Փաստ ինֆո

Անդրանիկ Սիմոնյանի ցուցմունքը միակն ու վճռորոշն է։ Այս գործով այլ ապացույց չկա։ Թե ինչու չի ներկայանում նիստերին՝ չեմ կարող ասել, միգուցե գտնում է, որ արդեն ԱԱԾ տնօրենի տեղակալ է, գեներալ է և իրեն հարիր չէ ներկայանալ դատարան՝ ինչ-որ մի շարքային դատավորի կամ Վարդազարյանի, կամ Վարդազարյանի ներկայացուցիչների հարցերին պատասխանելու համար, նա արդեն ԱԱԾ տնօրենի տեղակալ է՝ ո՞նց կլինի, չի իջնում մեր մակարդակին։ Հեգնում եմ, բայց այլ պատասխան չեմ գտնում։ Այս մասին «Փաստինֆո»-ի հետ զրույցում ասաց ԲԴԽ նախկին նախագահ Ռուբեն Վարդազարյանը։

Անդրադառնալով «Freedom House» իրավապաշտպանական կազմակերպության զեկույցին,որով ՀՀ դատական համակարգը 1-ից 7 բալային համակարգի սանդղակով գնահատել է 2.75 միավորով, ինը կիսաավտորիտար ռեժիմին է բնորոշ՝ Վարդազարյանը նախ հումորով արձագանքեց՝ նշելով․ «Գիտեք, երբ դպրոցում դասատուն հարց է տալիս, ասում՝ «ապրես, նստիր՝ 2»։ Հիմա փաստորեն մեր դատական համակարգն այդ «ապրես, նստիր՝ 2»-ին կամ անբավարարին արժանացավ»։

Վարդազարյանը նշեց՝ հետաքրքիր է, թե 2,75-ը որտեղից․ «Դա ինչն է՝ 2,75։ Քրեական արդարադատության ոլորտում՝ խայտառակ վիճակում ենք, քաղաքացիական ոլորտում՝ ծանրաբեռնվածության խնդիր կա։ Միայն այն հանգամանքը, որ տարիներով գործեր են քննվում՝ ուշացած արդարադատություն է։ Այս պայմաններում այդ 2,75-ը որտեղից հայտնվեց։ Այնուամենայնիվ ունենք մեկ ատյան, որտեղ քիչ, թե շատ՝ արդարադատություն կա՝ Վարչական դատարանն է՝ վարչական արդարադատության ոլորտն է։ Ինձ թվում է՝ այդ 2,75-ը վարչական արդարադատության ոլորտն է ստացել, որովհետև եթե քրեական ու քաղաքացիական ոլորտը լիներ՝ կլիներ 0,10 »։ Ինչ վերաբերում է ՔՊ-ական պատգամավոր Արթուր Հովհաննիսյանի հայտարարությանը, թե Ֆրիդոմ հաուսը չէ, որ պետք է որոշի՝ ՀՀ-ում ժողովրդավարություն կա, թե ոչ, Վարդազարյանը նշեց, որ ինքը շատ կցանկանար, եթե մենք որոշեին, մեր գնահատականը լիներ։

«Ցավոք, մեր հասարակությունն այնքան է բևեռացվել, որ երբ լսում ես ՔՊ-ականներին, ապա արդարադատությունը հոյակապ վիճակում է, եթե լսում ես ընդդիմադիրներին, ապա արդարադատություն ընդհանրապես չունենք։ Ճշմարտությունը մեջտեղում է գտնվում և ունենք այն, ինչ ունենք»,- ասաց Ռուբեն Վարդազարյանը՝ ցավով արձանագրելով, որ համաձայն է «Ֆրիդոմ Հաուսի» գնահատականների հետ և 2,75 միավորն այն գնահատականն է, որին արժանի է մեր դատական իշխանությունը։

Հիշեցնենք, որ «Freedom House» միջազգային իրավապաշտպան կազմակերպությունը, անցումային կամ այսպես կոչված «հիբրիդային» երկների վերաբերյալ տարեկան զեկույցում արձանագրել է Հայաստանում ժողովրդավարական կառավարման ազգային վարկանիշի անկում։ Մասնավորապես, պետական կառավարման համաթիվը նախորդ տարվա համեմատ նվազել է՝ 2,5-ից դառնալով 2,25, ինչի պատճառով էլ նահանջ է գրանցվել ժողովրդավարության միավորի՝ 3,14-ից դառնալով 3,07։

Կազմակերպությունն անդրադարձել է նաև իրավապահ համակարգին՝ նշելով, որ դատախազությունը՝ իշխող կուսակցության հետ համերաշխ է, արձանագրել դատական համակարգում նկատվող խնդիրներին, ֆիքսել Կարեն Անդրեասյանի քպական լինելու հանգամանքը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո