Փաստ ինֆո

Եթե ինչ-որ մութ հարցեր կան, պարզելու հարցեր կան, որ պետք է գործ հարուցվի, թող հարուցվի։ Իմ մտահոգությունը կալանքի հետ է կապված, որ ամեն գնով փորձում են անձին կալանավորել։ Կալանքն ինչի՞ համար է, որ եթե դեռ դատը չի եղել, գործը չի ուղարկվել դատարան, որ մարդը չխոչընդոտի քննությանը, նոր հանցանք չկատարի և այլն։ Այս ձևական իմաստը պահելով՝ մարդկանց տանում են կալանքի, ինչի անհրաժեշտությունը չկա։ Եթե ես ինչ-որ մի երևույթի դեմ եմ, ապա դա անկախ նրանից ՝ ընդդիմության հետ է կապված, թե իշխանության։ Ես սխալ եմ համարում մանկահասակ երեխաներ ունեցող կնոջը կալանքի տանելը։ Այս մասին լրագրողների հետ զրույցում ասաց Լևոն Քոչարյանը։

Հարցին՝ անհրաժեշտության դեպքում կարո՞ղ է Լևոն Քոչարյանն իր մանդատն օգտագործել՝ Ալեն Սիմոնյանի եղբոր կնոջն ազատ արձակելու համար, Լևոն Քոչարյանն արձագանքեց՝ նշելով, որ չի ցանկանում անձնավորել և երևույթին անձերի տիրույթում նայել։

«Ես երևույթը սխալ եմ համարում։ Եթե ես մի բան սխալ եմ համարում, ապա պատրաստ եմ նաև այդ սխալն ուղղելու համար, եթե ինձնից ինչ-որ բան կախված է, անել ՝ թե որպես պատգամավոր, թե որպես քաղաքացի։ Այդ երևույթը սխալ եմ համարում՝ կալանքի տանել կանանց՝ մանկահասակ երեխա ունեցող, մի դեպքում՝ անգամ մի քանի ամսական երեխա ունեցող»,- ասաց նա՝ հիշեցնելով նաև իշխանությունների անտարբերությունը՝ օրինակ՝ Տաթև Վիրաբյանի կալանավորման, մյուս ապօրինությունների դեմ։

«Եթե իշխանության ներկայացուցիչները համարձակություն ունենային՝ դիրքորոշում արտահայտելու, որ դա սխալ է, միգուցե՝ իրենց հետ նույնը չլիներ»,- ասաց նա։

Դիտարկմանը, որ հիմա էլ դիրքորոշում չեն հայտնում, երբ արդարադատությունն իրենց դուռն է ծեծել, Քոչարյանն արձագանքեց՝ նշելով․ «Ինչպես երկիրն են տանում կործանման, այնպես էլ՝ ամեն մեկն իրենց ու այս ամեն ինչը»։

Աղբյուր` Փաստինֆո