Փաստ ինֆո

Ա. Հարությունյանի մամուլի ասուլիսը որևէ նոր բան չէր պարունակում բովանդակային առումով, ավելին, հերթական անգամ փորձում էր արձանագրել մի բան, որ մենք ամեն ինչ անում ենք, որպեսզի իրավիճակը փոխվի, բայց, ի հեճուկս արածի, որևէ բան չի փոխվում: Երկրորդ արձանագրումը՝ բոլորը մեղավոր են՝ մասնավորապես համաշխարհային կենտրոնները, սկսած ռուսներից վերջացրած Արևմուտքով, որոնք չեն արձագանքում Արցախի այսօրվա իրավիճակին: Բայց թիրախային որևէ հիշատակում չկար թե ո՞վ է գլխավոր մեղավորը՝ Հայաստանի իշխանությունը: «ՓաստԻնֆոյի» եթերում ասել է քաղտեխնոլոգ, վերլուծաբան Վիգեն Հակոբյանը:

Բանախոսի դիտարկմամբ, երբ Ա. Հարությունյանը ասում է, թե փորձելու է հերթական քայլը անել, այդ քայլերի շարքը վաղուց արվել է: Ի սկզբանե պետք է հստակ թիրախավորել, թե ով է հիմնական մեղավորը և պատասխանատուն: «Ես կարծում եմ, որ դա Հայաստանի այսօրվա իշխանությունն է, որը դե ֆակտո ճանաչել է Արցախի պատկանելիությունը Ադրբեջանին: Ինչ վերաբերվում է Ա. Հարությունյանին, ես կարծում եմ, երբ իշխանության ներկայացուցիչը անընդհատ դուրս է գալիս և իր ժողովրդի հետ խոսելուց արձանագրում է իր անճարությունը, ապա դրան պետք է հետևի հրաժարական»,- ասել է Վ. Հակոբյանը:

Անդրադառնալով իշխանափոխությանը, վերլուծաբանը նշեց, որ Հայաստանում էլ իշխանությունը «գետնի վրա գցած է» և կարելի է այդ իշխանությունը վերցնել, քանի որ երբևիցե չի եղել այսքանն թույլ իշխանություն, որը հիմնված է կարմիր բերետավորների վրա: Իշխանությունը շարունակում է պաշտոնավարել, որովհետև Հայաստանում յուրահատուկ քաղաքական բալանս գոյություն ունի իշխանության և ընդդիմության միջև, մենք ունենք թույլ իշխանություն և բավականին թույլ ընդդիմություն, կամ, լավագույն դեպքում թույլ ընդդիմություն, որը անհրաժեշտ չափով ցանկություն չունի պատասխանատվություն ստանձնել:

Քաղտեխնոլոգը նշեց, որ Արցախում, փաստացի ընդդիմադիր խմբակցություններից մեկի ներկայացուցիչը ստանձնեց Ազգային ժողովի նախագահի պաշտոնը: Հաշվի առնելով, որ դաշնակցությունը Արցախում այսօր ավելի լայն կոալիցիայի մեջ է մտնում, ապա պետք է արձանագրենք, որ տվյալ պարագայում իշխանական լծակներին տիրանալու առումով որոշակի պատասխանատվություն ստանձնել է նաև այդ ճակատը: «Կարծում եմ Արցախում որոշակի տրանսֆորմացիաներ առկա են, ի տարբերություն ՀՀ-ի: Ենթադրում եմ, որ այստեղ շահերի որոշակի համադրումներ են եղել որոշ աշխարհաքաղաքական խաղացողների հետ, որոնց համար կարևոր է, որպեսեզի Արցախում այսօր ուժեղանան ավելի հակաադրբեջանական և հակաթուրքական կոշտ գծի կողմնակիցների դիրքերը»:

Մանրամասները՝ տեսանյութում:

Աղբյուր` Փաստինֆո