Փաստ ինֆո

Պեմզաշենում մոր և երկու երեխայի դաժան սպանությունից հետո մեղադրյալներից Արկադի Բարսեղյանի կինը զանգահարել, կապ է հաստատել զոհի՝ Զարինե Մելիքսեթյանի, հարևանուհու հետ` խնդրելով հանդիպել հետագա վարույթի շրջանակներում ցուցմունքներ տալու հետ կապված, սակայն հարևանուհին մերժել է առաջարկը: Այս մասին դատարանում հայտարարել է դատախազ Արեգ Խաչատրյանը` հրապարակելով գործում առկա գրավոր ապացույցները:

«Փաստինֆո»-ի թղթակցի հաղորդմամբ` Երևանի ընդհանուր իրավասության քրեական դատարանում` դատավոր Արտուշ Գաբրիելյանի նախագահությամբ, այսօր շարունակվել է Պեմզաշենում մոր և երկու երեխայի առանձնակի դաժանությամբ սպանության գործով դատական նիստը, որի ընթացքում հրապարակվել են գործում առկա ապացույցները, այդ թվում` վկաների նախաքննական ցուցմունքներից որոշ դրվագներ: Հրապարակվեցին նաեւ սպանված ընտանիքի հարևանուհու` Արմենուհի Ռափյանի ցուցմունքները, որոնց համաձայն դեպքի օրը, կեսգիշերն անց գնացել է բակի դուռը փակելու ,Զարինե Մելիքսեթյանի տանից ոչ սովորական ձայներ է լսել՝ ճիչեր, բղավոցներ, սակայն մտածել է, որ Զարինեն երեխայի վրա է բարկանում և չի միջամտել: Հաջորդիվ հրապարակվեց Սայաթ Միքայելյանի ցուցմունքը, համաձայն որի` հենց ինքն է Վրույր Բարսեղյանին իր մեքենայով դեպքի հաջորդ օրը Արթիկ քաղաք տարել։ Վերջինս նաև ներկայացրել է, որ Արկադի Բարսեղյանի մեքենան ժամանակ առ ժամանակ տեսել է Զարինե Մելքիսեթյանի տան տարածքում։ Գործով ցուցմունքներ են տվել նաև երկու կին, որոնք դեպքի հաջորդ օրը Վրույր Բարսեղյանի հետ գումարի դիմաց սեռական հարաբերություն են ունեցել։

Գործում առկա ապացույցների համաձայն` Արկադի Բարսեղյանն այդ օրերին թմրանյութերի ազդեցության տակ է եղել, նրա բջջային հեռախոսում առկա են եղել պատմություններ` խաղադրույքային, ինչպես նաև` պոռնոգրաֆիկ կայքեր մուտք գործելու վերաբերյալ: Նմանատիպ կայքերի վերաբերյալ պատմություններ առկա են եղել նաև Վրույր Բարսեղյանի հեռախոսում: Բացի այդ, պարզվել է նաև, որ Արկադի Բարսեղյանի փաստաբանը կապ է հաստատել նրա ընտանիքի անդամների, ընկերների հետ, քննարկել և որոշել են կոնկրետ ժամ մատնանշել` իբրև Արկադի Բարսեղյանը դեպքի վայրում չի եղել, սակայն Վրույր Բարսեղյանը ևս ՔԿՀ-ում պատմել է, որ Արկադին դեպքին մասնակից է եղել: Գործով որպես իրեղեն ապացույց է ճանաչվել 91 իր և առարկա, այդ թվում` Վրույր Բարսեղյանի արյանը նմանվող հեղուկի հետքերը, մեկ զույգ հողաթափի նմանվող սպորտային կոշիկներ, ծալովի դանակը, ինչպես նաև` դեպքի վայրում հայտնաբերված մի շարք իրեր և առարկաներ` արյան հետքերով, սերմնահեղուկի հետքեր։ Պաշտպանները նախ միջնորդեցին հետաձգել դատական նիստը, սակայն, նկատի ունենալով, որ կողմը ծանոթ է գործում առկա ապացույցներին, նախագահողը ժամանակ տվեց` այլ ապացույցներ հետազոտման առարկա դարձնելու վերաբերյալ միջնորդության համար, սակայն ընդմիջումից հետո հայտնի դարձավ, թե Արկադի Բարսեղյանի պաշտպանի ինքնազգացողությունը վատ է, ըստ այդմ, նախագահողը ստիպվբած եղավ հետաձգելու նիստը:

Հիշեցնենք, որ 2022թ.նոյեմբերի 9-ին Շիրակի մարզի Պեմզաշեն գյուղում ողբերգական դեպք է տեղի ունեցել։ Գյուղի տներից մեկում հայտնաբերվել է երեք դի։ Մահացածներն են՝ մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։ Իրավապահ մարմինները հայտնել էին, որ տան ննջասենյակի մեկտեղանի մահճակալին հայտնաբերվել է արական սեռի երեխայի դի՝ կրծքավանդակի հատվածում կտրած-ծակած վերքերով՝ ձեռքերը և ոտքերը կապած վիճակում, նույն ննջասենյակի հատակին հայտնաբերվել է իգական սեռի երեխայի դի՝ կրծքավանդակի հետին մակերեսին և որովայնի հատվածներում կտրած-ծակած վերքերով, իգական սեռի դի՝ որովայնի և կրծքավանդակի հատվածներում ու կրծքավանդակի հետին մակերեսին կտրած-ծակած վերքերով՝ ձեռքերը հետնամասում թելով կապված վիճակում: Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաև հանցանքը ենթադրաբար կատարած երկրորդ անձը՝ 41-ամյա տղամարդ։

Տղամարդիկ ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։ ՔԿ տարածած հաղորդագրության համաձայն՝ մեղադրյալները տուն մուտք են գործել՝ գումար հափշտակելու համար, սակայն, տանտիրուհուց իմանալով, որ տանը գումար չկա, իրենց կողմից կատարված հանցագործությունները թաքցնելու նպատակով, նախ կապել և միմյանց գործողությունները փոխլրացնելով՝ առանձին դաժանությամբ սպանել են կնոջը, ապա 32-ամյա տղամարդը, կատարված հանցանքները թաքցնելու նպատակով, ապօրինաբար կյանքից զրկելու դիտավորությամբ, կապել է երեխաների ձեռքերն ու ոտքերը և խոհանոցային դանակով հարվածներ է հասցրել նրանց մարմնի տարբեր մասերին՝ պատճառելով կյանքի հետ անհամատեղելի մարմնական վնասվածքներ:

Տղամարդկանցից մեկին՝ 32-ամյա Վրույր Բարսեղյանին, մեղադրանք է ներկայացվել ՀՀ քրեական օրենսգրքի 155-րդ հոդվածի 2-րդ մասի 6-րդ, 8-րդ և 13-րդ կետերով, 155-րդ հոդվածի 2-րդ մասի 3-րդ , 5-րդ, 6-րդ և 13-րդ կետերով (երկու դրվագ)՝ այլ հանցանքը թաքցնելու նպատակով մի խումբ անձանց կողմից առանձին դաժանությամբ սպանության և անօգնական վիճակում գտնվող երկու անչափահասին առանձին դաժանությամբ սպանության համար, 252-րդ հոդվածի 3-րդ մասի 2-րդ կետով՝ բնակարան ապօրինի մուտք գործելով ավազակության համար և 198-րդ հոդվածի 4-րդ մասով՝ 12 տարին չլրացած անձի նկատմամբ սեռական բնույթի բռնի գործողություն կատարելու համար։ Մյուս մեղադրյալին՝ 41-ամյա Արկադի Բարսեղյանին, որը, ըստ մամուլի, Նիկոլ Փաշինյանի աջակիցն է, մեղադրանք է ներկայացվել՝ այլ հանցանքը թաքցնելու նպատակով մի խումբ անձանց կողմից սպանություն կատարելու և բնակարան ապօրինի մուտք գործելով ավազակության համար։ Երկուսն էլ կալանավորված են։

Հեղինակ՝ Իզաբել Սահակյան

Աղբյուր` Փաստինֆո