Փաստ ինֆո

Փոխվարչապետ Մհեր Գրիգորյանի գրասենյակից հրաժարվում են մանրամասնել, թե, արդյոք, հաջողվել է հայ-ադրբեջանական սահմանազատման և սահմանագծման հանձնաժողովների վերջին՝ հունվարի 31-ին նիստում նույնականացնել քարտեզները, որոնց հիման վրա պետք է կատարվի սահմանազատումն ու սահմանագծում։

Հիշեցնենք, որ հանդիպումը՝ երկու երկրների փոխվարչապետերի ղեկավարությամբ, տեղի է ունեցել 2024 թվականի հունվարի 31-ին։ Մինչ այդ՝ ՀՀ փոխվարչապետ Մհեր Գրիգորյանի աշխատակազմից «Փաստինֆո»-ի գրավոր հարցմանն ի պատասխան հայտնել էին, որ սահմանազատման հանձնաժողովների հաջորդ հանդիպման ընթացքում քննարկվելու է հանձնաժողովների համատեղ գործունեության մասին կանոնակարգի նախագիծը։ «Նախագծում պետք է սահմանվեն համատեղ աշխատանքներում օգտագործվելիք իրավական նշանակություն ունեցող փաստաթղթերի և իրավական ակտերի տեսակները և տիպերը, նույնականացվեն ԽՍՀՄ ժամանակաշրջանի վերջին տոպոգրաֆիկ քարտեզները, որոնք պատշաճ իրավական հիմքերով կազմվել և տպագրվել են իրավասու մարմինների կողմից, և այլ նմանատիպ հարցեր»:

Հանդիպումից հետո «Փաստինֆո»-ն նոր հարցում է ուղարկել Մ. Գրիգորյանին՝ խնդրելով հայտնել, թե ինչ հարցեր են քննարկվել, արդյոք հաջողվել է հաստատել կանոնակարգը։ Ի պատասխան մեր հարցման՝ Մ. Գրիգորյանի գրասենյակից հայտնել են, որ հանդիպման ընթացքում տարբեր հարցեր են քննարկվել, և քննարկումները շարունակվելու են՝ հրաժարվելով պարզաբանել, թե արդյոք նույնականացվել են քարտեզները եւ , ընդհանրապես, ինչ համաձայնություններ են ձեռք բերվել։

«Միաժամանակ, հայտնում ենք, որ համաձայն 2023 թվականի դեկտեմբերի 14-ին ընդունված Կառավարության N 2154-Ա որոշմամբ հաստատված Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի միջև նիստերի և համատեղ աշխատանքային հանդիպումների կազմակերպման և անցկացման Աշխատակարգի հանձնաժողովների հանդիպումների արդյունքում հրապարակվում են պաշտոնական մամուլի հաղորդագրություններ, որոնցից դուրս պարզաբանումներ կամ մեկնաբանություններ չեն թույլատրվում»,- նշված է գրավոր պատասխանում:

Նկատենք, որ նախկինում հանդիպման արդյունքների մասին հայտարարություններ եղել են, ավելին, ինչպես արդեն նշեցինք, մինչեւ հանդիպումը հենց մեր հարցմանն ի պատասխան պարզաբանվել է, թե ինչ հարցեր են քննարկվելու, սակայն հունվարի 31-ից հետո իրավիճակը կտրուկ փոխվել է։ Այլեւս գաղտնի են պահվում պայմանավորվածությունները, եւ թե, ընդհանրապես, հաջողվել է որեւէ հարցի շուրջ պայմանավորվածության գալ թե ոչ։ Թերեւս մի հարցում համաձայնությունն ակնհայտ է՝ կողմերը որոշել են ժողովրդի թիկունքում կայացնել պայմանավորվածությունները։

Սա, իսկապես, նոր մտահոգությունների առիթ տալիս, կարելի է ենթադրել, որ Հայաստանի քաղաքացիների մեջքի ետևում կարող են ձեռք բերվել նոր պայմանավորվածություններ, մասնավորապես, քարտեզների շուրջ, որոնցով կատարվելու են սահմանազատման աշխատանքները, ու Հայաստանի բնակիչները կրկին «պոստ ֆակտում» տեղեկանալու են նոր զիջումների մասին։

Աղբյուր` Փաստինֆո