուղեկցող ոստիկանները հայտնվել են, Սամվելը հևացել է, ոստիկաններն էլ ասել են՝ «քեզ ինչ է եղել, լավ էիր»։

Հարությունյանի խոսքով՝ այդ դիմակավորված անձանց ցուցաբերած վարքից լսել են ադրբեջանական գերությունից վերադարձած ռազմագերիներից։ Հարությունյանը հայտնեց, որ Սամվելն այս պահին առողջական խնդիրներ չունի։ Ռուբեն Մելիքյանն էլ վրդովմունքով արձանագրեց, որ ԶԼՄ հաղորդումների հիման վրա, եթե այս դեպքում, վարույթ չի նախաձեռնվել, ուրիշ որ դեպքում պետք է վարույթ նախաձեռնվեր։

«Պետության վերահսկողության տակ գտնվող մարդուն խոշտանգել են՝ արժանապատվությունը նվաստացնելու ձևով»,- վրդովմունքով արձանագրեց Մելիքյանը։

Աղբյուր` Փաստինֆո