Փաստ ինֆո

Այս գիշեր Ռումինիայից վերադարձել է Հայաստանի ազատ ոճի ըմբշամարտի հավաքականը, որին մեծ շուքով են դիմավորել օդանավակայանում։

Եվրոպայի քառակի չեմպիոն Արսեն Հարությունյանին, նորընծա չեմպիոն Արման Անդրեասյանին, բրոնզե մեդալակիր Մեժլում Մեժլումյանին և հավաքականի մյուս անդամներին օդանավակայանում դիմավորել են աղուհացով, երաժշտությամբ և ծափողջույններով:

«Ամեն ոսկե մեդալ մեծ դժվարությամբ է տրվում։ Կարող է գորգի մեջ ես հեշտ հաղթեցի մրցակիցներիս, բայց դժվար ճանապարհ եմ անցել ու պատրաստ եմ այդ բարդ ճանապարհը 10 անգամ ավելի անցնել, միայն թե կարողանամ օլիմպիական ոսկե մեդալն ունենալ»,- օդանավակայանում ասել է քառակի չեմպիոն Արսեն Հարությունյանը:

Նա խոստովանել է, որ հոգեբանականորեն ծանր էին թուրք և ադրբեջանցի մրցակիցներիս հետ գոտեմարտերը: «Բայց, ասեմ, որ բարդ է տրվել հաղթանակը, ոչ»,- ընդգծել է նա։

Ինչպես արդեն տեղեկացրել ենք՝ Արսեն Հարությունյանը (57 կգ) եզրափակիչում ընդամենը 52 վայրկյանում 10:0 հաշվով պարտության է մատնել թուրք մարզիկին ու 4-րդ անգամ նվաճել չեմպիոնի տիտղոսը։

Արման Անդրեասյանն էլ նշել է, որ միշտ ինչ-որ բան խանգարում էր ոսկե մեդալը նվաճելու համար: Մարզիչների հետ կարողացանք շտկել թերություններն ու հաջողվեց այս անգամ չեմպիոն դառնալ: «Մինչև վերջին վայրկյանը հավատում էի, որ կարող եմ հաղթանակի հասնել: Բուխարեստ էի մեկնել չեմպիոնության համար»,- նշել է Արման Անդրեասյանը ու ավելացրել, որ ամենատպավորիչ գոտեմարտն անցկացրել է կիսաեզրափակչում։

«Յուրաքանչյուր գոտեմարտ իր բարդությունն ուներ, բայց կիսեզրափակչում՝ աշխարհի ու Եվրոպայի չեմպիոնի դեմ, լարվածությունն ավելի մեծ էր: Ամենատպավորիչն այդ գոտեմարտն էր, երբ վերջին վայրկյաններին հաղթանակի հասա»,- նշել է նա:

Աղբյուր` Փաստինֆո