Փաստ ինֆո

«Ազգային առաջընթաց» խմբակցությունը մասնակցելու է դեկտեմբերի 26-ի Երևանի ավագանու նիստին։ Այս մասին «Փաստինֆոյի» հետ զրույցում ասաց խմբակցության քարտուղար Իզաբելլա Աբգարյանը՝ նշելով, որ արդեն ունեն միասնական դիրքորոշում՝ Երևանի Փոքր Կենտրոնում ավտոկայանատեղիների թանկացման նախագծի առնչությամբ։

«Մենք դեմ ենք վարձավճարների բարձրացմանը և համարում ենք, որ դա չհիմնավորված և ժամանակավրեպ է, քանի դեռ քաղաքը ապահովված չէ տրանսպորտային նորմալ ցանցով»,- նշեց տիկին Աբգարյանը։

Դիտարկմանը, թե «Մայր Հայաստանը» կարծում է, որ առհասարակ նախագիծը բոյկոտելն ու քվերում չապահովելն է նախագիծը տապալելու միակ տարբերակը և առաջարկում է բոյկոտել նիստը՝ Աբգարյանը պատասխանեց, որ նիստն առանձին հարցերի համար առհասարակ բոյկոտելու կարիք չկա։

«Եղել են դեպքեր, երբ «Մայր Հայաստանի» հետ քաղաքային վիճահարույց նախագծերի հետ կապված միասնական դիրքորոշում ենք ունեցել և որոշում ենք կայացրել չգրանցվել և քվեարկությանը քվորում չապահովել, արդյունքում այդ հարցով որոշումը չի կայացվել։ Բայց այս դեպքում անհրաժեշտ է, որ ոչ միայն «Ազգային առաջընթացն» ու «Մայր Հայաստանը» նման դիրքորոշում ունենան, այլ նաև «Հանրային ձայնը», այնպես որ այդ առումով գնդակն հիմա «Հանրային ձայնի» դաշտում է, ամեն բան հիմա կախված է «Հանրային ձայնից»,- նշեց նա։

Ի.Աբգարյանի խոսքերով՝ ընդդիմադիր 3 խմբակցությունները պետք է միասնական դիրքորոշում արտահայտեն։ «Կարծում ենք, որ այդ օրվա նիստին յուրաքանչյուր խմբակցություն իր որոշմամբ կգա և ճիշտ կլինի, որ հենց այդ օրը մենք հասկանանք, թե արդյո՞ք ունենք ներդաշնակեցված որոշում։ Նախորդ նիստին մենք հենց տեղում հասկացանք, որ ունենք հնարավորություն տվյալ նախագիծը տապալելու։ Չեմ բացառում, որ այդ նախագիծը առհասարակ հանվի օրակարգից, կամ փոփոխություններ կատարած ներկայացվի ավագանու նիստին։ Այսինքն, տարբեր իրավիճակներ կարող են լինել, բայց ամեն դեպքում, միանշանակ է, որ մեր խմբակցությունը կտրականապես դեմ է նման նախագծին»,- ասաց մեր զրուցակիցը։

Նա ընդգծեց, որ եթե 3 խմբակցությունները միասնական չբոյկոտեն նախագիծը, ապա անգամ մեկ ընդդիմադիր ավագանու քվեարկությունը, եթե անգամ վերջինս դեմ քվեարկի, բավարար է, որ այն ընդունվի։ «Տիգրան Ավինյանին հենց այդ կերպ ընտրվեց։ Մեկ ձայնը դեմ էր քվեարկել։ Այսինքն, այս դեպքում գնդակն «Հանրային ձայնի» դաշտում է»։

«Փաստինֆո»-ն փորձել ճշտել նաև «Հանրային ձայն» խմբակցության դիրքորոշումը հարցի վերաբերյալ։ Խմբակցության ղեկավար Վահան Ավագյանն ասաց, որ այդ նախագիծը բոյկոտելու կամ չբոյկոտելու հարցը դեռ չեն քննարկել խմբակցությունում։

«Ես այս պահին երկրում չեմ, կվերադառնամ, կքննարկենք հարցը և մեր գործողությունները, որից հետո էլ կհայտնենք մեր դիրքորոշումը։ Այս պահն դեռ որևէ պատասխան չունենք»,-ասաց Ավագյանը։

Հիշեցնենք, որ դեկտեմբերի 26-ին Երևանի ավագանու նիստում քննարկման կդրվի Երևանի փոքր Կենտրոնում՝ Ա և Բ գոտիներում մեքենաների կայանման համար վարձավճարների թանկացման հարցը։ Քաղաքապետարանն առաջարկում է Փոքր Կենտրոնում այսպես կոչված՝ կարմիր գծերի վարձավճարները տարեկան 12 000 դրամից հասցնել 160 000-ի՝ չառաջարկելով որևէ այլընտրանք, այդ թվում բնակիչների համար։ Ստացվում է, որ իր տան մոտ մեքենան կայանելու համար բնակիչը պետք է բավական թանկ վճարի կամ էլ այն կանգնեցնի, օրինակ, Բարեկամություն մետրոյի մոտ ու ոտքով գա տուն։

Ավագանու «Մայր Հայաստան» խմբակցությունն այս օրերին իրազեկման ակցիաներ է իրականացնում «Ոչ թալանին» կարգախոսով և նշում, որ նախագիծը տապալելու միակ տարբերակը 3 ընդդիմադիր խմբակցությունների կողմից բոյկոտն է։ Այսինքն, որպեսզի նախագիծը չընդունվի անհրաժեշտ է, որ բոլոր 3 ընդդիմադիր խմբակցությունները միասնաբար չմասնակցեն և քվեարկության համար քվորում չապահովեն։

Աղբյուր` Փաստինֆո