Փաստ ինֆո

Հակակոռուպցիոն դատարանում՝ դատավոր Սարգիս Դադոյանի նախագահությամբ, այսօր կայացել է Արցախյան երրորդ՝ 44-օրյա պատերազմում «Քիմիկների զորամասի» 40 զինծառայողների զոհվելու, գերեվարվելու և անհետ կորելու վերաբերյալ գործով դատական նիստը։

Այսօրվա նիստում հարցաքննվել է վկա Ռիմա Ավետիսյանը, ում որդին ավագ սերժանտ է, ութ տարի ծառայել է ՀՀ զինված ուժերում, սկզբում՝ Վարդենիսում, ապա՝ տեղափոխվել Էջմիածնի «Քիմիական զորամասում», ունի երկու երեխա, փոքրը չորս ամսական էր, երբ նրան տարել են Կապան՝ 2020թ․ պատերազմի ընթացքում Կովսականում «սանրման» աշխատանքների մասնակցելու համար։ Տիկին Ռիման պատմեց, որ որդու հետ խոսել է հոկտեմբերի 20-ի՝ երեկոյան, որդին ասել է, որ երեք օր անհասանելի է լինելու, պետք է գնան մարտական գործողությունների։

«Բայց, ցավոք, արդեն չորրորդ տարին է, որ երեխաս անհասանելի է։ Գեներալ Մակարյանի և հրամանատար Արսենի ձեռքով երեխաներին լցրեցին ավտոբուս՝ անպատրաստ՝ առանց ժիլետ, առանց գլխարկ, մի ժանգոտ ավտոմատով տարան դեպի Զանգելան, մի վայր, որն արդեն հոկտեմբերի 18-ին գրավված է եղել, դրոշը ծածանվում էր։ Երեխեքին տարան Ջանգելան, հանձնեցին թշնամուն, երկու ավտոբուս, երրորդ ավտոբուսին հաջողվել է հետ գալ։ Երեխաներին իջեցրել են, ծխել են, թշնամին՝ զինված, գայլի պես սպասել է անմեղ գառներին»,- դատարանում ասել է տիկին Ռիման՝ հավելելով, որ տղաներն իրեն պատմել են, թե հակառակորդն ասել է՝ «տղերք, մի վախեցեք, մենք էլ ենք հայ», ինչից հետո մարտական գործողություններ են սկսել, որը մոտ մեկ ժամ է տևել։

«Իմացել ենք, որ երեխեքի հետ դեպք է եղել, դիմել ենք այս և այն դուռ՝ ՊՆ, Կապան, ասել, որ ողջ երեխաներ կան անտառում, գոնե՝ գնացեք ողջերին գտեք, բերեք, չգնացին։ Եթե գնային, կգտնեին։ Լավ, հասկանում ենք, որ պատերազմ է, պատերազմն իր կանոններն ունի, բայց պատերազմը չի ասում՝ անմեղ երեխեքին տար լից հանձնած տարածք, երեխեքին գցիր շրջափակման մեջ։ Չորրորդ տարին է՝ լուր չունենք, շտապօգնության օգնությամբ ապրում ենք՝ սպասելով, հերոսածին մայր ենք, բայց պետության կողմից չենք հարգվում։ Պետք է մեր երեխեքից մինչև հիմա լուր ունենայինք, դավաճանները պետք է դատված լինեին»,- նշեց զինծառայողի մայրը՝ պատմելով, որ զանգել է հրմանանատար Արսեն Աբգարյանին՝ հետաքրքրվելով, թե ինչպես է ստացվել, որ ինքը կարողացել է իր կազմակերպած օպերացիայից ողջ-առողջ վերադառնալ, Աբգարյանն էլ արձագանքել է՝ «բա մնայի՝ ես է՞լ զոհվեի»։

«Բա ինչի համար եք այդ երեխեքին տարել, զոհվելու՞ համար։ Եթե իմանամ, որ այդ երեխեքը գնացել են՝ պատերազմի դաշտում մի քոռ գնդակ է խփել, կասեմ՝ պատերազմ էր, ոչ մեկի մորից էլ լավը չեմ, եղել է, ստացվել է, կհամակերպվեի այդ մտքին, բայց տեղահանված Զանգելանը, որտեղից երկու օր առաջ բնակիչներին հեռացրել են, ադրբեջանական դրոշը ծածանվում է դպրոցի գլխին․․․Զոհվելու համա՞ր տարան այդ երեխեքին, չէ՞ որ 40 երեխեքից ամեն մեկը մի ընտանիքի ծուխ է։ Իմ երեխան որբ պահված է՝ միայն իմ խնամակալությամբ, երկու անչափահաս երեխա ուներ, փոքրը չորս ամսական էր, հիմա տղան դպրոց է գնում, ես եմ պահում, ո՞վ է պահելու։ Ինչի՞ տարաք այդ երեխեքին։ Գեներալ Մակարյանն ասում էր՝ վրիպում է եղել, ինչու ոչխա՞ր էիր տանում, հավի ճու՞տ էիր տանում, որ վրիպում տվեցիր, դու գեներա՞լ ես, պագոններն ուսերիդ ինչի համար է, լավագույն երեխեքին ջոկեցիք՝ տարաք, մինչ օրս լուր չունենք։ Մենք ոնց ենք ապրել, դուք չեք պատկերացնում ապրելու։ Ինչի համար։ Ոչ մի չինովնիկի երեխեքը պատերազմ չգնաց, ջոկեցին՝ խեղճ ու կրակ երեխեքին տարան»,- արցունքներն աչքերին հայտարարեց զինծառայողի մայրը՝ պահանջելով, որ դավաճաններին օրենքով խիստ պատժեն։ Ռիմա Ավետիսյանի տեղեկություններով՝ որդին գերեվարված է, թեև պաշտոնական հաստատում չկա, սակայն որդու վերաբերյալ տեսանյութեր է տեսել ադրբեջանական հարթակներում։ Դատական նիստն ընթացավ բավականին լարված մթնոլորտում՝ տուժողների և ամբաստանյալների միջև վեճերի պատճառով։

Քրեական գործը, ինչպես հայտնի է, վերաբերում է 2020թ․ հոկտեմբերի 21-ին Կովսականում (Զանգելանում) տեղի ունեցած դեպքերը, երբ 62 զինծառայողներից բաղկացած «Քիմիկների» զորամասի խումբը հայտնվել էր շրջափակման մեջ։ Զինծառայողներից 40-ը զոհվել է, գերեվարվել կամ անհետ կորել, շրջափակումից դուրս է եկել միայն 22-ը։

Ամբաստանյալի աթոռին չորս զինվորական է՝ Զինված ուժերի Գլխավոր շտաբի պետի նախկին տեղակալ Անդրանիկ Մակարյանը, վերը նշված զորամասի հրամանատար Արսեն Աբգարյանը, զորամասի շտաբի պետ Սարգիս Կուլակչյանը և զորամասի համալրման բաժանմունքի պետ Էլլադա Հարությունյանը։

Անդրանիկ Մակարյանը մեղադրվում է ռազմական դրության պայմաններում իշխանության անգործության, Արսեն Աբգարյանը՝ իշխանության անգործության եւ ծառայության նկատմամբ անփույթ վերաբերմունքի, Սարգիս Կուլակչյանը՝ իշխանության անգործությանն օժանդակելու, իսկ Էլլադա Հարությունյանը՝ պաշտոնեական կեղծիք կատարելու մեջ։

Հեղինակ՝ Իզաբել Սահակյան

Աղբյուր` Փաստինֆո