Փաստ ինֆո

Իլոն Մասկը պատահաբար ջարդուփշուր է արել ավելի քան մեկ միլիոն դոլար արժողությամբ հազվագյուտ ավտոմեքենան, երբ դրանով պարծեցել է իր բիզնես գործընկեր Փիթեր Թիլի առջև: Արդյունքում երկուսն էլ հազիվ են փրկվել, գրում է New Yorker պարբերականը։

1999 թվականին Իլոն Մասկը վաճառել է իր առաջին ստարտափը 22 միլիոն դոլարով և անմիջապես ձեռք բերել McLaren F1 սպորտային մեքենան։ Այդ տարիներին այդ մեքենան համարվում էր ամենաարագն աշխարհում։ Արտադրության ողջ ընթացքում հավաքվել է այս ապրանքանիշի ընդամենը 106 մեքենա, և յուրաքանչյուրն արժեցել է առնվազն 1,2 միլիոն դոլար։

2000 թվականի մարտին Մասկը որոշել է ցուցադրել գնումը Փիթեր Թիլին։ «Եվ ի՞նչ կարող է այն անել»․- հետաքրքրվել է վերջինս։ Թեև Մասկը այդպես էլ չսովորեց վարել այդ մեքենան, նա հանգիստ պատասխանել է․ «Տես» և սեղմել գազի ոտնակը։ Մեքենան անմիջապես կորցրել է կառավարումը։ Հարվածելով արգելապատնեշին՝ այն թռել է մոտ մեկ մետր բարձրության վրա, ինչից հետո վայր է ընկել ասֆալտին՝ շարունակելով պտտվել տեղում։

Հարվածի հետևանքով կոտրվել է դիմապակին և զգալիորեն վնասվել է կորպուսը։ Երբ մեքենան կանգ է առել, Մասկը շրջվել է դեպի Թիլը և ասել. «այն ապահովագրված չէ»: Որպեսզի հասնեին այն վայրը, որտեղ այդ օրը նախատեսված էր գործնական հանդիպում, Մասկն ու Թիլը ստիպված էին կանգնեցնել այլ մեքենա:

«Հրաշք է, որ ոչ ոք չի տուժել», - խոստովանել է Թիլը New York Times-ին տված հարցազրույցում։ «Ես նույնիսկ չէի կապել ամրագոտին, չնայած այդպես պետք չէ անել»: Նրա խոսքով՝ Մասկն իրեն ասել է, որ մեկ անգամ չէ, որ լսել է այն մարդկանց մասին, ովքեր հարստացել են, սպորտային մեքենա են գնել և անմիջապես ջարդել այն, բայց երբեք չի մտածել, որ նույնը տեղի կունենա նաև իր հետ: Այդ իսկ պատճառով նա չի գնել ապահովագրություն։

Աղբյուր` Փաստինֆո