Փաստ ինֆո

Պեմզաշենում մոր և երկու երեխայի սպանության գործով Վրույր և Արկադի Բարսեղյանները կշարունակեն մնալ կալանավորված։ Երևանի քրեական դատարանը՝ դատավոր Արտուշ Գաբրիելյանի նախագահությամբ, որոշեց երեք ամսով երկարացնել Բարսեղյանների նկատմամբ ընտրված խափանման միջոց կալանավորման ժամկետը։

Նշենք, որ հանրային մեղադրող Արեգ Խաչատրյանը միջնորդել էր երկարացնել կալանքի ժամկետը՝ ևս երեք ամսով՝ արձանագրելով, որ Վրույր և Արկադի Բարսեղյաններին կալանքի տակ պահելու հիմքերը շարունակում են առկա լինել։ Դատախազը խոսելով նրանց մեղսագրվող արարքի ծանրությունից՝ հիշեցրեց, որ նրանց կարող է սպառնալ ընդհուպ մինչև ցմահ ազատազրկում։ Դատախազն ընդգծեց, որ նրանք հանցանք են կատարել՝ փորձելով թաքցնել մեկ այլ հանցանքը, բացի այդ, հայտնաբերվել են ՕՀՄ-ների արդյունքում, հետևաբար, առկա է թաքնվելու վտագը։ Դատախազի գնահատմամբ՝ առկա է նաև խոչընդոտման հավանականություն՝ դատակոչված շուրջ 30 վկաների վրա հնարավոր ազդեցության տեսանկյունից, բացի այդ, առ այս պահը չի հայտնաբերվել ենթադրյալ երկրորդ դանակը։ Տուժողի իրավահաջորդի ներկայացուցիչ Գարիկ Գալիկյանը ևս արձանագրեց, որ նրանց նկատմամբ պետք է որպես խափանման միջոց կիրառվի կալանքը։

Տուժողների իրավահաջորդ Սևակ Մելիքսեթյանը՝ սպանված Զարինեի ամուսինը և երեխաների հայրը, դիրքորոշում հայտնեց՝ նշելով, որ երկուսն էլ պետք է գնդակահարվեն տեղում։ Պաշտպանության կողմն էլ միջնորդել էր փոփոխել մեղադրյալների նկատմամբ ընտրված խափանման միջոց կալանավորումն՝ անազատության հետ չկապված խափանման միջոցներով։ Վրույր Բարսեղյանի հանրային պաշտպան Էդուարդ Աղաջանյանը միջնորդեց կիրառել տնային կալանք և վարչական հսկողություն, իսկ Արկադի Բարսեղյանի պաշտպանները՝ կիրառել գրավ՝ գրավի չափը թողնելով դատարանի հայեցողությանը։

Դատարանը մերժեց պաշտպանների միջնորդությունները՝ երկարացնելով մեղադրյալների կալանքի ժամկետը ևս երեք ամսով։ Դատական նիստը հետաձգվեց՝ մինչև 2024թ․ հունվարի 18-ը։

Հիշեցնենք, որ 2022թ.նոյեմբերի 9-ին Շիրակի մարզի Պեմզաշեն գյուղում ողբերգական դեպք է տեղի ունեցել։ Գյուղի տներից մեկում հայտնաբերվել է երեք դի։ Մահացածներն են՝ մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։ Իրավապահ մարմինները հայտնել էին, որ տան ննջասենյակի մեկտեղանի մահճակալին հայտնաբերվել է արական սեռի երեխայի դի՝ կրծքավանդակի հատվածում կտրած-ծակած վերքերով՝ ձեռքերը և ոտքերը կապած վիճակում, նույն ննջասենյակի հատակին հայտնաբերվել է իգական սեռի երեխայի դի՝ կրծքավանդակի հետին մակերեսին և որովայնի հատվածներում կտրած-ծակած վերքերով, իգական սեռի դի՝ որովայնի և կրծքավանդակի հատվածներում ու կրծքավանդակի հետին մակերեսին կտրած-ծակած վերքերով՝ ձեռքերը հետնամասում թելով կապված վիճակում: Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաև հանցանքը ենթադրաբար կատարած երկրորդ անձը՝ 41-ամյա տղամարդ։

Տղամարդիկ ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։ ՔԿ տարածած հաղորդագրության համաձայն՝ մեղադրյալները տուն մուտք են գործել՝ գումար հափշտակելու համար, սակայն, տանտիրուհուց իմանալով, որ տանը գումար չկա, իրենց կողմից կատարված հանցագործությունները թաքցնելու նպատակով, նախ կապել և միմյանց գործողությունները փոխլրացնելով՝ առանձին դաժանությամբ սպանել են կնոջը, ապա 32-ամյա տղամարդը, կատարված հանցանքները թաքցնելու նպատակով, ապօրինաբար կյանքից զրկելու դիտավորությամբ, կապել է երեխաների ձեռքերն ու ոտքերը և խոհանոցային դանակով հարվածներ է հասցրել նրանց մարմնի տարբեր մասերին՝ պատճառելով կյանքի հետ անհամատեղելի մարմնական վնասվածքներ:

Տղամարդկանցից մեկին՝ 32-ամյա Վրույր Բարսեղյանին, մեղադրանք է ներկայացվել ՀՀ քրեական օրենսգրքի 155-րդ հոդվածի 2-րդ մասի 6-րդ, 8-րդ և 13-րդ կետերով, 155-րդ հոդվածի 2-րդ մասի 3-րդ , 5-րդ, 6-րդ և 13-րդ կետերով (երկու դրվագ)՝ այլ հանցանքը թաքցնելու նպատակով մի խումբ անձանց կողմից առանձին դաժանությամբ սպանության և անօգնական վիճակում գտնվող երկու անչափահասին առանձին դաժանությամբ սպանության համար, 252-րդ հոդվածի 3-րդ մասի 2-րդ կետով՝ բնակարան ապօրինի մուտք գործելով ավազակության համար և 198-րդ հոդվածի 4-րդ մասով՝ 12 տարին չլրացած անձի նկատմամբ սեռական բնույթի բռնի գործողություն կատարելու համար։ Մյուս մեղադրյալին՝ 41-ամյա Արկադի Բարսեղյանին, որը, ըստ մամուլի, Նիկոլ Փաշինյանի աջակիցն է, մեղադրանք է ներկայացվել՝ այլ հանցանքը թաքցնելու նպատակով մի խումբ անձանց կողմից սպանություն կատարելու և բնակարան ապօրինի մուտք գործելով ավազակության համար։ Երկուսն էլ կալանավորված են։

Հեղինակ՝ Իզաբել Սահակյան

Աղբյուր` Փաստինֆո