Փաստ ինֆո

Ֆինանսների նախարարությունն առաջարկում է եկամտային հարկը չվերադարձնել 2027 թվականի հունվարի 1-ից հետո ձևակերպված հիփոթեքային վարկերի մասով, եթե գույքը գտնվում է՝ ա) Երևան քաղաքին հարակից՝ Արագածոտն, Արարատ, Արմավիր և Կոտայք մարզերում, (բացառությամբ Կառավարության հաստատած ցանկում ներառված այդ մարզերի սահմանամերձ բնակավայրերում գտնվող կամ կառուցվող անշարժ գույքի), բ) 2029 թվականի հունվարի 1-ից հետո, եթե գույքը գտնվում է այլ մարզերում (բացառությամբ Կառավարության հաստատած ցանկում ներառված սահմանամերձ բնակավայրերում գտնվող կամ կառուցվող անշարժ գույքի): Որոշման նախագիծը քննարկվել է Կառավարության այսօրվա նիստում, բայց վարչապետը որոշեց հանել այն օրակարգից, քանի որ, նրա համոզմամբ, դեռ պարզաբանելու հարցեր կան։

Նախագիծը ներկայացնելիս Ֆինանսների նախարար Վահե Հովհաննիսյանը նշեց, որ սահմանափակումները չեն կիրառվելու սահմանամերձ բնակավայրերի դեպքում։

«Նախագծով առաջարկվում է սահմանել նաև, որ 2025 թվականի հունվարի 1-ից հետո ստացված հիփոթեքայի վարկերի մասով վարկառուին և համավարկառուին՝ առկայության դեպքում, վերադարձման ենթակա եկամտային հարկի ընդհանուր գումարը եռամսյակի կտրվածքով չի կարող գերազանցել 750 հազար դրամը»,-ասաց նախարարը։

Վարչապետը հետաքրքրվեց, եթե Երևանում սահմանափակումը դրվել է շինթույլտվությունների ժամկետով, ապա ինչու է մարզերում հիփոթեքային վարկերի ստացման ժամկետով դա արվում։ Ի պատասխան՝ նախարարը պարզաբանեց․ «Երևանի դեպքում մարդիկ արդեն շինթույլտվություններ ստացել էին և չէինք ուզում կեսից նման որոշումներ կայացնել, իսկ մարզերի դեպքում մինչև 2027թ․ ժամանակ կա, ուստի սահմանափակումն առաջարկվում է մտցնել հիփոթեքային վարկերի մասով»։

Փաշինյանն ողջունեց նախագիծը՝ նշելով, թե դրա նպատակը տարածքային համաչափ զարգացումը խթանելն է։
Նախագիծը չի տարածքում այն վարկառուների վրա, ովքեր արդեն օգտվում են եկամտահարկի վերադարձի օրենքից։ Նրանք միչև վարկի մարումը կշարունակեն օգտվել դրանից։

Աղբյուր` Փաստինֆո