Փաստ ինֆո

Նախօրեին տեղեկություն տարածվեց առ այն, որ Արցախի լուծարման ՆՀ-657-Ն հրամանագիրն անվավեր ճանաչելու հրամանագիր կա, որը սակայն չի հրապարակվում։ Տեղեկությունը հրապարակել է արցախցի հանրային գործիչ Տիգրան Պետրոսյանը։

«Փաստինֆոն» փորձեց մեկնաբանություն ստանալ Երևանում ԼՂ ներկայացուցչությունից, սակայն մեր հեռախոսազանգերը մնացին անպատասխան։

Արցախի Հանրապետության Ազգային Ժողովի պատգամավոր Մետքսե Հակոբյանը մեզ հետ զրույցում ասաց, որ չի պատրաստվում մեկնաբանել տեղեկությունը հրապարակող անձի որևէ հայտարարություն։ «Թող գնա՝ իր տիրոջից ՝ՀՀ վարչապետից, հարցնի այդ հրամանագիրը կա, թե չկա, որովհետև նա պրոյեկտներից մեկն է, որը մեծ ներդրում ունի Արցախի հանձնման գործընթացում»։

Այնուամենայնիվ, անդրադառնալով հայտնի հրամանագիրը չեղարկող մեկ այլ հրամանագրի առկայությանը, պատգամավորը նկատեց, որ դա նախ պետք է Սամվել Շահրամանյանը պարզաբանի։ «Առաջիկայում հանդիպում կունենանք Արցախի Հանրապետության նախագահ Սամվել Շահրամանյանի հետ՝ նման հրամանագրի առկայության վերաբերյալ պարզաբանում ստանալու համար։ Մեր վերջին հանդիպման ժամանակ պարոն Շահրամանյանը մեզ վստահեցրել է, որ սեփական հրամանագրի ողջ հետևանքներն ու պատասխանատվությունը ինքն է կրում և, հետևաբար, ինքն էլ քայլերն անելու է։ Բնականաբար, պարոն Շահրամանյանը նման քայլեր անելու է։ Նպատակահարմար կգտնի՞ հանրայնացնել դա, թե՞ ոչ՝ անկեղծ ասած, այս պահին տեղեկություն չունեմ, բայց խոստանում եմ հանդիպման արդյունքի մասին անպայման խոսել»։

Դիտարկմանը, թե արդյոք կա նման հարամանագրի անհրաժեշտություն, քանի որ բազմաթիվ իրավաբանների պնդմամբ՝ Արցախի Հանրապետությունը չեղարկող հրամանագիրն ինքնին հակասահմանադրական է՝ պատգամավորը պատասխանեց, որ թեև ինքն իրավաբան չէ, բայց բազմաթիվ իրավաբանների հետ խորհրդակցությունների արդյունքում ակնհայտ էր, որ այդ փաստաթուղթն, այո, ինքնին առոչինչ է՝ միջազգային իրավունքի տեսանկյունից, սակայն մի մասն էլ պնդում է, որ ավելորդ շահարկումներից խուսափելու համար, թերևս, անհրաժեշտ կլինի, որ նախագահի այդ հրամանագիրը մեկ այլ հրամանագրով պետք է չեղարկվի։

«Կարծում եմ, որևէ այլ խնդիր այն չի կարող առաջացնել, հատկապես, որ հրամանագրում կա նաև բացատրություն, թե ինչու է ստորագրվում այդ հրամանագիրը, այն է՝ ուժի գործադրման սպառնալիքին ներքո, սա միջազգային իրավունքի առումով լուրջ հիմնավորում է և կարող է իրավական հետևանք չունենալ»,- նշել է Արցախի ԱԺ պատգամավորը։

Հարցին, եթե անգամ վիճահարույց հրամանագիրը չեղարկող հրամանագիր կա, ապա որն է այն չհրապարակելու պատճառը, հնարավոր է ՀՀ իշխանությունների կողմից Արցախի իշխանությունների, այդ թվում՝ Սամվել Շահրամանյանի նկատմամբ կան ճնշումներ՝ պատգամավորն արձագանքեց, որ միանշանակ այդպես է։ «Թերևս պարոն Շահրամանյանը կարող է պարզաբանել, թե կա՞ն նման ճնշումներ, թե ոչ, բայց քանի որ ճնշումներ կան թե պատգամավորների վրա, թե անձամբ իմ վրա, ենթադրում եմ, որ այո, իր նկատմամբ ևս նման ճնշումներ առկա են։ Դա շատ կեղտոտ, այդ իշխանություններին հարիր ձևով է ուղեկցվում։ Բնականաբար, ես վստահ եմ, որ կա նաև այդ խնդիրը, այդ թվում՝ ՔՊ-ական պատգամավորների կողմից է շահարկվում այն, որ մեր ցանկացած գործողություն վտանգում է ՀՀ-ն։ Իհարկե, դրանով նրանք մոլորեցնում են մեր հայրենակիցներին և փորձում ահաբեկել Արցախի պատգամավորներին ու պաշտոնյաներին, սակայն կարծում եմ, մենք կարողացանք հիմնավորել, որ Արցախի համար մղվող արդարացի պահանջները կամ պայքարը չի կարող վտանգ առաջացնել Հայաստանի համար։

Հակառակը, այն լրացուցիչ անվտանգային վահան է Հայաստանի համար։ Ամեն դեպքում, ճնշումները կան և դրանք բոլորիս վրա են»,-ասաց պատգամավորը։

Աղբյուր` Փաստինֆո