Փաստ ինֆո

Երևանի ավագանու «Ազգային առաջընթաց» խմբակցությունում դեռ չեն քննարկել, ժողովրդական լեզվով ասած, կարմիր գծերի վարձավճարների փոփոխության նախագիծը, սակայն խմբակցության քարտուղար Իզաբելլա Աբգարյանը «Փաստինֆոյի» հետ զրույցում ասաց, որ փորձել է կարծիքաքաղ իրականացնել սոցցանցերի միջոցով՝ քաղաքացիների կարծիքները ճշտելու համար։

«Ամեն դեպքում՝ արդեն կոնսոնսուս ունենք և համակարծիք ենք, որ դեռ վաղ է նման թանկացում նախաձեռնելը, ավելի մանրամասն խմբակցությունը ավագանու նիստում քննարկման ժամանակ կհայտնի, թե ինչպես ենք տեսնում այս հարցը»,- նշեց տիկին Աբգարյանը։

Նրա փոխանցմամբ՝ դեռեւս «Իմ քայլը» խմբակցության ժամանակ այս հարցն ուսումնասիրվել է և քաղաքային իշխանությունները եկել էին մտահանգման, որ պետք է քաղաքը գոտիավորել։ «Շատ երկրներում հենց այդպես է, այն ժամանակ էլ մեզ համար պարզ էր, որ Կենտրոնում կայանումն ավելի թանկ պետք է լինի, մենք քննարկել ենք այս հարցը և այն ժամանակ հասկացանք, որ դեռ հնարավոր չէ դա իրականացնել, քանի դեռ լուծված չէ տրանսպորտի խնդիրը։

Մենք չենք կարող երևանցուն ասել՝ մի եկեք մեքենայով Կենտրոն, Կենտրոնում տրանսպորտով շրջեք։ Գուցե իշխանությունը համարում է, որ լուծել է տրանսպորտային խնդիրը, բայց ես այդ հարցում համամիտ չեմ։ Ինքս տրանսպորտից եմ օգտվում և գտնում եմ, որ տրանսպորտային խնդիրը լուծված չէ և լուծված չի լինի այնքան ժամանակ, քանի դեռ երևանցիները չեն կարողանում պլանավորել իրենց օրը՝ հստակ իմանալ, թե որքան ժամանակ կպահանջվի իրենցից Ա կետից Բ կետ հասնելու համար»,- ասաց Ի. Աբգարյանն ավելացնելով, որ այսօր երկար սպասում ենք տրանսպորտի, ավելին՝ տեղ չի լինում տրանսպորտում և, եթե խնդիրն այն է, որ բեռնաթափեն կենտրոնը, ապա այո, պետք է այլընտրանք լինի։

Աբգարյանի դիտարկմամբ՝ մոտեցումը, թե կենտրոնում կայանելու համար պետք է շատ վճարեն՝ անտրամաբանական է, քանի որ դա կբերի նրան, որ կենտրոնում կկարողանան մեքենա կայանել միայն ունեվորները։

«Բայց պետք է հասկանալ, որ կենտրոնում են նաև պետական աշխատողները, դասախոսները, բազմաթիվ մարդիկ, ովքեր աշխատում են սպասարկման ոլորտում, որոնք ամենևին էլ մեծահարուստներ չեն։ Իմ մոտեցումն այն է, որ եթե քաղաքային իշխանությունը կարողանա քաղաքն ապահովել կանխատեսելի տրանսպորտային ցանցով, այսինքն, որ մարդն հստակ իմանա, թե քանի րոպեից կգա տրանսպորտը, ապա կարելի է ոչ միայն թանկացնել, այլև, առհասարակ, արգելել Կենտրոնում մեքենաների կայանումը, որպեսզի մեքենաները չմտնեն կենտրոն, ոչ թե մտնեն ու թանկ վճարեն։ Սա անընդունել է»,- նշել է Երեւանի ավագանու անդամը։

Աղբյուր` Փաստինֆո