Փաստ ինֆո

«Մենք մեր երկիրը տանում ենք «Ալեքսանդրապոլի պայմանագիր 2-ի», որ մեզ նորից ռուսները և թուրքերը կիսեն։ «Փաստինֆո»-ի հետ զրույցում նման գնահատական հնչեցրեց Սթենֆորդի համալսարանի քաղաքագիտության դոկտոր Արթուր Խաչիկյանը՝ անդրադառնալով հայ-ռուսական հարաբերություններում նկատվող լարվածության աճին, ՌԴ արտգործնախարար Սերգեյ Լավրովի նախօրեին հնչեցրած գնահատականներին։

«Հայաստանի իշխանությունները գիտակցաբար փչացնում են հարաբերությունները Ռուսաստանի հետ»,- ի մասնավորի ասել է Լավրովը։

Արթուր Խաչիկյանն արձանագրեց, որ Ռուսաստանի հետ հարաբերությունների դեգրադացիան շարունակվում է՝ ՀՀ կառավարության 2018-ից վարած արտաքին քաղաքականությունը որակելով անմեղսունակ։

«Նկատե՛ք, մեր տարածաշրջանում որևէ երկիր այսպես մտածված ձևով չի տապալում իր հարաբերությունները ՌԴ հետ՝ ո՛չ Վրաստանը, ո՛չ Ադրբեջանը, ո՛չ Թուրքիան , ո՛չ Իրանը, եւ մենակ մենք՝ քայլ առ քայլ տապալում ենք ամեն ինչ Ռուսաստանի հետ, Ռուսաստանը դարձնելով թշնամի և Ռուսաստանին հրելով դեպի Բաքու և Անկարա, որպեսզի նոր պայմանավորվածության գան և մեզ պատժեն, կիսեն։ Սա զարմանալի է, որ այսպիսի անհեթեթ և անմեղսունակ արտաքին քաղաքականություն ենք մենք վարում», - մեկնաբանեց քաղաքագետը։

Նրա դիտարկմամբ՝ իրականում կարող էինք օգտագործել և՛ Ռուսաստանում մեր հնարավորությունները, և՛ արևմուտքում, և օգնություն ստանալ թե Ռուսաստանից, թե Արևմուտքից, կարող էինք վերականգնել մեր երկիրը, ինչը չենք անում։

«Մենք մեր երկիրը տանում ենք «Ալեքսանդրապոլի պայմանագիր 2-ի», որ մեզ նորից ռուսները և թուրքերը կիսեն։ Ես ուղղակի խոսք չունեմ, թե սա ինչ է, այս քաղաքականությունը մեր ժողովրդի քաղաքականությունը չէ, սա արտաքին պատվեր է, որը ստացել է այս խումբը և, այդ պատվերը ստանալով, երևի երաշխիքներ է ստացել, որ կմնա իշխանության։ Արդյունքում շարունակում են տապալել մեր ժողովրդի ապագան»,- մտահոգված ասաց քաղաքագետը։

Արթուր Խաչիկյանը գրեթե կասկածից դուրս է համարում, որ պատվերն այն երկրներից է, որոնք ուզում են, որ այս տարածաշրջանից դուրս գա Ռուսաստանը։ «Շատ լավ գիտենք, թե ինչ երկրներ են դրանք՝ Մեծ Բրիտանիա, Ֆրանսիա, Միացյալ Նահանգներ, հիմնականում դրանք»,- նշեց նա։

Հնարավո՞ր չէր, արդյոք, «և, և»-ի քաղաքականություն վարել «Փաստինֆո»-ի հարցին ի պատասխան՝ քաղաքագետը հիշեցրեց, որ մինչև 2018 թվականը հենց այդպես էլ արվում էր. «Մենք դա անում էինք մինչև 2018 թ.-ի թավշյա ողբերգությանը հասնելը։ Ե՛վ արևմուտքի հետ ունեինք նորմալ հարաբերություններ ,և՛ Ռուսաստանի հետ ունեինք դաշնակցային հարաբերություններ։ Այսինքն՝ մենք անում էինք նույնը, ինչ որ անում են Ադրբեջանը և Թուրքիան։ Բայց այս կառավարությունը, այս խումբը հռչակեց, որ մենք պետք է լինենք «դեմոկրատիայի փարոս» և ցանկացած ձևով դատապարտենք ու թշնամանանք Ռուսաստանի հետ», - նկատեց Արթուր Խաչիկյանն ու վստահություն հայտնեց, որ հենց այդ քաղաքականությունը հնարավորություն ստեղծեց 2020 թ.-ին Թուրքիայի ու Ադրբեջանի համար՝ հարձակվել մեզ վրա։

Արձանագրված պարտությունից հետո, քաղաքագետը չբացառեց, որ Ռուսաստանը հնարավոր է մեր մեջքի հետեւում ինչ- որ պայմանավորվածություն է ձեռք բերել Ադրբեջանի հետ, քանի որ մեր դիվանագիտությունը պարտված էր, ոչնչացված էր։ «Եկան անմեղսունակ մարդիկ,ովքեր կատարում են արտաքին պատվերները։ Նայե՛ք, թե ինչպես փոխվեց մեր քաղաքականությունը 18 թ.-ից հետո, նայե՛ք, թե ինչ եղավ Ուկրայինայի հետ, երբ Ուկրաինային ստիպեցին ընտրել կամ արևմուտք, կամ արևելք։ Տեսե՛ք ինչ եղավ Ուկրաինայում։ Ուկրաինան էլ չկա։ Եվ մեզ տանում են նույն Ուկրաինայի սցենարով, բայց եթե Ուկրաինան ունի այդ ռեսուրսն ու կարևորությունը, մենք՝ չունենք։ Մեզ միանգամից կհափշտակեն Թուրքիան և Ադրբեջանը, գուցե ինչ- որ փոքր կտոր Ռուսաստանը վերցնի իրեն,կամ չի թողնի, նրանք էլ կարող են վերջապես հասկանալ, որ մեր այս կառավարության,մ եր պետության հետ գործ ունենալն անիմաստ է։ Դրան էլ կարող է գործը հասնել»,- ցավով արձանագրեց Արթուր Խաչիկյանը։

Հիշեցնենք, որ «Իզվեստիա » պարբերականի հարցերին ի պատասխան ՌԴ արտգործնախարարը նշել էր , որ Հայաստանում տիրող իրավիճակը լավատեսություն չի ներշնչում։ Հայաստանի ղեկավարությունը կանխամտածված կերպով, տարբեր պատճառաբանություններ բերելով, տանում է Ռուսաստանի հետ Հայաստանի հարաբերությունների քայքայմանը։Լավրովը կետ առ կետ քայլ հիշեցրել էր ՀՀ իշխանությունների քայլերը, որոնք ՌԴ համար անակնկալ են եղել։ «Հայաստանի ղեկավարությունը, ուղիղ ասենք, հորինովի պատճառաբանություններով, խեղաթյուրելով վերջին երեք տարիների պատմությունը, գիտակցաբար տանում է նրան, որ Ռուսաստանի հետ հարաբերությունները քայքայվեն, 102-րդ բազայում ծառայող մեր զինվորականները, սահմանապահներն ու առհասարակ ՀԱՊԿ-ը դառնան զրպարտության թիրախ»,նշել էր Լավրովը նա նաև նկարագրել է, թե ինչպես է օրակարգից դուրս եկել Արցախի կարգավիճակի հարցը.- «Երբ 22 թվականին, այսպես կոչված Եվրոպական քաղաքական համայնքի գագաթնաժողովի ժամանակ Պրահայում նա Ադրբեջանի նախագահ Ալիեւի հետ ստորագրեց փաստաթուղթ ԵԽ նախագահ Շառլ Միշելի ներկայությամբ, որ Ղարաբաղը դա Ադրբեջան է, այդ մասին մեզ ոչ ոք էլ չիրազեկեց։ Պուտինը հետո Փաշինյանին հերթական հանդիպման ժամանակ ուղղակի ասաց․ «Զարմացանք, որ այդպես որոշեցիք»։ Ոչ մի բացատրություն չեղավ, թեեւ Փաշինյանը մեզ անընդհատ խնդրել է չմոռանալ, որ պետք է զուգահեռ երեք տարիների ընթացքում ջանքեր ներդնել, որպեսզի կարգավորել ԼՂ կարգավիճակի հարցը եւ մենք դրանով զբաղվել ենք։ Սակայն, երբ ինքը ստորագրեց, որ այդ տարածքը Ադրբեջան է,կարգավիճակի հարցը ուղղակիորեն դուրս եկավ օրակարգից»,-պատմել էր Լավրովն ու ՀԱՊԿ-ի հետ ՀՀ անդամության սառեցման մասին հայտարարությունն ու ԵՄ ինտեգրման ուղղությամբ քայլերը նկարագրել է որպես «Ելք» դաշինքի պատգամավոր Փաշինյանի արտահայտած մտքերից մինչև այսօրվա Փաշինյանի քաղաքականության շրջանի փակում։

Աղբյուր` Փաստինֆո