Փաստ ինֆո

Հասարակական-քաղաքական գործիչ Նարեկ Մալյանը կշարունակի մնալ կալանավորված։ Երևանի ընդհանուր իրավասության քրեական դատարանը՝ դատավոր Սուսաննա Գզոգյանի նախագահությամբ, որոշեց երկարացնել Նարեկ Մալյանի նկատմամբ ընտրված խափանման միջոց կալանավորման ժամկետը ևս երեք ամսով։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության քրեական դատարանում՝ դատավոր Սուսաննա Գզոգյանի նախագահությամբ, այսօր կայացել է Նարեկ Մալյանի գործով նախնական դատալսումները, որի ընթացքում նախագահողը նախ պարզել է դատավարության մասնակիցների ինքնությունը, ապա՝ օրենքով սահմանված կարգով անցել այլ հարցերի քննարկման, այդ թվում՝ խափանման միջոցի։ Հանրային մեղադրող Ծովակ Մնացականյանը միջնորդել է երկարացնել Մալյանի նկատմամբ ընտրված խափանման միջոց կալանավորման ժամկետը՝ երեք ամսով։ Ըստ դատախազի՝ Մալյանի նկատմամբ խափանման միջոց կալանքի կիրառումը կարող է պատշաճ վարքագիծ ապահովել։

«Հաշվի առնելով նաև այն, որ գործ ունենք այնպիսի մեղսագրված հանցանքի կատարման արարքի հետ, որը կապված է հասարակության կայունության և դրանք կարգավորող հասարակական հարաբերությունների հետ, գտնում եմ, որ օրինական ուժի մեջ մտած դատական ակտերի կայացումից հետո նոր հանգամանքներ հայտնի չլինելու պայմաններում պետք է շարունակական լինի ընտրված խափանման միջոցը՝ երկարացնելով երեք ամիս ժամկետով, որի ընթացքում հնարավորություն կունենանք ավարտել գործով քննությունը»,- նշեց դատախազը՝ մանրամասնելով, որ շարունակում են արդիական մնալ կալանավորման հիմքերը՝ նոր հանցանքի կատարումը, վարույթ իրականացնող մարմնից թաքնվելը;

Պաշտպան Ռուբեն Մելիքյանը նախ զարմանք հայտնեց դատախազի դիրքորոշումից, թե իբրև ոչինչ չի փոխվել, Մելիքյանն ընդգծեց՝ գործը դատարան է ուղարկվել, ինչը նշանակում է, որ որքան ժամանակը գնում է, այնքան նվազում են ռիսկերը։ Բացի այդ, վերաքննիչ դատարանն արձանագրել է, որ փախուստի ռիսկը գոյություն չունի։ Ընդ որում, Մելիքյանը հիշեցրեց, որ պետք է ծայրահեղ դեպքերում կալանքի հարց բարձրացվի։ Փաստաբանը նաև արձանագրեց, որ գործով անցնող որևէ անձ չկա, ում վրա Մալյանը պետք է ազդեցություն ունենա։

«Ինչ կալանքի մասին է խոսքը՝ նման հանցակազմի դեպքում»,- ընդգծեց պաշտպանը։
Պաշտպան Տիգրան Աթանեսյանն էլ արձանագրեց՝ դատախազությունը՝ ի դեմս մեղադրողի, ոչնչացրեց ՄԻԵԴ ամբողջ նախադեպային իրավունքը։ Աթանեսյանն ընդգծեց, որ շարունակական կալանքը չի կարող լինել նույն հիմքերով, հակառակը՝ պետք է նոր հիմքեր լինեն՝ անձին կալանքի տակ պահելու համար։

«Կալանքն ընդամենը գործող իշխանության կողմից իմ պաշտպանյալի՝ հալածանքի դրսևորում է։ Չգիտեմ ինչ որոշում կկայացնեք, ակնկալիք չունենք։ ՀՀ-ն զավթված է այդ մարդկանց կողմից»,- ասաց Աթանեսյանը՝ նշելով, որ առհասարակ որևէ խափանման միջոցի անհրաժեշտություն չկա։

Դատարանն այդուհանդերձ որոշեց երկարացնել կալանքի ժամկետը՝ երեք ամսով։

Հիշեցնենք, որ Նարեկ Մալյանը ձերբակալվել է սեպտեմբերի 20-ին, ապա՝ կալանավորվել։ Նրան մեղադրանք է առաջադրվել ՀՀ քրեական օրենսգրքի 329-րդ հոդվածի 2-րդ մասի 3-րդ կետով։ Ըստ մեղադրանքի՝ նա հասարակության լայն զանգվածներին հասանելի «Ֆեյսբուք» սոցիալական ցանցի իր անհատական էջի միջոցով 2023թվականի սեպտեմբերի 19-ին «ուղիղ եթեր» հեռարձակման միջոցով, հարապարակել է տեսաձայնագրություն, որում փաստացի լուսաբանելով տվյալ պահին Երևան քաղաքի Հանրապետության հրապարակում տեղի ունեցող իրադարձությունները՝ հանդես է եկել ՀՀ-ում գրանցված և գործող «Քաղաքացիական պայմանագիր» կուսակցության անդամների թվից կուսակցության առաջնորդին սատարող անդամների հասցեին որակող բնույթի հայհոյանքներ տալու և նրանց հարազատների նկատմամբ քողարկված վիրավորական արտահայտություններ կատարելու հրապարակային խոսքով՝ այդ կերպ քաղաքական հայացքներով պայմանավորված՝ քարոզելով և հրահրելով ատելությու ու անհանդուրժողականություն անձանց հիշյալ խմբի նկատմամբ՝ միաժամանակ հանձն առնելով պարզել և տրամադրել վերջիններիս, նրանց հարազատների տվյալներն ու բնակության հասցեները, ինչպես նաև առաջնորդել՝ որոշակի գործողությունները կատարելու համար, որպիսի հրապարակային խոսքի փաստական իմաստն ընկալվել է մի շարք հասցեատերերի կողմից, ովքեր «Քաղաքացիական պայմանագիր» կուսակցության կամ նրա առանձին անդամների նկատմամբ բռնություն գործադրելու առաջարկներով մեկնաբանություններ են թողել վերը նշված տեսաձայնագրության ներքո:

Հեղինակ՝ Իզաբել Սահակյան

Աղբյուր` Փաստինֆո